Монгол Улсын төрөөс хүн амын өсөлтийг дэмжих, олуулаа болох хөгжлийн цогц бодлого боловсруулан хэрэгжүүлж буй цаг үетэй давхцан хүн ам зүйн статистикийн тооцооллоор 2015 оны нэгдүгээр сарын 24-ний өдөр Монгол Улсын Гурван сая дахь иргэн мэндэлсэн билээ.

Д.Золбаяр хүүг 70 сая төгрөгөөр урамшууллаа.

Тэгвэл Хан-Уул дүүргийн 6 дугаар хорооны иргэн Жаргалсайханы Даваасүрэнгийн хүү Золбаяр нь Монгол Улсын Гурван сая дахь иргэнтэй хамгийн ойр /2015 оны нэгдүгээр сарын 24-ний өдрийн 14 цаг 25 минут/ мэндэлсэн чацуутнаар тодорчээ. Иймд 70 сая төгрөгийн мөнгөн шагналаар шагнаж алдаршуулах арга хэмжээг өчигдөр дүүргийн ЗДТГ-аас зохион байгууллаа.

Тус арга хэмжээнд Хан-Уул дүүргийн Иргэдийн төлөөлөгчдийн хурлын дарга Д.Батбилэг, Засаг дарга Ж.Ганхуяг, Иргэдийн хурлын тэргүүлэгч О.Батхуяг, Тамгын газрын дарга Д.Бат-Очир, Нийгмийн хөгжлийн хэлтсийн дарга Б.Булган, Статистикийн хэлтсийн дарга О.Гэрэл, 6-р хорооны Засаг дарга Г.Золбаяр болон бусад хэлтэс албадын дарга нар оролцлоо.