Дэлхий дахиныг хамарсан санхүүгийн хямралаас шалтгаалан Монгол Улсын дотоодод үүсэж болзошгүй хүндрэл, бэрхшээлийг даван туулахын тулд гадаадын хөрөнгө оруулалт, санхүүжилтийг татах, олон улсын банк, санхүүгийн байгууллага, хандивлагч орнуудын дэмжлэгийг авах нь чухал байна. Энэ чиглэлээр УИХ, Засгийн газар хамтран ажиллах нь зүйтэй" гэсэн саналыг УИХ дахь Монгол-Японы парламентын бүлгийн хэсэг гишүүн Засгийн газарт тавьсан тухай, хариуд нь Ерөнхий сайд С.Баяр "Бэрхшээл хүндрэлийг даван туулахад гадаад харилцааны хүчин зүйл, түүний дотор Япон улстай тогтоосон харилцааны давуу талыг ашиглах, боломж бололцоог бодит ажил хэрэг болгох талаар санаа тавьж, чухал санаачилга гаргасан гишүүдэд талархал илэрхийлэв" хэмээсэн албаны мэдээ сонины хаягаар ирсэн. Засгийн газарт тавьсан саналынх нь талаар УИХ дахь Монгол-Японы парламентын бүлгийн дарга Д.Ганхуягаас тодрууллаа.

-Япон улсаас дэмжлэг авах боломж хэр  нээлттэй  гэж та  бүхэн  үзэж  ийм санаачилга гаргасан бэ?

-Монгол Улс хямралыг хохирол багатай давахын тулд олон улсын санхүүгийн байгууллага, хандивлагч орнуудын дэмжлэгтэйгээр гадаадаас хөрөнгө оруулалт, санхүүжилт татах ёстой. Манай Улсад нэн шаардлагатай байгаа санхүүжилтийн асуудлаар Япон улс болон хандивлагч орнууд, Дэлхийн банк, Олон улсын валютын сан, Азийн хөгжлийн банк зэрэг олон улсын банк, санхүүгийн байгууллагатай шууд хэлэлцээр хийж эхлэх хэрэгтэй.

Монгол Улсыг зах зээлийн шилжилтийн хүндрэлийг даван туулахад хандивлагч бусад орнуудыг Японы Засгийн газар тэргүүлэн дэмжиж ирсэн. 1977 оноос хойш манай улсад үзүүлсэн хөнгөлөлттэй зээл, буцалтгүй тусламжийн хэмжээ 1.7 тэрбум долларт хүрээд байна. 2007 оны хоёрдугаар сард Япон улсад төрийн айлчлал хийсэн Монгол Улсын Ерөнхийлөгч Н.Энхбаяр, Японы Ерөнхий сайд Ш.Абэ нар иж бүрэн түншлэлийн хүрээнд Монгол, Японы хамтын ажиллагааны 10 жилийн үндсэн хөтөлбөрт гарын үсэг зурсан.

Өнгөрсөн оны арваннэгдүгээр сард Вашингтон хотноо дэлхийн санхүүгийн хямралтай холбогдуулж өндөр хөгжилтэй, хөгжингүй 20 орны Засгийн газрын тэргүүнүүдийн уулзалт болж. санхүүгийн хямралаас гарахтай холбогдсон Хамтарсан мэдэгдэл хийсэн юм. Түүгээр 2009 оны гуравдугаар сар хүртэл авах төлөвлөгөөг хэлэлцэж шийдвэрлэсэн билээ. Буурай хөгжилтэй болон хөгжиж буй орнуудын эдийн засагт санхүүгийн хямрал хүндээр тусч болзошгүй байгааг харгалзан санхүүгийн дэмжлэг үзүүлэх зэрэг- Монгол Улсын хувьд анхаарал татмаар зүйл уг төлөвлөгөөнд орсон байсан. Эдгээр арга хэмжээг хэрэгжүүлэхэд зориулж ОУВС-гийн зээлжих чадварыг нэмэгдүүлэхэд 100 тэрбум доллар зориулах боломжтой гэдгээ Ягюны Ерөнхий сайд Т.Асо мэдэгдсэн. Тийм учраас бидний хандах ёстой гол түншийн маань нэг яах аргагүй Япон улс мөн.