Манай эрүүл мэндийн салбарын оношилж, эмчилж чаддаггүй 27 нэр төрлийн өвчин байдаг бөгөөд эдгээр өвчнөө гадаадад явж эмчлүүлэгсдэд сайдын багцаас санхүүгийн дэмжлэг үзүүлдэг юм. Гэвч энэ талаар иргэд тэр бүр мэдээлэл муутай байдаг. Иймээс өчигдөр Эрүүл мэндийн сайд дээрх шалтгаанаар туслалцаа хүссэн иргэдтэй уулзлаа.

Яаманд жилд дунджаар 250-300 дэмжлэг хүссэн өргөдөл ирдэг гэнэ. Үүний гуравны нэг нь дээрх 27 нэр төрлийн өвчнөөр өвчлөгсөд байдаг аж. Сайдын багцаас 2011 онд 98 иргэнд 400 сая, 2012 онд 147 иргэнд 513 сая төгрөг энэ оны эхний хагас жилийн байдлаар 83 иргэнд 256 сая төгрөгийг гадаад эмчилгээний зардалд олгожээ. Удахгүй 19 иргэнд 65 сая төгрөгийн дэмжлэг үзүүлэхээр болоод байгаа аж.

Хамгийн гол нь дэмжлэг хүссэн иргэд өөрсдөө тууштай хөөцөлдөж чаддаггүй, өргөдөл өгөөд л сураггүй болдог нь яамны ажилтнуудад хүндрэл учруулдаг гэнэ.

Эмчийн тодорхойлолт, эмч нарын зөвлөлгөөний шийдвэр, очиж эмчлүүлэх эмнэлгийнхээ талаарх мэдээлэл зэргийг өргөдөлдөө хавсаргадаггүй бөгөөд үүнээс болж цаг хугацаа алддаг байна.

Яаманд жилд дунджаар 250-300 дэмжлэг хүссэн өргөдөл ирдэг.

Эдгээр өвчнийг Монголдоо хэзээ эмчилдэг болох талаар Эрүүл мэндийн сайд Н.Удвал Дээрх 27 өвчнийг Монголдоо эмчлэх эхлэл болгож энэ онд бүх аймгаа телемидицины сүлжээнд холбож, алсын зайн оношилгооны аргыг нэвтрүүлэх гэж байна.

Ингэснээр шинжилгээнүүдээ Япон, Солонгосын эмнэлэг рүү явуулж тэндээсээ зөвлөгөө авдаг аргыг нэвтрүүлнэ. Гадаадаас эмчилгээ оношилгооны зөвлөгөө аваад Монголдоо эмчилдэг болохын тулд эмч нараа сургаж байна. Одоо мэдрэлийн мэс засал, зүрх судасны чиглэлээр эрүүл мэндийн яам сургалт явуулж байгаа” гэв.

Харин сайдтай уулзахаар ирсэн Сонгинохайрхан дүүргийн иргэн Н.Лхагважав “Манай хүүхдийг төрөхөд эмч нар хүйсийг нь буруу тасалснаас хүнд өвчтэй болсон. Нуруу нь цоорхой хэвтэрт байдаг. Гадаадад эмчлүүлье гэхээр дээрх 27 өвчинд орох эсэх нь тодорхой бус. Ер нь Монголд эмчлэгдэхгүй гэсэн 27 өвчин бий гэдэг.

Эдгээр өвчний нэрийг ил гаргах хэрэгтэй. Эмч нар нууцалдаг. Мөн сайдын багцаас нэг удаа дэмжлэг олгодог. Солонгост очоод хүүхдээ үзүүллээ гэхэд дор хаяж зургаан сарын дараа буцаад ир гэдэг. Ингээд зургаан сарын дараа ахиад л 50, 60 сая төгрөг хэрэг болдог. Иймээс үүнийг яамнаас анхаарч үзвэл ямар вэ” гэдгийг сануулж байлаа.

Удахгүй гадаадад эмчлүүлэх 19 иргэнд 65 сая төгрөгийн дэмжлэг үзүүлэхээр болжээ.

Өргөдөл гаргаж байгаа иргэдийн ихэнх нь мэдрэл, хавдар, эрхтэн шилжүүлэн суулгах гэсэн оношоор дэмжлэг хүсдэг байна. Түүнчлэн яаманд ирж байгаа нийт өргөдлийн 42 хувь нь хүүхдийн өвчлөлтэй холбоотой аж.

Иймээс яамны зүгээс эдгээр өвчлөлийг үүсгэхгүй байх талаар эрүүл мэндийн салбарынхан болон хувь хүн хамтран ажиллах ёстой гэдгийг онцолж байсан. Тухайн иргэн сайдын багцаас дэмжлэг авахын тулд улсын нэг, хоёр, гуравдугаар эмнэлэг, ХСҮТ зэрэг эмнэлэгт Гадаад эмчилгээний комисс гэж байдаг.

Энэ комиссоор тухайн өвчтөнийг авч хэлэлцэж гадаадад эмчлэх шаардлагатай гэсэн дүгнэлт гаргаж өгдөг байна. Тэр дүгнэлтийн дагуу Эрүүл мэндийн яамаар дамжиж, нэг хүнд ойролцоогоор 3-5 сая төгрөгийн дэмжлэг очдог ажээ.

Монголд эмчлэгддэггүй 27 өвчний нэрийг ил болгохыг хүсэв