УИХ-ын  Аюулгүй байдал, гадаад бодлогын байнгын хороо, Хууль зүйн байнгын хорооны хамтарсан тогтоолоор байгуулагдсан Ажлын хэсгийн хуралдаан өчигдөр боллоо. 


УИХ-ын гишүүн Ш.Сайхансамбуу ажлын хэсгийг ахалж буй бөгөөд  “Сууц өмчлөгчдийн холбооны эрх зүйн байдал, нийтийн зориулалттай орон сууцны дундын өмчлөлийн эд хөрөнгийн тухай хуулийн хэрэгжилт”-ийг шалгах учиртай аж. Ажлын хэсэгт багтсан гишүүдээс УИХ-ын гишүүн Ж.Энхбаяр хуралд оролцсон, бусад нь томилолтоор эзгүй байгаа юм байна.

Ажлын хэсгийн хуралдаанаар СӨХ-ны дээд зөвлөлийн ерөнхийлөгч Г.Жигжид, Нийслэлийн газрын албаны орлогч дарга Буяндэлгэр нарын мэдээллийг сонссон юм. Мөн СӨХ-ны  дээд зөвлөлийн асуудлаар санал, хүсэлттэй байгаа зарим иргэдийн төлөөлөл ч хуралд ирж оролцсон.

1999 онд СӨХолбоодыг нэгтгэн, төрийн бус байгууллага байгуулсан, энэ нь СӨХ-ны дээд зөвлөл бөгөөд гишүүн байгууллагуудыгаа  мэргэжлийн удирдлагаар хангаж, үйл ажиллагаанд нь дэмжлэг үзүүлэх зорилготой аж. Гишүүнчлэлийн татвараас гадна төсөл, хөтөлбөрийн хэрэгжилтийн үр дүнгээс санхүүждэг гэнэ. Хэрэгжүүлж байгаа үйл ажиллагааных нь чиглэлд төдийлөн өөрчлөлт ороогүй ч сүүлийн үед орон сууцнуудын дундын эзэмшлийн эд аж ахуйд хяналт тавих гэх зэргээр хүрээ нь арай өргөжих тийшээ  байгаа аж.  

Мөн СӨХ-д улс төрийн нөлөө орж ирэх болсныг Г.Жигжид дурдаж байсан. СӨХ-ийн даргаар өөрийн талын хүнээ тавих сонирхол нам, хүчнүүдэд байдаг, энэ нь магадгүй сонгуулийн үеэр нэмэртэй  байдаг юм болов уу хэмээн тэрээр хэлсэн. СӨХ-ны дээд зөвлөлийн ажлыг товчхон илэрхийлвэл хуучин нийтийн аж ахуйн үйлчилгээний газартай л төстэй байх гэж ярьж байлаа. Эдний гишүүн бус СӨХ-ийнхөн ялангуяа хотын төвийн байрны СӨХ-үүд нэлээд будлиантай байж магад гэнэ. Тэдгээр нь хэдэн саяар  мөнгө идсэн уусан хэл аманд орооцолдож оршин суугчдаас гомдол ч их ирдэг юм байна.

Сүүлийн үед орон сууцны барилгуудыг цогцолбороор нь ашиглалтад хүлээн авах болсон. Гэтэл ашиг орлоготой подвал, гарааж мэтийг нь СӨХ-үүд хариуцаж аваад дулааны төв, усны эх үүсвэр гэх зэрэг нэлээд асуудал дагуулж байдаг хэсгийг нь орхичихдогоос үүдэн зөрчил хүндрэл их  гарах болсон талаар мэдээлэлд дурдагдаж байв.

Түүнчлэн газрын маргааны асуудал будлиан их тарьдаг гэнэ. СӨХ-ийн ойр орчны газар  болон хүүхдийн тоглоомын талбай дээр барилга барих, машины зогсоол хийснээс болоод бараг багахан хэмжээний “дайн” дэгдэх шахдагийг Г.Жигжид гуай хэлж байлаа.

Орон сууцыг 90-ээд онд шууд л улс төрийн аргаар хувьчилсан тул замбараагүй байдал одоо хүртэл үргэлжилсээр байгааг мөн хэлсэн. Тухайлбал, хүн амьдрах ямар ч нөхцөлгүй байрыг хувьчилснаас болоод цаашид хэрхэхийг нь шийдэх аргагүйд хүрсэн олон баримт бий гэнэ. Улаанбаатар хотод хүн амьдрах боломжгүй, ашиглахыг хориглосон 30-аад орон сууц байдаг аж. Ванндаа усанд орж байсан эмэгтэй тэр чигтээ доод айл руугаа нураад орчихсон инээдтэй гэмээр ч эмгэнэлтэй түүх байгааг мөн хэлсэн. Байшингийн дээвэр дээр засвар хийж байгаад доош цөмрөн мөн л айл руу нураад ойчсон хөгийн жишээг ч тэр ярилаа.

Хуучин орон сууцнуудад хэрэглэж байгаа цахилгаан шатны элэгдэл хорогдлын хугацаа аль хэдийнэ өнгөрчихөөд байгаа ч яаж ч чадахгүй өнөөг хүрсэн тухай бас өгүүлсэн. 1300 орчим лифт нийслэлийн орон сууцнуудад байдаг бөгөөд тэдгээрийн 900-гаад нь орчин үед  хэрэглэгдэхээ больсон, лав л Оросоос сэлбэг нь огт ирэхээ байсан аж.

СӨХ-ны дээд зөвлөлөөс жил бүр орон сууцны түвшин тогтоох үзлэгийг хийдэг юм байна. Ингэхдээ 60-аас доош үнэлгээ авбал хангалтгүй хэмээн үздэг тухайгаа тус зөвлөлийн ерөнхийлөгч Г.Жигжид ярилаа.

Түүний мэдээллийн дараа Нийслэлийн газрын албанаас танилцуулга хийсэн.

2008 оноос өмнө СӨХ-ийн эзэмшил газар дээр газар олголт их байсныг болиулж байгаа, тухайлбал, 9 газрын /аж ахуйн нэгжийн/ эзэмшлийг хүчингүй болгосон гэв. Гэхдээ “нийт 28 удаагийн захирамжаар” энэ ажлыг арай гэж гүйцэлдүүлжээ. Харин 2009, 2010 онд СӨХ-ийн газар дээр газар олголт хийгээгүй хэмээн мэдээллээ.

Ажлын хэсгийн хуралдаанд ирж оролцсон иргэдийн төлөөлөл СӨХ-ны дээд зөвлөл олигтой ажиллахгүй байна, гишүүний татвараар дулдуйдан мөнгө  завшиж суудаг байгууллага болжээ, иргэд оршин суугчдын халаас руу гар дүрж байдаг энэ байгууллага цаашид оршин тогтнох нь хэрэгтэй юм уу гэх зэргээр шүүмжлэлтэй хандаж байлаа.

Хуралдааны эцэст энд дурдагдсан  зарим тодорхой асуудлаар Ажлын хэсэг тогтож ярилцан чиглэл өгөхөөр болсон юм.