Баримт бичигт гарын үсэг зурсны дараа МУ-ын Ерөнхийлөгч Ц.Элбэгдорж, БНЭУ-ын Ерөнхий сайд М.Сингх нар сэтгүүлчдэд хандан мэдээлэл хийлээ.


Ерөнхийлөгч Ц.Элбэгдорж “ Миний бие Монгол Улсын Ерөнхийлөгчөөр сонгогдсоны дараа анхны гадаад айлчлалаа БНЭУ-аас эхэлж байгаадаа баяртай байна. Энэ нь ч бас учиртай юм. Энэтхэг бол дэлхийн хамгийн том ардчилсан орон, манай гуравдахь хөрш, энхийг тууштай эрхэмлэгч гүрэн. Мөн дэлхийд хөгжлөөрөө тэргүүлэх эгнээнд гарч ирж буй БРИК-ийн дөрвөлийн нэг. Тиймээс бид олон тулгуурт гадаад бодлогынхоо хүрээнд Энэтхэгтэй харилцах харилцаандаа стратегийн ач холбогдол өгдөг юм.

Сая би Ерөнхий сайд М.Сингхтэй үр дүнтэй, агуулга дүүрэн хэлэлцээг амжилттай хийлээ. Бид Монгол Энэтхэгийн харилцаанд сүүлийн жилүүдэд гарсан ахиц дэвшилд сэтгэл хангалуун байгаагаа тэмдэглэж, мөн үнэлгээ дүгнэлт өгч, хамгийн гол нь цаашид хамтран хэрэгжүүлэх тодорхой асуудлуудаа хэлэлцэж тохирлооо.

2000 гаруй жилийн түүхтэй оюун санаана түншлэлээ бид эдүгээ орчин цагийн хэрэгцээ шаардлагын дагуу шинэлэг агуулгаар баяжуулж, улмаар ирээдүйд чиглэсэн иж бүрэн түншлэлд хүргэхээр тохирлоо. Тухайлбал, худалдааг нэмэгдүүлэх, Монголын уул уурхайн салбарт Энэтхэгийн оролцоог бий болгох, ХАА-н хамтын ажиллагааг өргөжүүлэх, хамгийн гол нь мэдээлэл холбооны технологийн салбарт далайцтай, урт хугацааны хамтын ажиллагааг эхлүүлэхээр ярилцсанаа онцлон тэмдэглэмээр байна.

Цөмийн эрчим хүчийг энхийн зорилгоор ашиглахад хамтран ажиллах тухай харилцан ойлголцлын санамж бичигт гарын үсэг зурсан нь олон улсын ач холбогдол бүхий хамтын ажиллагааны эхлэл болно гэж үзэж байна. Энэтхэгийн тал манай улсын хүний нөөцийн хөгжлийг хангах, төр засгийн байгууллагуудын чадавхийг дээшлүүлэхэд анхаардаг Энэтхэгийн техникийн хамтын ажиллагааны хөтөлбөр АйТек жилд олгож байгаа тэтгэлгийнхээ хэмжээг 2 дахин нэмэгдүүлж байгаад баяртай байна. Өнөөдөр гарын үсэг зурсан эрүүл мэндийн салбарт хамтран ажиллах хэлэлцээ нь манай хоёр орны хооронд дорны уламжлалт эмчилгээний чиглэлээр эрдэмтэн судлаачид солилцох, эм үйлдвэрлэлийн талаар хамтран ажиллах зэрэг өргөн боломжийг нээж байна. Соёл боловсрол, статистик, батлан хамгаалах, аюулгүй байдлын салбарт харилцаа өргөжин хөгжиж байгааг тэмдэглэн хэлье.

Олон улсын тавцанд ч манай хоёр орны харилцан ойлголцол, бие биенээ дэмжсэн үйл ажиллагаа цаашид ч бэхжинэ. Тухайлбал, БНЭУ-ыг НҮБ-ын АЗ-ийн байнгын бус гишүүний 2011-2012 оны сонгуульд нэрээ дэвшүүлснийг Монгол Улс дэмжихээ илэрхийллээ” гэлээ.

БНЭУ-ын Ерөнхий сайд М.Сингх: “ Эрхэмсэг ноён Ерөнхийлөгч Цахиагийн Элбэгдорж анхны гадаад айлчлалаа манай улсаас эхлүүлж байгаад бид баяртай байна. Энэ бол хоёр орны харилцааг хэрхэн үнэлж, дүгнэж байгаагаа харуулж байгаа хэрэг. Бид хоёр орны харилцааны хүрээнд тодорхой асуудлуудаар яриа хэлэлцээ хийлээ. Энэтхэг Улс, Монгол Улсын харилцааг иж бүрэн түншлэлийн түвшинд хүргэхийг харилцан тохирсныг мэдэгдэхэд таатай байна. Монгол Улсад бид мэдээллийн технологийг хөгжүүлэх, энэ чиглэлийн мэргэжилтэн бэлтгэх талаар тусалсаар байх болно. Манай талаас Монголд уул уурхай, хөдөө аж ахуйн салбарт хамтран сонирхлоо илэрхийллээ. Хоёр орны харилцаа мөн батлан хамгаалах, аюулгүй байдлын салбарт ч эрчимжиж байгаа. Эрхэмсэг ноён Ерөнхийлөгч , намайг эх орондоо айлчлахыг урьсанд талархаж байна. Танай сайхан оронд айлчлахдаа би баяртай байх болно” гэлээ.