УИХ-ын Хууль зүйн байнгын хорооноос 2010 оны намрын ээлжит чуулганы хугацаанд хийж гүйцэтгэсэн ажлын талаар Байнгын хорооны дарга Д.Одбаяр, УИХ-ын гишүүн Б.Бат-Эрдэнэ нар өнөөдөр сэтгүүлчдэд мэдээлэл хийлээ. УИХ-ын 2010 оны намрын ээлжит чуулганы хугацаанд Хууль зүйн байнгын хороо нийт 19 удаа, дунджаар 75.0 хувийн ирцтэй, 23.30 цаг хуралдаж нийт 34 асуудал хэлэлцсэнээс 31 хууль, 14 Улсын Их Хурлын бусад шийдвэрийн төсөл, бусад асуудал 5-ыг тус тус хэлэлцэн баталжээ.


Хууль зүйн байнгын хороо нь Монгол Улсын Засгийн газраас өргөн мэдүүлсэн Нотариатын тухай хуулийн шинэчилсэн найруулгын төсөл, дагалдах 26 хуульд нэмэлт, өөрчлөлт оруулах тухай хуулийн төслүүдийг, мөн Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг, Улсын Их Хурлын гишүүн Ц.Мөнх-Оргил нарын 17 гишүүдээс өргөн мэдүүлсэн Нотариатын тухай хуульд нэмэлт, өөрчлөлт оруулах тухай хуулийн төсөл, дагалдах 29 хуульд нэмэлт, өөрчлөлт оруулах тухай хуулийн төслүүд, Улсын Их Хурлын гишүүн Ж.Сүхбаатар нарын 3 гишүүдээс өргөн мэдүүлсэн Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг Монгол Улсын Их Хурлын чуулганы хуралдааны дэгийн тухай хуульд заасны дагуу төсөл санаачлагчдийн зөвшөөрснөөр дээрх төслүүдийг нэгтгэн нэг төсөл болгон боловсруулж, чуулганы нэгдсэн хуралдаанаар хэлэлцүүлж, батлууллаа хэмээн Байнгын хорооны дарга Д.Одбаяр танилцуулсан.

Байнгын болон Дэд хорооны тогтоолоор 9 ажлын хэсгийг шинээр байгуулсан бөгөөд ажлын хэсэг нийт 32 удаа хуралдсан байна.Ингээд Хууль зүйн байнгын хорооноос гаргасан тайланг хүргэе.Баталсан хуулиуд:

1. Захиргааны хэргийн давж заалдах шатны шүүх байгуулах тухай хууль.

Хүний эрхийг нийтийн захиргааны хүрээнд зөрчигдөхөөс хамгаалах чиг үүрэгтэй шүүхийн тогтолцоог 21 аймагт тус бүр гурван гишүүнтэй анхан шатны шүүх ажиллах, мөн нийслэлд ерөнхий шүүгч, 7 шүүгчийн бүрэлдэхүүнтэй тусдаа анхан шатны шүүх байхаар хуульчилсан билээ. Улмаар УДШ-ийн бүрэлдэхүүнд 5 шүүгч, тэргүүн шүүгчтэй Захиргааны хэргийн танхим ажиллан давж заалдах шатны үүргийг гүйцэтгэж, УДШ нь бүрэлдэхүүнээрээ хяналтын шатны үүргийг гүйцэтгэхээр тус тус тогтоож байжээ.

Ийнхүү байгуулагдсан цагаас хойш давж заалдах болон хяналтын шатны журмаар 2004 онд 15, 2005 онд 240, 2006 онд 261, 2007 онд 409, 2008 онд 615, 2009 онд 780, 2010 онд 762 захиргааны хэрэг хянан шийдвэрлэсэн байна. Дээр дурдсан тоо, баримтаас дүгнэхэд УДШ-ийн Захиргааны хэргийн танхимын ачаалал жил бүр өсөн нэмэгдэж байгаа юм.

Иймд шүүхийн эрх зүйн шинэтгэлийг гүнзгийрүүлэх, захиргааны хэргийн шүүхийн тогтолцоог боловсронгуй болгож, Монгол Улсын Үндсэн хууль болон Шүүхийн тухай хуулийн заалттай нийцүүлэн захиргааны хэргийн давж заалдах шатны шүүх байгуулах шаардлага зүй ёсоор тавигдаж байна.

Дээрх шаардлагыг үндэс болгон УИХ 2010 оны 12 дугаар сарын 31-ний өдөр УДШ-ийн Захиргааны хэргийн давж заалдах шатны шүүх байгуулах хуулийг баталсан.

