УИХ-ын Тамгын газар, Баян-Өлгий аймгийн ЗДТГ-ын хамтран зохион байгуулсан онлайн теле-ярилцлага өнөөдөр боллоо. Ярилцлагад тус аймгаас сонгогдсон УИХ-ын гишүүн Х.Баделхан, Х.Жекей, А.Телейхан, УИХ-ын Тамгын газрын Нарийн бичгийн дарга С.Магнайсүрэн, аймгийн ИТХ-ын дарга Х.Баян, Засаг дарга С.Хавал болон бусад албаны хүмүүс, иргэдийн төлөөлөгчид оролцов.

Теле-уулзалтаар “Баян-Өлгий аймгийн ерөнхий боловсролын сургуулиудын сургалтын өнөөгийн байдал, сургалтын чанарыг сайжруулах талаар цаашид авах арга хэмжээний тухай, Малчдын талаар төрөөс баримтлах бодлого, “Эх орны хишиг” “Эрдэнийн хувь”гэсэн сэдвийг хөндөж өргөн хүрээнд ярилцлагыг өрнүүллээ.
Боловсрол, эрүүл мэндийн салбарт шийдвэрлэвэл зохих нэлээн асуудал байгааг аймгаас оролцсон төлөөлөгчид ярилаа. Тухайлбал, аймгийн хэмжээнд багш илүүдэлтэй байгаа бөгөөд энэ нь зөвхөн багшийн коллеж төгссөн багш нар бус өөр сургууль төгссөн багш нар байдаг. Нэгэнт бэлтгэгдсэн багш нарыг ажлын байртай болгох хэрэгтэй байна. Эдгээр олон багш нарын сургууль төгссөн диплом, бичиг баримтад шалгалт хийх шаардлагатай байгаа. Мөн олон улсын түвшинд эх хэлээ сайн эзэмшиж байж хоёр дахь хэлийг суралцдаг.Үүн дээр анхаарах шаардлагатай байгааг дуулгасан. Мөн аймгийн хэмжээнд багш нарыг гурван үе шаттайгаар аттестатчилж эхэлсэн бөгөөд ерөнхий боловсролын захирал, цэцэрлэгийн эрхлэгч нар хуулиар таван жил ажиллаад нэмэгдэл авдаг, төрийн захиргааны албан хаагч болдог асуудлууд энд хаягдсан байгааг ярьж энэ тал дээр анхаарч үзэхийг хүслээ.

УИХ-ын гишүүдийг тойрогтоо ажиллах үеэр боловсролын салбарын талаар, ялангуяа багшийн коллежийн асуудлаар иргэдээс ихээхэн гомдол гарч байсныг гишүүд хэлээд, Багшийн коллежийг хаахгүй харин тэнд ажиллаж байгаа багш нарын мэдлэг мэргэжил, хариуцлагыг сайжруулах, чанартай боловсон хүчин бэлтгэх хэрэгтэй гэсэн юм. Түүнчлэн аймгийн боловсролын салбарыг сайжруулах талаарх саналаа БСШУ-ны сайдад тавиад байгаа бөгөөд энэ чиглэлээр судалгаа явуулж судалгааны дүнд сургалтын талаар төрийн бодлогыг хэрэгжүүлэх тал дээр хангалтгүй, сурах бичиг хүрэлцээгүй, шаардлага хангахгүй, багш нарын идэвх санаачилга муу, монгол хэлний сургалтын чанар муу, ялангуяа багш нарын монгол хэлний мэдлэг тааруу зэрэг дүгнэлт гарсныг хэлсэн. Цаашид дээрх асуудлуудад аль аль талдаа анхаарч, бодит ажил хийх шаардлагатай байгаад ярилцлагад оролцогсод санал нэгдлээ.

Ярилцлагын бас нэг сэдэв болох Малчдын талаар төрөөс баримтлах бодлогын хүрээнд уулзалтад оролцогсод санал солилцлоо.

Өнгөрсөн жил тус аймаг түүхэнд байгаагүй их мал тоолуулсан байна. Малчид өөрөөс шалтгаалах бүхнийг хийсэн бөгөөд одоо мал борлуулах зах зээлийн асуудал тулгараад байгааг хэллээ. ОХУ бог мал авах сонирхол бага үхрийн мах авах сонирхолтой байдаг. Иймд бог мал борлуулах зэх зээл хэрэгтэй байгааг хэлж энэ тал дээр анхаарч өгөхийг хүслээ. Дундад азийнхан хонины мах их хэрэглэдэг. Бид ОХУ, Казахстанруу мал гаргаж байсан түүхэн туршлагатай. Энэ асуудалд анхаарч байна. Цаашид малыг хөлөөр нь гаргах бус эцсийн бүтээгдэхүүн болгон боловсруулж гаргах нь ашигтай хэмээн үзэж байгаа. Цаашид малын чанарыг сайжруулах, дотооддоо мал, мах бэлтгэх асуудалд анхаарах шаардлагатайг гишүүд хэллээ.

Мөн “Эх орны хишиг сан”,”Эрдэнийн хувийн /Баянмонгол корпораци/ тухай хуулийн төслүүд УИХ-ын чуулганаар хэлэлцэгдэж эхлээд байгааг гишүүд хэлж бодит үр дүн удахгүй гарч хэрэгжиж эхлэнэ гэдгийг танилцуулсан юм.

Эцэст нь эвт шаазгай буга барина гэдэгчлэн өнөөдрийн тулгамдсан асуудлыг хамтын хүчээр шийднэ гэдэгт итгэлтэй байгаагаа уулзалтад оролцогсод хэлж цаашид ярилцсан асуудлуудыг ажил хэрэг болгоход хаана хаанаа анхаарч ажиллах нь зүйтэй гэж үзлээ.