УИХ-ын гишүүн Ж.Батжаргал, Д.Батлут нар Дархан-Уул аймаг дахь Хүнс, хөдөө аж ахуй, хөнгөн үйлдвэрийн яам (ХХААХҮЯ)-ны үйл ажиллагаатай танилцлаа.

Энэ үеэр Хүнс, хөдөө аж ахуй, хөнгөн үйлдвэрийн сайд Ж.Энхбаяр болон газар, хэлтсийн дарга, яамны харьяа агентлагууд удирдлага барилтамж буй бодлого, хэрэгжүүлж буй төсөл хөтөлбөрөө танилцуулсан юм. ХХААХҮ-ийн сайд Ж.Энхбаяр яамнаас Монгол Улсын Ерөнхийлөгчийн санаачилсан малын гаралтай түүхий эдийн боловсруулалт, үйлдвэрлэлийг нэмэгдүүлэх “Цагаан алт”, Засгийн газраас дэвшүүлсэн “Атрын IV аян”үндэсний хөдөлгөөнүүдийг хэрэгжүүлж эхэлснийг онцлон дурдав.

“Цагаан алт” хөтөлбөрийн хүрээнд арилжааны 10 банктай хамтран ажиллах гэрээ байгуулж, боловсруулах болон эцсийн бүтээгдэхүүн үйлдвэрлэгчдэд эргэлтийн хөрөнгийн зээл олгож эхэлсэн. Эргэлтийн хөрөнгөд 300 тэрбум төгрөг, хөрөнгө оруулалтын зээлд 488.9 тэрбум төгрөг тусгасан бөгөөд Засгийн газраас хариуцан төлөх хүүгийн хөнгөлөлтөд 66.4 тэрбум төгрөг зарцуулах тооцоо гарсан.Хөтөлбөрийн үр дүнд ноолуурын бүрэн боловсруулалтыг 20-иос 40 хувь, ноос боловсруулалтыг 25-аас55 хувь, арьс шир боловсруулалтыг 30-аас 50 хувь хүртэл нэмэгдүүлж, нийт 8-10 гаруй ажлын байр шинээр бий болгох зорилт дэвшүүлж байгаа юм.

“Атрын IV аян” үндэсний хөдөлгөөнийг орон даяар хэрэгжүүлснээр газар тариаланг, эрчимжсэн мал аж ахуйтай хослуулан хөгжүүлж, хөдөө аж ахуйг эдийн засгийн тулгуур салбар болгон хөгжүүлэхээр зорьж байгаа юм. Улсын хэмжээнд нийт 200 га талбайг шинээр эргэлтэнд оруулах, махны чиглэлийн 150 мянган толгой, сүүний чиглэлийн 50 мянган толгой үхрээр эрчимжсэн мал аж ахуйг өргөтгөх зэрэг зорилт тусгасан. Тариалангийн салбарт улаанбуудай, төмс, хүнсний ногоогоо дотоодоосоо бүрэн хангаж, фермерийн аж ахуйн гол суурь болох малын тэжээлийн үйлдвэрлэлийг бодлогоор дэмжих юм.  

Энэ үеэр УИХ-ын гишүүн Д.Батлут, Ж.Батжаргал нар ХХААХҮ-ийн яамны харьяа Хөдөө аж ахуйн бирж, Хөдөө аж ахуйн корпораци, Зээлийн батлан даалтын сан, Жижиг дунд үйлдвэрийн газрын үйл ажиллагаатай танилцаж, албан хаагчдын сэтгэгдлийг сонслоо.