Захиргааны хэргийн давж заалдах шатны шүүхийг байгуулж ажиллуулснаар хэргийг дагнасан шүүхийн мэргэшсэн шүүгчид хянан шийдвэрлэх боломжтой болж давж заалдах болон хяналтын шатны шүүхийн давхардал арилж, тухайн шүүхүүд шат шатандаа шүүх эрх мэдлийг бие даан хэрэгжүүлэх боломжийг олгосны зэрэгцээ шүүхийн ачаалал эрс буурах юм.

Энэхүү шийдвэртэй холбоотойгоор Шүүхийн тухай хуулийн 62 дугаар зүйлийн холбогдох заалтыг үндэслэн Улсын Их Хурлаас захиргааны хэргийн шүүхийн шүүгчийн орон тоо,цалингийн хэмжээг тогтоосон УИХ-ын тогтоол баталсан.

2. Нотариатын тухай хууль /шинэчилсэн найруулга/, Энэ хуулийн төслийн хамт өргөн мэдүүлсэн 25 хуульд нэмэлт, өөрчлөлт оруулах тухай хуулийн төслүүд/

Засгийн газраас Улсын Их Хуралд өргөн мэдүүлсэн Нотариатын тухай хуулийн шинэчилсэн найруулгын төсөл, дагалдах бусад хуулийн төслүүдийг Улсын Их Хурлын гишүүн Ц.Мөнх-Оргил нарын 17 гишүүнээс өргөн мэдүүлсэн Нотариатын тухай хуульд нэмэлт, өөрчлөлт оруулах тухай хуулийн төсөл, дагалдах бусад хуулийн төслүүдтэй нэгтгэн боловсруулж, УИХ-ын нэгдсэн хуралдаанаар батлуулсан.

Нотариатч тогтоосон тойргоо сольж ажиллахыг хязгаарлах, нотариатын үйлдлийг буруу хийсэн, үйлчлүүлэгчийн хувийн байдлыг буруу тогтоосон зэрэг буруутай үйлдлийн улмаас үйлчлүүлэгчид болон гуравдагч этгээдэд хохирол учирсан тохиолдолд түүнийг нөхөн төлөх зорилгоор хариуцлагын заавал даатгалд хамруулах, нотариатын тойрог, түүнд ажиллах нотариатчийн тоог тогтоохдоо  хууль зүйн асуудал эрхэлсэн Засгийн газрын гишүүн танхимын саналыг харгалзан тогтоож байхаар, нотариатын үйл ажиллагаатай холбогдсон бүртгэл, мэдээллийн нэгдсэн цахим санг бүрдүүлэхийг нотариатын танхим зохион байгуулах, шуудангаар баримт бичгийн хуулбарыг ирүүлэх тохиолдолд нотариатаар заавал гэрчлүүлсэн байх зэрэг өнөөгийн нийгмийн шаардлагад нийцүүлсэн өөрчлөлтүүдийг хуульд тусгалаа.

3. Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хууль.

Захиргааны хэргийн шүүхэд хэрэг хянан шийдвэрлэх ажиллагааг бусад шүүхийн процессийн үйл ажиллагаатай нийцүүлэх, хуулиудын зүйл, заалтын агуулга, үзэл санааг нэг мөр болгох, практик дээр тулгарч буй зарим асуудлыг хуульчлан зохицуулах шаардлагыг харгалзан үзэж Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийг хэлэлцэн баталсан.

Уг хуульд нэхэмжлэгч зөрчигдсөн эрхээ хамгаалуулахаар шүүхэд нэхэмжлэл гаргах хугацааг, хэргийн оролцогч, төлөөлөгч, өмгөөлөгч нь давж заалдах гомдол гаргах хугацааг, түүнчлэн хяналтын журмаар гомдол гаргах хугацааг хүндэтгэн үзэх шалтгаанаар хэтрүүлсэн бол хугацаа сэргээлгэх хүсэлтээ хаана гаргах, уг хүсэлтийг хянан шийдвэрлэх журмыг нэмж тусгасан.

Түүнчлэн иргэний эрх зүйн чадамжтай иргэн шаардлагатай гэж үзвэл хэрэг хянан шийдвэрлэх ажиллагааны аль ч шатанд захиргааны хэргийг хянан хэлэлцэхэд төлөөлөгчөө оролцуулах, захиргааны хэргийн шүүх нэхэмжлэлийг хүлээн авахаас татгалзсан шийдвэртээ татгалзаж буй шалтгаанаа зааж, нэхэмжлэл хүлээн авахад саад болж байгаа зүйлийг хэрхэн засах, нэхэмжлэл хэрхэн гаргахыг зааж өгч уг нэхэмжлэлийг буцааж байхаар хуульчиллаа.

