Энэ жилийн төсөвт өрийн хэмжээг 40 хувь байхаар тогтсон. Засгийн газрын зүгээс энэ хэмжээг 60 хувь болгох санал оруулсан ч дэмжигдээгүй.

Харин сөрөг хүчний зүгээс УИХ-ын дарга, сангийн сайд нар их хурлын баталсан энэ хэмжээг 60 хувь хэмээн төсвийн тухай хуулийг засварласан гэж мэдэгдсэн.

МАН-ын бүлгийн энэ долоо хоногийн мэдээлэлд парламент олонхоороо улсын өрийг ДНБ-ны 40 хувьтай тэнцэж байхаар тогтсон. Төсвийн тухай хууль батлагдаад сар хүрэхгүй хугацаа өнгөрч байхад Засгийн газрын хүсээд байсан өрийн хэмжээг нэмэгдүүлэх 60 хувийг төсвийн хуульд тусгасан нь хууль засварласныг илтгэж байна гэж шүүмжилж байгаа юм.

УИХ-ын гишүүн, Төсвийн байнгын хорооны дарга Ц.Даваасүрэн "Төсвийн ерөнхийлөн захирагч нарын 2014 онд хэрэгжүүлэх хөтөлбөр, хүрэх үр дүн чанар болон тоо хэмжээ гэж байгаа. Үүнд сангийн сайд ямар үүрэг хүлээх бэ гэхээр өрийн хэмжээ 60 хувиас хэтрэхгүй шүү гэсэн санаа. Энэ нь 60 хувь байна гэсэн үг биш. 40 хувиар хязгаарлана, хуулийн хүрээнд мөрдөнө гэж ойлгож болно.

Хэрвээ ямар нэгэн байдлаар ДНБ-ны өсөлт унах юм бол өрийн харилцаанд өөрчлөлт орно. Тэр тохиолдолд өрийн харьцаа 60 хувиас хэтрэх юм бол сангийн яам муу ажилласан гэж дүгнэгдэх юм. Үүнийг үр дүнгийн үзүүлэлт дотор хэлж байгаа. Яг зохицуулж байгаа хууль нь төсвийн хүрээний мэдэгдэл 40 хувь байхаар бичигдсэн учир энэ хүрээнд хууль үйлчлэх  ёстой" хэмээн хэллээ.

Энэ нь нэг үгээр хэлбэл төсвийн эрхийг барьж байгаа сайд нарын ажлын гүйцэтгэлийг жилийн дараа дүгнэх нэг төрлийн шалгуур гэж хэлж болно. Хэрвээ сангийн сайд гадаад өрийг 60 хувиас хэтрүүлсэн байвал хариуцлага тосох эсэх тухай эргэн ярилцана.

Энд заасан 60 хувиас дээш гаргаж болохгүй гэдгийг дагаж мөрдөхгүй гэсэн үг юм. Төсвийн тогтвортой байдлын тухай хуульд өрийн хэмжээ 40 хувь гээд заачихсан учир Засгийн газар үүнийг зөрчиж болохгүй. Өрийн хэмжээ 40 хувьд хүрэхэд 500 сая ам.долларын зээл авах эрх Засгийн газарт байгаа юм.