Манай улсын төсвийн орлого зэсийн үнээс хамааралтай байдаг. Зэсийн үнийн огцом уналт ирэх оны төсөв хэлэлцэх энэ үед асуудал үүсгээд байна.
Зэсийн үнийн уналтаас үүдсэн төсвийн хэлэлцүүлгийн үеэр хоёр намаас ажлын хэсгүүд гарсан ч хараахан шийдвэрт хүрч чадаагүй байна. Энэ талаар УИХ-ын Эдийн засгийн байнгын хорооны дарга Ц.Баярсайханаас тодрууллаа.

-Ирэх оны төсөв хэлэлцэх асуудлаар байгуулагдсан ажлын хэсгийн үйл ажиллагаа ямархуу төвшинд явна вэ?

-2009 оны төсвийн төслийн хоёр дахь хэлэлцүүлгийг байнгын хороодоор хэлэлцэж дууссан. Төсөлд тооцооны асуудлыг дахиж тооцох, нягтлах асуудлууд нэлээдгүй гарч байна. Ялангуяа зэсийн үнийг 6700 ам.доллараар тооцсон нь өнөөдөр 3200 ам.доллар, эсвэл 4200 ам.доллараар тооцох уу гэдэг дээр хүрээд байна. 4200 ам.доллараар тооцоход төсвийн зарлагыг 250 тэрбум, 3200 ам.доллараар тооцоход 400-аад тэрбум төгрөгөөр багасгах зайлшгүй шаардлагатай. Мөн ирэх оны эдийн засаг, нийгмийг хөгжүүлэх үндсэн чиглэлд төсвийг алдагдалгүй тооцсон нь 4.4 хувийн алдагдалтай байхаар байна. Энэ асуудлаарх ажлын хэсэг төсвийн хэмнэлтийн тухай ярихдаа удирдлагын зардлыг багасгах буюу өөрсдөөсөө эхлэх ёстой гэсэн зарчмын байр суурь баримталж байна. Түүнчлэн инфляцийг нэг оронтой тоонд барьж, эдийн засгийн өсөлтийг хангах зорилтод хүрэхийн тулд жижиг дунд үйлдвэрлэлийг дэмжиж, энэ онд эхэлсэн хөрөнгө оруулалтын ажлыг дуусгах хэрэгтэй гэсэн саналууд гарсан. Ийм үед нийгмийн халамжийн зарим хэсэг байхгүй болох тухай асуудал хараахан нэг мөр болоогүй ч төсөв хүндэрвэл бид ард түмэнд үнэн үгээ хэлж, амлалтын чиглэлтэй зардлыг бууруулахаас өөр аргагүй.

-Гишүүн бүрт нэг тэрбум төгрөг хувиарлах тухай Та юу гэж бодож байна вэ?

-Өнгөрсөн жилүүдэд хөрөнгө оруулалтыг жигд болгож, тойрог болгонд ижил хэмжээний хөрөнгө оруулж байсан жишиг бий. Энэ жишгийг цаашид үргэлжлүүлэх эсэхийг сайн бодох хэрэгтэй. Ер нь бид эдийн засаг, нийгмийн үндсэн чиглэлийг орхигдуулдаг тал бий. Yүнийг өөрчилж хаана эмнэлэг барих хэрэгтэй байна гэхчлэн хаана, юу хэрэгтэй байгааг тодорхой төлөвлөн төсөвтөө суулгахгүй учраас тойрогтоо амласандаа хүрч, арай ахиу зүйл татахыг хичээдэг нь үнэн. Тиймээс хөрөнгө оруулалтад бодитой хандах ёстой.

Ц.Баярсайхан: Төсөв хүндэрвэл амлалтын зардлыг бууруулах ёстой