Монгол Улсын Боловсрол, соёл, шинжлэх ухаан, спортын сайд Ё.Баатарбилэг Оросын холбооны улсын Суурь судалгааны сангийн зөвлөлийн дарга В.Я.Панченкотой уулзалт хийв.

БСШУСЯ болон ОХУ-ын Суурь судалгааны сангийн хамтын ажиллагааны хүрээнд хамтарсан суурь судалгааны төслүүдийг амжилттай хэрэгжүүлж байгаа бөгөөд энэ уулзалтын үеэр “Шинжлэх ухааны суурь судалгааг дэмжих чиглэлээр хамтран ажиллах тухай” санамж бичиг болон 2020 онд хэрэгжүүлэх хамтарсан төслийн сонгон шалгаруулалтыг зохион байгуулах тухай хэлэлцээрийг байгууллаа. Хэлэлцээр болон санамж бичгийн хүрээнд 25 хүртэл хамтарсан төсөлд хоёр талаас санхүүжилт олгоно.

Сайд Ё.Баатарбилэг ОХУ-ын Шинжлэх ухааны академи болон Суурь судалгааны сантай хамтран цаашид хэрэгжүүлж болох төслүүдийн талаар саналаа хэлж, хоёр тал судалгааны хүрээг өргөжүүлэх, эрчимжүүлэхэд санал нэг байгаагаа илэрхийлэв.