БШУ-ны сайд Л.Гантөмөрийн  үндэс­ний  шил­дэг татвар төлөгч 100 компанид илгээсэн захиа сониуч заримыг алмай­руулж, сэргэг нэгнийх нь урмыг бадраав.

Хөрөнгө нөөц, хүн хүчний чадавхи сайтай том компаниудыг “Гэрэл тусгая” хөдөлгөөнд нэгдэж нийгмээ гэгээрүүлэх үйлсэд хамтран ажиллахыг уриалснаараа БШУ-ны сайд өнөөдөртөө хамгийн  мэдрэмжтэй сай­даар тодроод байгаа.

Л.Гантөмөр  сайдын за­хианы агуулга нь ажил­лагсаддаа  зориулан та­нин мэдэхүйн  лекц, уулзалт  зо­хион байгуулах, үр хүүх­дүүдийнх нь сурч боловсрох анги танхимыг ши­нээр байгуулах, шинжлэх ухааны сонирхолтой ном товхимол, баримтат кино орчуулан  түгээх зэрэг ажлыг ивээн тэтгэж шинэ  санаа, оноо гарган ажиллахыг уриалжээ. 

Мухар сүсэг бишрэл тү­гээн дэлгэ­рүүлэх, түүн дээр дөрөөлсөн зали­лан мэх­лэх явдал хавтгайрч, хүн  амын эрүүл мэнд, Мон­гол Улсын эдийн засагт ч багагүй хор хохирол  уч­руулж  бай­гаагийн эсрэг тэмц­лийн гол арга зам нь  шинжлэх ухааныг түгээн дэлгэрүүлэх, танин мэдэх сонирхлыг тэтгэх ажил гэж БШУ-ны сайд Л.Гантөмөр үзэж байгаагаа захидалдаа тодорхой дурьдсан нь учиртай.

Арвин   ургац  хураая гэвэл  үзмэрч,  тар­ничийг  бус  сайн агро­номич, өнтэй өвөлжихийн тулд  сан  тавиулж хийморийн дарцаг хийсгэхээс илүүтэй ахиу­хан өвс хадлан базаах зэрэг мэдлэг, арга ухааныг  түлхүү хэрэглэх шаардлага нийгмийн өмнө тулгамдаад байгааг сануулжээ.

Тавхан сарын өмнөх 2012 оны 12 дугаар сарын 21-нд  Орифлеймчин  авгай дэлхий сөнөнө гэж цуурахад олон нийтийн  30 хувь нь итгэсэн буюу эргэл­зэн тээнэгэлзэж байсан, Хөвсгөлийн Галтад гэнэтхэн нэг хүүхэн бурханаар бөөл­жөөд унасан тухай мэ­дээл­­лийг сай­тар нягтлан  шалгалгүйгээр түгээснээс болоод зальт этгээдүүд нийг­­мийн сэтгэл зүйгээр то­хуурхаж, учруулсан хохирол нь багадаагүй.

Зарим нэг үл бүтэх этгээд залилан мэхлэх ажиллагаа нь үр дүнд хү­рэхгүй болохоор санаатай гэмт хэрэг үйлдэх болсон. Жишээлбэл Сэлэнгэ аймагт өргөл барьц сайн өргөхгүй бол удахгүй ихээхэн хэмжээний гай тотгор тохиолдоно гэсэн үгэнд нь итгээгүй айлд нөгөө мэргэн үзмэрч маань шөнө явж очоод машиныг нь шатаасан, хир тортогтоо баригдсан нэгэн бөө залуу хүүг халуун усаар шалзалж амьдаар нь болгох дөхсөн зэрэг хорлонтой хэрнээ гашуун инээд дагуулсан гэмт хэрэг олон гарах болжээ.

БШУ-ны сайд  Л.Ган­төмөр энэ бүх­нийг захиандаа дурдаад “Арвин   ургац  хураая гэвэл  үзмэрч,  тар­ничийг  бус  сайн агро­номич, цаг агаарын үнэн зөв мэдээг ашиглах, өнтэй өвөлжихийн тулд  сан  тавиулж   хийморийн дарцаг хийсгэхээс илүүтэй ахиу­хан өвс хадлан базаах зэрэг мэдлэг, арга ухааныг  түлхүү хэрэглэх” шаардлага нийгмийн өмнө тулгамдаад байгааг сануулжээ.

Буддын шашны тэргүүн ХIV Далай лам ч “Шашин бол ид шид биш. Би шинжлэх ухаанд итгэж, шаш­наа  сэтгэлээ ариусган жо­лоодох, бусдыг энэрэн хайрлахуйн  төлөө шүтэх болно” хэмээн айлдсаныг монголын томоохон 100 компанид илгээсэн захидал­даа дурдаж хамтран ажил­лахыг уриалжээ.

Шинжлэх ухаанч сэтгэ­хүйгээр монголын ирээдүй болсон хүүхэд, залуусын тархи толгойг цэнэглэх их ажлыг томоохон 100 аж ахуйн нэгжтэй хамтран эхлүүлж, хэрэгжүүлэхээр зо­риг шулуудсан БШУ-ны сайд  Л.Гантөмөрийн за­хидлын хариуг баян, чи­­­нээлэг компанийн эзэд хэр­хэн хариу­лахыг чих та­вин хүлээх л үлдлээ. Цаг хугацаа бүхнийг харуулна.