УИХ дахь МАН-ын бүлгийн даваа гаригийн хуралдааны дараа бүлгийн дарга Н.Энхболд өнгөрсөн долоо хоногийн баасан гаригт УИХ-ын чуулганы нэгдсэн хуралдаанаар 2014 оны Төсвийн тухай хуулийн эцсийн найруулгыг сонсох үед Монгол Улсын ДНБ-д эзлэх өрийн хэмжээ 40 хувь байхыг 60 хувиас ихгүй байна хэмээн зассан байна гэж мэдэгдсэн.

Энэ нь уг хуулийн 21.3-т ДНБ-д эзлэх өрийн хэмжээ 60 хувиас ихгүй байх гэсэн өгүүлбэрээр туссан тухай Н.Энхболд хэлсэн билээ.

УИХ-аас Төсвийн тогтвортой байдлын тухай хуульд өөрчлөлт оруулах тухай хуулийн төслийг хүлээн авах боломжгүй хэмээн үзэж, Засгийн газарт буцаачихсан байхад эцсийн найруулгадаа засагдаж орж ирсэн Засгийн газрын буруу юу, санаатай засвар байсан уу гэдгийг бүлгийн дарга онцолсон.

Энэ талаар Төсвийн байнгын хорооны дарга Ц.Даваасүрэнгээс тодрууллаа.

-Монгол Улсын ДНБ-д эзлэх өрийн хэмжээ 40 хувь байхаар УИХ-ын нэгдсэн чуулганаар баталсан. Гэтэл өнгөрөгч баасан гаригийн чуулганаар Төсвийн тухай хуулийн эцсийн найруулгыг сонсох үед ДНБ-д эзлэх өрийн хэмжээ 60 хувиас ихгүй байна гэж мэдэгдсэн тухай МАН-ын бүлгийн дарга мэдэгдсэн. Энэ ямар учиртай юм бэ?

-Төсвийн тогтвортой байдлын тухай хуулиараа Монгол Улсын ДНБ-д эзлэх өрийн хэмжээ 40 хувь байхаар баталсан. Харин Сангийн сайдын үр дүнгийн үзүүлэлт дотор 60 хувь хүртэл гэж заасан байгаа.

Төсвийн тогтвортой байдлын тухай хууль 40 хувиараа үлдсэн.

Үүнийг л ташаа ойлгосон бололтой. Тиймээс Төсвийн тогтвортой байдлын тухай хууль 40 хувиараа үлдсэн. Тиймээс хуулийнхаа заалтаар хязгаарлагдаад явчихна.

-МАН-ын бүлэг ойлголтын зөрүүтэй байна гэсэн үг үү?

-МАН-ынхан ташаа ойлгосон байна лээ. Төсвийн тогтвортой байдлын тухай хуулиараа энэ харилцаа зохицуулагдана. Сангийн сайдын ирэх жил хийх ажлын зорилтот түвшинд заасан байгаа. Тиймээс хууль нь хэвээрээ байгаа гэдгийг ахин хэлэх хэрэгтэй байна.

Ц.Даваасүрэн: Төсвийн тогтвортой байдлын тухай хууль 40 хувиараа үлдсэн, МАН-ынхан ташаа ойлгосон байна