Нийслэлийн боловсролын газрын дарга Ц.Отгонбаганатай цаг үеийн асуудлаар ярилцлаа.

 -Нийслэлийн сурагчдын амралт эхэлсэн. Хэзээнээс бага ангийн сурагчдын сар амрааж байхаар болов?  

-Өнгөрсөн жилээс нийслэлд байгаа бага ангийн сурагчдын нэг сарын хугацаатай амраадаг журам гарсан. Энэ журам энэ жилээс шинэчлэгдэн 1-5 ангийн сурагчдыг хамруулахаар өргөжсөн. Эдгээр сурагчид маань таван долоо хоног буюу нэгдүгээр сарын 26 хүртэл амарна. Мөн дунд ангийн сурагчид өнөөдөр хичээллээд амрах бол ахлах ангийн сурагчид ирэх долоо хоногт хичээллэн 14 хоног амран 26-нд III улирлын хичээл эхэлнэ.

 -Сурагчдын амрах хугацааг юуг харгалзан үзэж харилцан адилгүй тодорхойлдог юм бэ?

-Мэдээж сургалтын төлөвлөгөөний дагуу явдаг. Бага ангийн сурагчдын хувьд өвлийн ид хүйтрэлийн үеэр илүү зутардаг учраас амралтыг нь арай олон хоног байхаар тусгасан. Мөн хүйтнээс үүдэлтэй өвчлөл, ханиад, томуу гарч байгаатай холбоотойгоор өвчлөлөөс урьдчилан сэргийлэх бодлогыг барьж байгаа. Хэдийгээр амралтын хугацаа өмнөх жилүүдийнхээс урт байгаа ч хичээлийн ерөнхий төлөвлөгөөнд өөрчлөлт ороогүй. Хавар нэг долоо хоногоор сунгаж хичээллэхээр зохицуулсан.

 -Багш нарыг индексжүүлэх гэдэг асуудал яригдаад байгаа. Өөрөөр хэлбэл хийж байгаа ажлаар нь ямар байдлаар үнэлэх үү гэдэг томоохон өөрчлөлт орж байгаа гэж дуулсан. Үүнийг танилцуулж өгөхгүй юу?

-Өнгөрсөн жил анх удаа Нийслэлийн иргэдийн төлөөлөгчдийн хурлаас нийслэлийн ерөнхий боловсролын сургууль, цэцэрлэг нарын багш нарын үйл ажиллагааг үнэлж дүгнэхдээ индексжүүлэх тогтолцоог бүрдүүлэх гэдэгт нийт нэг тэрбум төгрөгийг баталсан. Үүний дагуу өнгөрсөн онд гурван шаттай энэ ажлыг зохион байгуулсан.

Эхлээд тавдугаар ангийн багш нарын дунд чанарын шалгалт авч нийт 50 багшид 100 сая төгрөг буюу хамгийн дээд тал нь нэг багшид таван сая төгрөг урамшуулал болгон олгосон. Хоёр дахь шатанд бусад мэргэжлийн багш нарыг мөн адил индексжүүлж, хамгийн өндөр индекстэй байгаа 178 багшид нийт 438 сая төгрөгийн урамшуулал олгох болсон. Энэ бол багш нарын үйл ажиллагааг Нийслэлийн удирдлагын зүгээс бодитойгоор үнэлж байгаа ажлыг анх удаа зохион байгуулсан юм. 2014 онд энэ жил үргэлжлээд хийгдээд явна.

 -Индексжүүлэхэд ямар ажлуудыг нь үнэлж, дүгнэдэг вэ?

-Өмнө нь багш нар хийсэн ажлаа бичгээр тайлагнан түүнийг нь үнэлж, дүгнэн урамшуулал олгодог байсан ч ийм хэмжээний мөнгөн урамшууллыг анх удаа олгож байгаа. Бид нарын индексээр дүгнэж байгаа тогтолцоо гэдэг маань нэлээд олон үзүүүлэлтээр шүүж байгаа бөгөөд тэр дундаа сурагчдын сурлагын ахиц яаж гарч байгааг голлон харж дүгнэж байгаа. Өнөөдөр сайн багш гэдэг бол тодорхой тооны хүүхдүүдийг улсын олимпиадад оролцуулахаасаа илүүтэй ангийнхаа хэдэн хүүхдийг ямар ахицтайгаар ахиулж чадсан бэ гэдэг үзүүлэлтийг гол болгож байгаа.

