Улстөрч бүр л төрийн гэсэн дур төрх бий болгохыг эрмэлздэг. Үүнийг өмсдөг хувцас, ярьдаг сэдэв гэх мэтээр бий болгож болдог. Ийм "имиж"-тэй гишүүдийн нэг болох Л.Гантөртэй ярилцлаа. Төсвийн зардлыг хэмнэж, зөв хэрэглээ төлөвшүүлэх нь түүний зорилго аж.

-Өнгөрсөн Парламентад Та төсвийн зардал хэмнэх талаар эрчимтэй ажилласан, үр дүнд ч хүрсэн байх. Үүнээс үүдээд Таныг хүмүүс нэлээд нарийн, харамч гэж боддог болсон байж мэднэ. Та ер нь хэр нарийн хүн бэ?

-Их хэмжээний мөнгөтэй байж үзээгүй болохоор өөрийгөө нарийн эсэхийг хэлж мэдэхгүй юм. Ер нь ч "нарийн" гэж ямар хүнийг хэлдэг юм, бүү мэд. УИХ-д сонгогдсоноосоо хойш ард түмний мөнгийг зөв зарцуулж, хэмнэхийн төлөө ажиллаж байгаа. Төрийн нүсэр бүтцийг багасгахад улс төрийн амьдралаа зориулах ёстой гэж өөртөө тангараг өргөсөн. Баялаг бүтээгчдээ дэмждэг. Энэ чиглэлээр хийх ажил манайд их байгаа нь өөрийгөө завгүй байлгах нэг сайхан боломж шүү дээ. Үүнийг хийснээр бид сайн засаглалтай, өөрсдөө баялаг бүтээдэг болно.

-Гэтэл нэг хэсэг шуугиулаад л Та чимээгүй болчихсон, яагаад тэр вэ?

-Хүмүүсээс тийм шүүмжлэл гараад байх шиг байна. Хэлүүлэхгүй хийдэг соёлд суралцаж байгаа нь хамтарсан Засгийн газрын нэг давуу тал. Тиймээс заавал хэвлэл мэдээллээр дуулиан болголгүйгээр, тэмцэлгүйгээр асуудал хариуцсан сайд нарт, УИХ-даа яриад ойлголцож болдог болжээ.

-Шатахуун их зарцуулдаг том оврын машинуудыг хот дотор явуулахаа болъё гэж тэр үед уриалж байсан. Та өөрөө хэдэн машинтай вэ?

-Нэг жижиг, нэг том тэрэгтэй. Хөдөө явахад том тэрэг унахгүй бол болдоггүй. Хотод жижиг тэргээ унахыг хичээдэг. Ер нь өндөр албан тушаалтан гэхээр л ганган том машин унадаг сэтгэхүйгээс татгалзаасай гэж хүсдэг. Залуус маань эд хөрөнгө, брэнд хувцаснаас илүү мэдлэг, оюун, сэтгэлээрээ биеэ чимдэг байгаасай. Ахадсан машин унаж, брэнд хувцас өмссөнөөрөө өөртөө л улам дарамт үүсгэж байна. Зөв хэрэглээ бий болгох нөөц бидэнд их бий. Нэг сая хүнтэй том хотод амьдарч байгаа учир бид эрсдэл хүлээж, нийцтэй байж сурах нь чухал. Залуус маань хотын соёлд суралцаж, хурдан иргэншихийн хэрээр улс орон хөгжинө.

-Та өөрөө зөв хэрэглээтэй хүн мөн үү?

-Мөн гэж бодож байна. Надад “Louis Vuitton”-ы тэлээ, "Gucci-гийн цүнх, "Prado"-гийн цаг гэх мэт тансаг эдлэл байхгүй. Та харж байгаа байх. Би хуруундаа бөгжгүй, цаггүй, энгийн nokia маркийн гар утас барьдаг. Ингээд л амьдрал хэвийн үргэлжлэх ёстой. Нөгөө талдаа тодорхой орлого бидэнд бий. Үүнийг зөв зүйлд, ялангуяа хүүхдүүдээ зөв хүн болгон төлөвшүүлэхэд харамгүй зарцуулах ёстой.

