УИХ-ын даргын 82-р захирамжаар байгуулагдсан ЖДҮҮ-г дэмжих тухай хуулийн хэрэгжилтийн үр дүнд үнэлгээ хийж, бичил бизнес эрхлэгчдийг дэмжих тогтолцоог оновчтой болгох, холбогдох хуулийн төслийг боловсруулах үүрэг бүхий ажлын хэсэг Дархан-Уул аймагт ажиллаж байна.

Ажлын хэсэг:

ЖДҮҮ, бичил бизнес эрхлэгчдийг дэмжихэд төрөөс барьж буй бодлого шийдвэр, одоо мөрдөгдөж буй хууль эрхзүйн зохицуулалт
Санхүүгийн дэмжлэг, хэрэгжүүлж буй төсөл хөтөлбөрүүдийн талаар бизнес эрхлэгчдэд танилцуулж,
Хууль эрхзүйн орчинд өөрчлөлт оруулах шаардлага бий эсэх
Хөрсөн дээр бодит дэмжлэг болж чадаж байгаа эсэх
Тулгамдаж буй асуудал зэрэгт бизнес эрхлэгчидтэй хэлэлцүүлэг өрнүүллээ.
Тус ажлын хэсэг нь ЖДҮ-ийг дэмжих тухай хуулийг оновчтой болгох чиглэлийн хүрээнд “Бичил үйлдвэр үйлчилгээ эрхлэгчдийг дэмжих тухай анхдагч хуулийн төсөл”-ийг боловсруулсан нь хэлэлцүүлгийн үеэр иргэдэд танилцуулагдлаа.

Өрхийн үйлдвэрлэгч, бичил бизнесийнхэнд зориулсан тус бие даасан хууль нь бичил бизнес эрхлэгчдэд тавигдах шаардлагыг бууруулж бодлогын хүрээнд болон санхүүжилтийн хүрээнд дэмжлэг үзүүлж өрсөлдөөний давуу эрхийг олгох үндсэн гол зорилгын хүрээнд боловсруулагдсан.

Зургаан бүлэг 20 зүйл бүхий тус хуулийн онцлогоос дурдвал:

Бичил бизнес гэсэн тодорхойлолтыг нарийвчлан оновчтойгоор гаргах
Бизнесийн үйл ажиллагааны эхлэл хөрөнгө оруулалтын зорилгоор 5 хүртэлх сая төгрөгийн барьцаагүй, хүүгүй зээл олгох
Богино хугацааны эргэлтийн санхүүгийн дэмжлэг болох 10 хүртэлх сая төгрөгийн барьцаагүй, эргэн төлөгдөх нөхцөлтэй, эхний 6 сарын хугацаанд хүүгээс чөлөөлөх зэрэг иргэдийн ачаанаас хөнгөлсөн, зээлийн уян хатан нөхцөлтэйгөөр дэмжлэг үзүүлэхэд чиглэсэн болохыг онцоллоо.

Бизнес эрхлэгчидтэй хийх уулзалт, хэлэлцүүлэг нь цаашид Хойд бүс Орхон, Булган, Хөвсгөл аймагт үргэлжилнэ.

Ажлын хэсгийн бүрэлдэхүүнд УИХ-ын гишүүн ажлын хэсгийн ахлагч Д.Батлут, УИХ-ын гишүүн Ж.Батжаргал, ХХААХҮЯ-ны ахлах шинжээч Э.Сугарбаяр, ЖДҮГ-ын хэлтсийн дарга Н.Энхтөр тэргүүтэй холбогдох яамд, газрын мэржилтнүүд ажиллаж байна.

ЖДҮҮ эрхлэгчидтэй хийх анхны хэлэлцүүлэг Дархан-Уул аймгаас эхэллээ

ЖДҮҮ эрхлэгчидтэй хийх анхны хэлэлцүүлэг Дархан-Уул аймгаас эхэллээ