Ц.Элбэгдорж: Популизмыг дэмжихгүй, бүтээгчдийг дэмжье
Бизнесменүүд улстөрчдөд авлигал өгөхгүй, сэтгүүлчид улстөрчидтэй хаалтын гэрээ байгуулахгүй байхад улс орон аяндаа хөгжинө
Монгол Улсын Ерөнхийлөгч Ц.Элбэгдорж зангиагүй, албан ёсны бус байхдаа жинхэнэ ажил хэрэгч яриа өрнүүлчихдэг. Өчигдөр орой “Туушин” зочид буудлын таван давхарт Ерөнхийлөгч Ц.Элбэгдорж зангиа зүүлгүй албан бус царайтай орж ирээд тэнд цугласан хувийн салбарынхан, хэвлэл мэдээллийн төлөөллүүдтэй жинхэнэ халуухан, бас үлдэцтэй яриа өрнүүлсэн.
Тэрбээр “Популизмыг дэмжихгүй, бүтээгчдийг дэмжье. Хэвлэл мэдээллийнхэн улстөрчидтэй хаалтын гэрээ байгуулахгүй, бизнесийнхэн улстөрчдөд авлигал өгөхгүй байхад улс орон аяндаа хөгжинө” гэсэн юм. Түүний хэлсэн энэ үг “Өнөөдрийн нийгэмд байгаа бусармаг бүхнийг би цэвэрлэх болно.
Үүний тулд тэмцэх ч болно” гэх өнгө аясыг илтгэж байсан юм. Уг уулзалтад ойролцоогоор 200 гаруй хүн цугласаны дотор Ардын уран зохиолч Т.Галсан, П.Бадарч, Монгол Улсын гавьяат жүжигчин Д.Сосорбарам, Б.Баабар, “Макс” группын Ерөнхийлөгч Ц.Ганбаатар гээд Монголдоо нэр хүндтэй ажил хэрэгч хүмүүс цугларч “Том төрөөс ухаалаг төр рүү” шилжих шилжилтийг жинхэнэ ажил хэрэг болгохын төлөө үгээ хэлж, нэмэрлэх саналаа дайв.
Цагаан сарын өмнөхөн ээлжит амралтаа аваад таран алга болдог УИХ-ын 76-ааг яаруулан байж “Том төрөөс ухаалаг төр рүү” шилжихэд зайлшгүй шаардлагатай 13 хуулийг амжуулан батлуулахаа Ерөнхийлөгч амласан юм. Үлдэж байгаа хоёр жилд Монголын төрийг цэвэрлэж амжина гэдгээ тэр шулуухан мэдэгдэж “Би Монголын түүхэнд сайн нэртэй Ерөнхийлөгчийн хувьд үүрд үлдэхийг хүсч байна.
Ард түмнийхээ ирээдүйн сайн сайхны төлөө би хоёр дахь хувьсгалаа эхлүүлж байна. Түүнийгээ ч ажил хэрэг болгоно” гэлээ. Бид ийм л эх оронч, жинхэнэ ард түмнээсээ сонгогдсон Ерөнхийлөгчтэй улс юм гэж бахарахлаа. Ц.Элбэгдорж хоёр дахь хувьсгалаа эргэлт буцалтгүй эхлүүлжээ. Одоо түүнийг зогсоох хүч байхгүй. Харин эхлүүлсэн хувьсгалыг нь түрхрэн дэмжих ард түмэн нь бий. Түүнд итгэсэн шиг итгэж, дэмжсэн шиг дэмжье.
