Тэтгэвэр авдаг ахмадуудын 90 хувь нь тэтгэврийн зээлтэй байна гэж Монголын Ахмадын Чөлөөт Холбоо мэдэгдлээ. Өнгөрсөн жилийн хугацаанд тус холбоо орон нутагт амьдарч байгаа ахмадуудын ахуй байдалтай танилцаад иржээ.

Аль нэг газраа жагсаал, цуглаан зохион байгууллаа гэхэд ахмадуудыг цуглуулж, хэд гурван төгрөгөөр лоозон бариулж зогсоодог үзэгдэл бий. Энэ мэтээр хөгшдүүдийг улс төрийн золиос болгож байгааг Монголын Ахмадын Чөлөөт Холбооноос шүүмжилж байгаа юм. Бас нэг жишээ хэлэхэд Дундговь аймгийн Хулд сумын Ахмадын холбоо гэхэд намын дор үйл ажиллагаа явуулдаг байна. Монголын Ахмадын Холбоо нэрээр улс төрийн үйл ажиллагаа явуулж байгаа холбоо ахмадуудыг ингэж ашиглах мөртлөө тэдний өдөр тутмын хэрэгцээ шаардлагад төдийлөн анхаардаггүй нь ялангуяа хөдөө орон нутагт илүү харагдаж байгаа юм.

Монголын Чөлөөт Ахмадын Холбооны тэргүүн Г.Баасан:  “Хэнтий аймгийн ахмадын холбооноос  бид МАЧХ-ны  ажлыг шинэчилж хийх шийдвэр гаргасныхаа төлөө буруудаад Монгол улсаасаа урвасан нэр авчихаад байна гэдэг албан бичиг бидэнд ирүүлсэн. Эндээс харахад Монголын Ахмадын Холбоо гэдэг байгууллага өөрөө ахмад настны ажлыг шинэчилье гэхэд эх орноосоо урвасан хэмжээнд үзэж байдаг ямар учиртай байгууллага болохыг судлаад үзэхэд энэ байгууллага аргагүй өмнөх намын улс төрийн байгууллага байжээ. Энэ ч утгаараа төсвийн мөнгийг үргүй зарцуулж, ахмадуудыг ялгаварлан гадуурхаж, улс төрийн золиос болгож ажиллаж иржээ гэдэг итгэл үнэмшлийг бид олж авсан.”

Монголын төр ахмадуудын тэтгэврийг 10, 20 хувиар нэмэхээс цааш өөр бодитой зүйл хийхгүй байгаа.

МАЧХ өнгөрсөн жилийн туршид хөдөө орон нутагт ахмадуудын амьдрал ахуйтай танилцаж яваад ирсний дүнд Монголын төр ахмадуудын тэтгэврийг 10, 20 хувиар нэмэхээс цааш өөр бодитой зүйл хийхгүй байгаа гэж дүгнэжээ. Наад зах нь 2005 онд батлагдсан ахмад настны нийгмийн хамгааллын тухай хуулийг зорилтот бүлэг нь мэдэхгүй гэж хариулсан байна.

Энэ хуулийн хэрэгжилт амьдрал дээр үр дүнгээ өгөхгүй байгаа учраас дахин шинэчлэх асуудлыг ч МАЧХ хөндөх юм. Хөдөө орон нутагт ахмадуудын ихэнх нь амралт, сувилалд явах, нүүрс түлээ авах зэрэг арын хаалга гэдэг том хаалгаар заавал орж байж бүтдэг гэдгийг ч хэлсэн байна. өнгөрсөн хугацаанд манай улсын бүтээн байгуулалт, хөгжил цэцэглэлтэд их, бага хэмжээгээр хувь нэмрээ оруулж амрах чөлөөгүй ажиллаж ирсэн ахмадууд одоо шагнал урамшуулал ч үгүй, үнэлэгдэх үнэлэмж ч үгүй, амьдрал ахуй тааруу, багахан тэтгэвэр, нүүрс, хоолны талон зэргээр өөрсдийгөө аргацааж байгааг МАЧХ-ноос хөндөн гаргаж байгаа юм.