МҮОНТВ-ийн “Ярилцъя” нэвтрүүлгийн зочноор Монголын үйлдвэрчний эвлэлийн холбооны ерөнхийлөгч Х.Амгаланбаатар оролцлоо.

-МҮЭ-ээс тавьж буй гол шаардлага юу вэ?

-Цалин хөлс, тэтгэвэр тэтгэмж 2012 оны таван сараас хойш огт нэмэгдээгүй. Өнгөрсөн хоёр жилийн хугацаанд бараа бүтээгдэхүүний үнэ, инфляцийн түвшин тодорхой хувиар нэмэгдсэн. Үүнээс болж нэмэгдээгүй байгаа цалин хөлс, тэтгэвэр тэтгэмжийн бодит худалдан авах чадвар нилээн доошилсон.

Энэ утгаараа МҮЭХ энэ оны есдүгээр сарын 13-ны өдөр УИХ, Засгийн газарт хандаж цалин хөлс, тэтгэвэр тэтгэмжийг нэмэгдүүлэх хэлэлцээг эхлүүлэх саналыг тавьсан. 2012 оны 11 дүгээр сарын 5-ны өдөр улсын гурван талт хэлэлцээрээр бид инфляцийн түвшин, эдийн засгийн өсөлттэй уялдуулж цалин хөлсийг нэмэгдүүлэх арга хэмжээг авахаар тохиролцсон.

Тэтгэвэр тэтгэмжийг бараа бүтээгдэхүүний үнийн өсөлттэй уялдуулан нэмэгдүүлэх арга хэмжээг авахаар гурван талт хэлэлцээрээр тогтсон. Иймд хэлэлцээрийг биелүүлэх, хэрэгжүүлэх зорилгоор хэлэлцээ эхлээд явж байна. Хэлэлцээг үр дүнтэй болгохын тулд гурван талаас есөн хүний бүрэлдэхүүнтэй ажлын хэсгийг ажиллаж байгаа.

Засгийн газраас цалин хөлс, тэтгэвэр тэтгэмжийг нэмэгдүүлэхэд 2014 оны төсөвт 200 тэрбум төгрөгийг суулгасан. Энэ мөнгөөр цалин хөлс, тэтгэвэр тэтгэмжийг нэмэгдүүлэх арга хэмжээг авахад хангалтгүй хувь хэмжээ байгаа. 200 тэрбум бол найм орчим хувь нэмэгдүүлэх л эх үүсвэр. Тэгэхээр МҮЭХ энэ хэлэлцээрийг эхлүүлэх болсон зорилго бол 200 тэрбумын эх үүсвэрийг нэмэгдүүлэх боломжийг гаргах, харин ямар салбарт хэдэн хувиар нэмэгдүүлэх нь дараагийн асуудал.

-Эх үүсвэр нэмэгдүүлэх бололцоог ер нь юу гэж харж байна вэ?

-Өнөөдрийн авч буй цалин хөлс, тэтгэвэр тэтгэмж нь иргэдийн амьдралд хүрэлцэхгүй байгаа учраас энэ боломж бололцоог тал талаас нь олох ёстой. МҮЭХ 2014 оны төсөв хүнд байгааг мэдэж байгаа. Гэхдээ хүндрэлтэй зүйл дотроос эх үүсвэр олох боломж бололцоо харагдаж байна.

Өнгөрсөн нэг жилийн хугацаанд 3800-5000 орчим төрийн албан хаагч нэмэгдсэн тооцоо байдаг.

Ялангуяа 2011, 2012 оны үед хойшлогдсон хөрөнгө оруулалт, бүтээн байгуулалтын арга хэмжээнүүд бий. Энэ арга хэмжээнүүд ирэх хавар дөрөв, таван сараас үргэлжлэх ёстой. Тэгэхээр энэ байдлыг бид эрх зүйн орчинд нь зохицуулалт хийж эх үүсвэрийг бий болгох боломжтой. Хоёрдахь эх үүсвэр бол төрийн албан хаагчдын орон тооны асуудал.

Өнгөрсөн нэг жилийн хугацаанд 3800-5000 орчим төрийн албан хаагч нэмэгдсэн тооцоо байдаг. Энэ хүмүүсийн орон тоо цалин хөлс, урамшуулалд нь зарцуулж буй эх үүсвэрийг дайчлах боломж харагдаж байна. МҮЭХ 2014 оны төсвийг нэг бүрчлэн үзэж, эх үүсвэрийг гаргах үүрэг байхгүй. Үүнийг хэлэлцээрийн нэг тал болсон Засгийн газар бодож эх үүсвэрийг гаргах байх.

МҮЭХ иргэдийн эрх ашгийг хамгаалдаг байгууллагын хувьд иргэдийн авч буй цалин хөлс, тэтгэвэр тэтгэмж амьдралд нь хүрч байгаа эсэх, нэмэх шаардлагатай эсэхийг илэрхийлдэг байгууллага. Тэр утгаараа иргэдийнхээ санаа бодлыг энэ хэлэлцээрт илэрхийлж, хэлэлцээрийг үр дүнтэй болгохын төлөө ажиллах ёстой.

Үргэлжлэлийг нэвтрүүлгээс...

Х.Амгаланбаатар: 200 тэрбумын эх үүсвэрийг нэмэгдүүлэх боломжтой