-Өндөр албан тушаалтай хүн тансаг хэрэглээтэй байх ёстой гэсэн сэтгэхгүй нийгэмд бий болчихож. Энэ саад болохгүй гэж үү?

-Феодалын нийгмээс үүдэлтэй энэ ойлголт удахгүй алга болно. Мэдээж брэнд, загварын хувцас өмсөх нь тэр хүний сонирхол. Гэхдээ өндөр албан тушаалтан бүр тансаг хэрэглээтэй байна гэвэл манай улсын эдийн засаг дийлэхгүй. Тиймээс энгийн хэрэглээтэй байх ёстой. Хэмнэлтийг өөрөөсөө эхлэх хэрэгтэй гэж боддог.

-Та дугуй унадаг уу?

-Унана. Гэхдээ ажлын онцлогоос болоод гадуур, нэг их хол газар явахгүй байна. Тэгэхээр өөртөө ашигтай хэрэглээг тэр бүр бий болгож чадахгүй юм.

-Та "Дулаан орохоор би дугуй унана" гэсэн гарчигтай ярилцлага жил гаруйн өмнө нэг сонинд өгсөн байсан болохоор ийн асуулаа л даа...

-Асуудлыг нөгөө өнцгөөс харж, давуулж ярьж байж шийдүүлэхийг оролдож байсан л даа. Тиймээс бүгд явган алхъя гэж тэр үед хэлсэн.

-Ямар нэг спортоор хичээллэдэг үү?

-Хүсдэг, гэвч амжихгүй байна. Сагсан болон гар бөмбөгт дуртай.

-Чөлөөт цагаараа юу хийх дуртай вэ. Гэр бүлээ танилцуулаач?

-Би гурван хүүхэдтэй л дээ. Эхнэртэйгээ сурагч байхдаа танилцаад оюутан болсон хойноо гэр бүл болсон. Бага маань таван настай. Чөлөөт цаг гарвал хүүхдүүдтэйгээ хамт байж, тоглохыг эрмэлздэг. Бас эрүүл агаарт машинаар давхих, түүх, соёлын холбогдолтой ном унших дуртай.

-Хот дотор шөнийн цагаар хааяа давхих уу?

-Хотод үгүй л дээ. Хөдөө агаар нь цэвэр, салхи нь цаанаа л өөр байдаг юм. Тэнд машиныхаа нээлхийг онгойлгочихоод давхих нь сайхан амралт болдог.

-Японд сургууль төгссөн гишүүдийн нэг нь Та. Тэнд сурснаараа юу олсон гэж боддог вэ?

-Мэдээлэл технологийн болон электроникийн инженер мэргэжлээр хоёр сургууль төгссөн. Японд инженерийн сургуулиуд нь том хотоос хол, уулын мухарт байрладаг. Энэ нь оюутнуудыг зугаа цэнгэлээс хол байж хичээлдээ анхаарлаа хандуулах нэг бодлого. Холдох тусам л нутагтаа сэтгэл ойртдог гэж Цахилгаан гуай хэлсэн байсан. Тэнд сурснаараа улс орноо Япон шиг хөгжүүлэхсэн гэсэн эрмэлзэл дүүрэн болсон. Найзуудтайгаа байнга л энэ талаар ярьдаг байлаа. Улс орныхоо төлөө томоохон зүйл боддог, ардчиллын үнэт зүйлд илүү хайртай, хөдөлмөрийн амтыг мэдэрсэн болов уу. Их сургуулиа төгсөөд нэг жил эдийн засгийн сургалтад хамрагдсан. Үргэлжлүүлэн магистр болох бодол байсан ч улстөрч болж байж улс орны амьдралд өөрчлөлт оруулах боломж нээгддэг юм байна гэж ойлгоод 2000 оны сонгуульд оролцохоор эх орондоо ирсэн.

-Нэг шар сонин УИХ-ын гишүүд дотроос хамгийн сайхан залуу шалгаруулах санал асуулга явуулсныг санаж байна. Тодруулсан хүмүүсийн дотор Та орсон байсан. Өөрийгөө хэр сайхан залуу гэж боддог вэ?

-Бүү мэд. Энэ ер нь өөр хүнд л тавих асуулт байна. /инээв/

Л.Гантөмөр: Надад брэндийн тансаг хэрэглээ байхгүй.