“Хөгжлийн хэлхээ” ТББ-ын тэргүүн А.Долгортой тус байгууллагын хамтын ажиллагааны талаар ярилцлаа.

-Төрийн байгууллагууд төрийн бус байгууллагуудтайгаа хэр харилцаа холбоотой ажилладаг вэ?

-Бид нар л үйл ажиллагаагаа танилцуулахгүй бол цаанаас төдийлөн дэмждэггүй. Одоо Баянзүрх дүүргийн хүүхэд, гэр бүл хөгжлийн төв нээгдээд бие биетэйгээ хамтран ажиллах талаар санал дэвшүүлээд байна.

-Ер нь ТББ-уудыг төрөөс ямар бодлогоор дэмжээсэй гэж хүсч байна вэ?

-Манай улс төсөл хөтөлбөр сайтай, хөтөлбөрүүд маш их батлагдсан байдаг ч мөнгө байдаггүй. Миний хамгийн их хүсдэг зүйл гэвэл манайх өдрийн үйлчилгээ үзүүлээд таван жил болж байгаа ч энэ хооронд улсын дэмжлэг авч чадахгүй явж байна.

Нийгмийн халамжийн хуулин дээр олон нийтийн оролцоонд түшиглэсэн халамжийн үйлчилгээ гээд дотроо арван төрлийн үйлчилгээ байдаг. Энэ үйлчилгээнүүдийг зорилтот бүлэгтээ хүргэж чадвал болохгүй зүйл байхгүй. Мөнгө нь батлагдаад зорилт нь заагдсан ч авч болохгүй нь сонин байгаа.

Анх намайг энэ үйлчилгээг авахаар очиход тусгай зөвшөөрөлтэй бол өгнө гэсэн. Тусгай зөвшөөрлийг нь бараг хагас жил хөөцөлдөж байж аваад үйлчилгээгээ авах гэтэл нэг хүүхдэд долоо хоног үзүүлэх үйлчилгээгээр яах юм. Одоо долдугаар сарын нэгнээс 22 хоног болохоор нь аваач гэж хойшлуулсан ч авч чадахгүй л байна.

Одоогоор өдрийн үйлчилгээ нь сэргээн засах үйлчилгээтэй хамт тендер зарлаад байгаа болохоор өдрийн үйлчилгээ дангаараа байвал зүгээр гэж бодож байгаа. Энэ талаар удирдах шатны хүмүүс анхааралдаа аваасай гэж хүсч байна.

-Бусад байгууллагуудтайгаа хамтын ажиллагаа хэр байдаг вэ?

-Хүүхэд хамгааллын сүлжээ, хүүхдийн хөдөлмөрийн тэвчишгүй хэлбэрийн эсрэг үндэсний сүлжээ, экпат сүлжээ, Хүний эрх, НҮЭМ-ийн үндэсний сүлжээ, иргэд төсвөө хянана гээд сүлжээнүүдийн гишүүн байгууллага. Сүүлийн үед төсөвт нилээн акц тавиад үзэж эхэлж байна.

Төрийн байгууллагуудаас хүүхдийн төлөө үндэсний газар, нийслэлийн хүүхэд гэр бүл хөгжлийн төв, дүүргүүдийн хүүхэд гэр бүл хөгжлийн төвүүд,. Дүүргүүдийн нийгмийн хөгжлийн хэлтэстэй нилээн тулж ажилладаг.

-Үйл ажиллагаа явуулахад учирч буй саад бэрхшээл, хүндрэлтэй зүйл юу байна вэ?

-Бидний үйл ажиллагаа мөнгөтэй мөнгөгүй явдаг. Хүмүүс энд тэндээс тусалдаг учраас манай үйл ажиллагаа тасардаггүй. Бид цалин мөнгө нэхээд суудаггүй. Ихэвчлэн манай удирдах зөвлөлийн гишүүд өөрсдөөсөө мөнгө төгрөгөө гаргаж ажлаа зохицуулдаг.

Нийслэлийн хүүхдийн газартай холбогдон гэмт хэрэгт өртсөн 15, хараа хяналтгүй 15 хүүхэдтэй ажилласан.

Ямар л боломж байна түүнийг хайдаг. Бид өрхийг тогтмол орлоготой болгоход нь тусалж ээж нарыг нь ажилтай болгоод, юм оёдог ч юм уу, амьдрах ухааны чиглэлийн сургалтуудад сурган өөрийн гэсэн ээж нарын бүлгийг бий болгох зорилготой.

Мөн хүүхдүүдийнхээ дунд наадмын дараа хувцасны шоу явуулахаар бэлдэж байгаа. Үүгээрээ дамжуулан тодорхой хэмжээний орлого бүрдүүлнэ. Манай байгууллагын хамгийн том ололт бол өөрсдөө ажил хийж олсон мөнгөөрөө үйл ажиллагаагаа явуулдаг.

-Санхүүжилт хаанаас хийгддэг вэ?

-Дандаа гаднаас орж ирдэг. Гэхдээ өнгөрсөн онд манайх нийслэлийн хүүхдийн төлөө үндэсний газартай хамтарч ажиллаад охид хөвгүүдийг урьдчилан сэргийлэх чиглэлээр гурван сая төгрөгийн төсөл хөтөлбөр авсан.

Хоёрт нь нийслэлийн хүүхдийн газартай холбогдон гэмт хэрэгт өртсөн 15, хараа хяналтгүй 15 хүүхэдтэй ажилласан. Үүний дагуу нийгмийн үйлчилгээ үзүүлээд тайлангаа үр дүнтэй өгсөн.

-Гэр бүлийн хүчирхийллээс үүдэлтэйгээр хүүхдийн эрх ихээхэн зөрчигддөг. Гэр бүлийн хүчирхийллийн эсрэг төвтэй хамтарч ажилладаг уу?

-Хүчирхийллийн эсрэг үндэсний төвтэй хамтарч ажилладаг. Ерөнхийдөө манайх өөрөө тийм үйл ажиллагаа явуулдаг байгууллага. Манай байгууллага яагаад байгуулагдсан гэхээр миний бие анх 1997 онд хүчирхийлэлд өртөөд, хүчирхийллийн эсрэг үндэсний төвийн хамгаалах байранд очиж үйлчилгээ авч байсан.

Тэнд байхдаа өөр шигээ олон тийм эмэгтэйг харсан. Тиймд зүгээр байгаагүй бүлгийн зохион байгуулалтад эмэгтэйчүүдийг оруулан гэр оронд нь очиж амьдралтай нь танилцаад хүчирхийлэл гарах болсон шалтгааныг тодруулж явсан нь надад нилээн ажлын туршлага болсон. Бид зөвхөн нийслэл гэхгүй хөдөө орон нутгийн хүүхдүүдтэй бас ажиллаж олон хүүхдийн асуудлыг шийдсэн.

А.Долгор: Манай улс төсөл хөтөлбөр сайтай ч мөнгө байдаггүй