 -Нэлээд их мөнгөөр урамшуулал олгоод эхэллээ. Ингэснээрээ та нар багш нараас ямар үр дүнг хүлээж байна вэ?

-Тухайлбал бид нар тавдугаар ангийн багш нарын дунд чанарын шалгалт гэж аваад нийт ангийн хүүхдүүдийн онооны дунджаар байр эзлүүлж хамгийн өндөр оноо авсан анги  даасан багш нарт таван сая хүртэлх төгрөгийн урамшуулал олгосон. Үүний гол зорилго, бодлого бол багш нарын ажилдаа төлөвлөгөө  тавин түүндээ хүрэх үүнийг нь үнэлэн урамшуулах юм. Энэ урамшууллын хэмжээ цаашид нэмэгднэ.

 -Сургалтын чанарын асуудлыг тойрсон яриа багагүй гардаг. Энэ индексжүүлэх ажлын хүрээнд сургалтын чанар ямар хэмжээнд дээшилнэ гэж та бүхэн тооцоолж байгаа вэ?

-Өмнө нь сургалтын чанарыг тухайн ангид А, В сурч байгаа хүүхдийн тоогоор багш, сургуулийн чанарын асуудлыг үнэлдэг, ярьдаг байсан бол одоо хүүхэд бүрийн хөгжлийн асуудал, сургалтын ахицын асуудлаар ярьж байгаа. Өнөөдөр бидний явуулж байгаа ажлын гол зорилго бол тухайн хүүхэд юунд авьяастай байна цаашид яаж амьдрах чадвартай вэ гэдгийг нээн илрүүлж, хөгжүүлэх, ахиц гаргах гол зорилго тавьж буйгаараа онцлогтой.

 -Нийслэлд сургууль, цэцэрлэгүүдийн хүртээмж хангалтгүй хэвээр байгаа. 2014 онд шинээр сургууль, цэцэрлэг барихад танай газраас хэрхэн анхаарч ажиллах вэ?

-Нийслэлийн боловсролын салбарын хамгийн тулгамдаж байгаа асуудал бол сургууль, цэцэрлэгийн хүртээмжийн асуудал байгаа. Өнгөрсөн жил бид төрийн өмчийн 25 цэцэрлэгт сэрүүн өрөөг нийслэлийн хөрөнгө оруулалтаар засварлах болон төрийн бус цэцэрлэгийн тусгай зөвшөөрөл олгох ажлыг хөнгөвчилж, гурван удаа шинжээчийн баг ажиллаж оны өмнө 23 цэцэрлэгт тусгай зөвшөөрөл олгосон.

Ингэснээр 2013 онд зөвхөн төрийн бус 85 цэцэрлэгт тусгай зөвшөөрөл олгосон. Ингэснээр энэ онд өнгөрсөн жилийнхээс таван хувиар нийслэлийн хүүхдийн цэцэрлэгийн хамрагдуулалтыг нэмэгдүүллээ. Энэ ажил 2014 онд үргэлжлэн нийслэлд 73 сургууль, цэцэрлэг, дотуур байр, спортын заалны барилга улсын төсөв, нийслэлийн төсөв, Дэлхийн банкны санхүүжилтээр баригдаж эхэлнэ.

Энэ онд сургууль, цэцэрлэгийн цогцолбор барих ажил бодитойгоор эхэлж байгаа бөгөөд энэ чиглэлээр нийслэлээс 22 сургууль, цэцэрлэг үүнд 16 нь цогцолбор байдлаар барилга баригдахаар төсөв мөнгө, зураг нь хийгдээд бэлэн болж байгаа. Үүнийг энэ ондоо багтаан ашиглалтанд оруулахаар ажиллана.

 -Ингэснээр сургууль, цэцэрлэг завсардаад байгаа хүүхдүүдийн хэдэн хувь нь хамрагдах боломжтой вэ?

-Сургууль завсардсан хүүхдүүдийг бид албан бус сургалтын төвөөрөө дамжуулан сургадаг. Энэ ажил жил бүр тодорхой хувиар буурдаг. Одоо яригдаж байгаа сургууль, цэцэрлэг баригдсанаар өнөөдөр гурван ээлжээр хичээллэж байгаа 20 гаруй сургууль, анги дүүргэлт нь 52 хүрээд байгааг цөөрүүлнэ. Бид бага, дунд, ахлаг сургуулийг төрөлжсөн байдлаар байгуулах, тэр дундаа гэр хороололд бага сургуулиудыг барих бодлого явуулж буйгаараа онцлогтой.

 -Ярилцсанд баярлалаа.