УИХ-ын гишүүн П.Алтангэрэл. Түүхийн багшийн мэргэжлээ улстөртэй холбосон түүний унасан газар угаасан ус нь Өвөрхангай аймгийн Богд сум. Хэдийгээр хаа холын хангай нутгийн хүү төрсний гэрчилгээн дээрх нутгаараа бус гэргийнхээ төрсөн нутгаар овоглуулж УИХ-д Дорнод аймгаас анх удаа парламентад сонгогдсон төрийн түшээ болох хувь зохиол тохиосныг үзвэл хүний амьдралд тааж хэлэхийн аргагүй зүйл олон байдгийг харуулах шиг ээ.

Тэрээр 1984 оноос эхлэн Дорнод аймгийн ерөнхий боловсролын сургуулиудад багш, хичээлийн эрхлэгчээс эхлүүлэн захирал хүртлээ дэвшиж байсан сурган хүмүүжүүлэгч юм. 1996-2000 онуудад буюу Ардчилсан холбоо эвсэл дийлэнх болсон үед аймагтаа сонгуулийн үйл ажиллагааг идэвхтэй сайн явуулж, гурван гишүүнээ парламентын суудалд хүргэсний хүчинд албан тушаалын бялуу хүртэж Чойбалсан хот, Хэрлэн сумын Засаг даргаар томилогдож байсан.

Тухайн үедээ Чойбалсан хотын Засаг дарга байсан хэдий ч аймгийнхаа Засаг даргаас илүү эрх мэдэлтэй байсан гэж тэр нутгийнхан ярилцдаг юм билээ. Тэрбээр муу дарга байгаагүй ч зарим нэг талаараа жаахан «хүн муутай» ч гэж хардагдах явдал байсан гэдэг. Магадгүй сайн явж болдоггүй хорвоо гэдэг шиг ажил амьдрал нь цэгцэрч байгаа даргад атаархал чулуудсан зарим нэгнийх нь увайгүй зан байхыг ч үгүйсгэхгүй ээ. Юутай ч түүнийг бор дарсанд дуртай Засаг даргыгаа хашраах гэж эрүүлжүүлэхэд хүртэл хонуулдаг байсан гэдэг юм билээ.

Гэхдээ энэ бол Дорнодынхны ам дамжсан яриандаа. Аймгийнхаа АН-ын гишүүн, дарга гэхчилэн улс төрийн сонгуульт ажил эрхэлж явсан тэрбээр 2000 оноос хойш хувийн салбарт орж барилгын бизнес эрхэлж ч явсан.

Эр хүн туг ч барина тугал ч хариулна гэгчээр хотын дарга байхдаа хувийн салбарынхантай нөхөрлөж байсны хүчинд барилгын «Аглут» гэдэг компанитай болсон.

Компанийнх нь «Аглут» гэдэг нэрийг араас нь уншвал Тулга гэдэг үгнээс бүтсэн болохыг түвэггүй мэдэж болно. Гурван хүүгийнхээ багынх нь нэрээр нэрлэсэн компани нь орон нутагтаа барилгын томоохон бүтээн байгуулалтад хувь нэмрээ оруулсаар байгаа. Харамсалтай нь УИХ-д сонгогдоод парламентын гишүүн болсныхоо дараа «орох орон, оочих аягагүй» гэж шалтаг тоочин байж байртай болсонд Дорнодчууд одоо хүртэл дургүйцдэг юм билээ. Магадгүй барилгын бизнес эрхэлдэг хүн хотод нэг өрөө байр ч үгүй байж ямар мөнгөөрөө сонгуульд ордог байна аа гэхчилэн нутгийн нэр хөөдлөө хэмээн цөс ихтэй буриадууд дурамжхан байдаг гэсэн.

Харин энэ гаргасан байдлаараа эрхэм гишүүн цэвэр эд мөнгөний сонирхолгүй, улстөрийн хүн гэж харуулах гэсэн «пи ар» ардаа нуусныг яахан гадарлах билээ. Ямартай ч УИХ-д орж ирэхээсээ өмнө «Дорнод мөрөн», «Мянганы замын зүүн талын маршрутыг өөрчлөх» иргэний хөдөлгөөний гол дүрд тоглож олон нийтийн талархлыг хүлээснээр өнөөдрийн энэ суудалд морилсон түүхтэй. УИХ-д сууснаас хойш ураны асуудлаар дагнан «суралцаж» энэ чиглэлийн хууль батлалцах ажилд нэлээд гүнзгийхэн цээжээ дүрсэн гэдэг.

Тийм ч учраас сүүлийн үед уран, газрын тос олборлох, байгаль хамгаалах, нөхөн сэргээх талаар ажиллаж байгаа ч өнгөрсөн жил санал болгон оруулсан Цөмийн энергийн хууль нь хэтэрхий алаг цоог ихтэй, үндэсний аюулгүй байдал талаасаа Монгол Улсын эрх ашигт ноцтой зөрчилдөх хуулийн зүйл заалттай гэдэг шүүмжлэлийг хүртээд байгаа.

УИХ-ын танхимд тоотой цөөн үг амнаасаа унагадаг эрхэм гишүүнийг саяхнаас Хэрлэнгийн арлыг сахидаг шавар арслан ураны асуудал ярихаар нойрноосоо сэрж, бусад асуудал дээр хэвтэртээ өнждөг гэж шооч гишүүд нь хочлоод амжсан сурагтай. Юутай ч одоогийн байдлаар ураны асуудлаар мэргэжил дээшлүүлж байгаа тэрээр «яван чангарна» гэдэг шиг тун удахгүй хуучин энэ тэр гээд оны ялгаа гаргаад байгаа архаг гишүүдтэй ан мана үзэхийг хэн байг гэхэв.