Хүнс, хөдөө аж ахуй, хөнгөн үйлдвэрийн сайд Жадамбын Энхбаяр 2024 оны дэлхийн аварга шалгаруулах тэмцээнд амжилттай оролцож, алтан цом хүртсэн Монголын үсчин, гоо сайханчдыг хүлээн авч уулзан, шагнал гардууллаа.

“Алтан гар” Монголын үсчин, гоо засалчдын мэргэжлийн холбооны баг өнгөрсөн 2024 онд дэлхийн гоо сайхны олимп хэмээн нэрлэгддэг “OMC Hairworld” тэмцээнд амжилттай оролцож, аваргын алтан цом хүртсэн түүхэн амжилт гаргасан юм.

78 жилийн түүхтэй, 54 орны 2000 гаруй үсчин, гоо сайханч өрсөлдсөн энэхүү тэмцээнд Монгол Улсын баг 18 дахь удаагаа оролцож, 1 алт, 4 мөнгө, 3 хүрэл, 6 тусгай байр эзэлснээр багийн дүнгээр алтан цом хүртжээ.

Энэ үеэр ХХААХҮ-ийн сайд Ж.Энхбаяр олон улсын тавцанд эх орныхоо нэрийг өндөрт өргөсөн үсчин, гоо сайханчдыг Засгийн газраас нийт 59 сая төгрөгөөр шагнахаар шийдвэрлэснийг дуулгаж, батламж гардуулсан юм.