Шүүхийн тухай хуулийн болон Иргэний хэрэг шүүхэд хянан шийдвэрлэх тухай хуулийн холбогдох зүйл, заалттай нийцүүлэн захиргааны хэргийг анхан болон давж заалдах, хяналтын шатны журмаар хянан шийдвэрлэхэд урьд нь оролцсон шүүгч, түүнчлэн хэрэг шийдвэрлэхэд оролцсон шүүгчийн гэр бүлийн гишүүн, түүнтэй төрөл, садангийн холбоотой шүүгч уг хэргийг өөр шатны журмаар хянан шийдвэрлэхэд оролцохгүй байх талаар хуульчилсан.

4. Засгийн газрын тусгай сангийн тухай хуульд нэмэлт оруулах тухай, Иргэний хэрэг шүүхэд хянан шийдвэрлэх тухай хуульд нэмэлт оруулах тухай, Шүүхийн шийдвэр гүйцэтгэх тухай хуульд нэмэлт оруулах тухай хуулийг баталсан.

Уг хуулиар Монгол Улсын нутаг дэвсгэрт хүч хэрэглэн, санаатай үйлдэгдсэн зарим төрлийн хүнд, онц хүнд гэмт хэргийн улмаас амь насаа алдсан болон хүнд гэмтэл учирсан хохирогч, түүний гэр бүлийн гишүүнд төрөөс нөхөн төлбөр олгох зориулалт бүхий “Гэмт хэргийн хохирогчид нөхөн төлбөр олгох сан” бий болгож Засгийн газрын тусгай сангийн тухай хуульд нэмж тусгасан.

Энэхүү хуулийг хэрэгжүүлэхтэй холбогдуулж улсын төсвөөс тодорхой хөрөнгийг “Гэмт хэргийн хохирогчид нөхөн төлбөр олгох сан”-д жил бүр төвлөрүүлж, гэмт хэргийн улмаас хохирсон хохирогчдод олгох нөхөн төлбөрийг шүүхийн шийдвэрийг үндэслэн олгож байхаар боллоо.

Тухайлбал: Гэмт хэргийн улмаас хохирогч нас барсан бол хөдөлмөрийн хөлсний доод хэмжээг 30 дахин нэмэгдүүлсэнтэй тэнцэх хэмжээний, хохирогчийн бие махбодид хүнд гэмтэл учирсан бол хөдөлмөрийн хөлсний доод хэмжээг 20 дахин нэмэгдүүлсэнтэй тэнцэх хэмжээний нөхөн төлбөр олгож байхаар хуульчиллаа. Мөн түүнчлэн хохирогчдод олгосон нөхөн төлбөрийг шүүхээр гэм буруутай нь тогтоогдсон этгээдээр буцаан төлүүлж “Гэмт хэргийн хохирогчид нөхөн төлбөр олгох сан”-д төвлөрүүлэх зохицуулалтыг хийсэн.

Энэ хууль батлагдсанаар дээр дурдсан гэмт хэргийн улмаас хохирсон хохирогчид учирсан хохирлынхоо зохих хэсгийг тухайн гэмт хэргийг шүүхээр шийдвэрлэсний дараа шүүхийн шийдвэр гүйцэтгэхийн өмнөх шатанд уг сангаас гаргуулан авах эрх зүйн зохицуулалт бий болж байгаа юм байна.

Баталсан Улсын Их Хурлын бусад шийдвэр

ХЗБХ эрхлэх асуудлын хүрээнд Улсын Их Хурлын нийт 14 тогтоолыг хуралдаанаар хэлэлцэн баталсан байна. Үүнд:

1. Шүүгчийн болон прокурорын, Авлигатай тэмцэх газрын албан хаагчийн албан тушаалын цалингийн хэмжээг шинэчлэн тогтоох тухай Улсын Их Хурлын 2010 оны 51, 52 дугаар тогтоолууд.

“Монгол Улсын Засгийн газрын 2008-2012 оны үйл ажиллагааны хөтөлбөр”-т тусгагдсан цалин, тэтгэвэр, тэтгэмжийг нэмэгдүүлэх зорилтыг хэрэгжүүлж эхлэх үүднээс төрийн албан хаагчийн цалин, нийгмийн даатгалын болон халамжийн сангаас олгох тэтгэвэр, тэтгэмжийн хэмжээг 2010 оны 10 дугаар сарын 01-ний өдрөөс 30 хувиар нэмэгдүүлэх талаар Засгийн газраас шийдвэр гаргаж, хэрэгжүүлж эхэлсэнтэй холбогдуулан Шүүгчийн болон прокурорын, авлигатай тэмцэх газрын албан хаагчийн албан тушаалын цалингийн хэмжээг шинэчлэн тогтоох УИХ-ын тогтоолын төслүүдийг УИХ хэлэлцэн баталсан.

2. Хууль зүйн байнгын хорооны эрхлэх асуудлын хүрээнд хамаарах хуульд заасан бүрэн эрхийн хугацаа нь дуусгавар болсон болон өөр албан тушаалд томилогдсонтой холбогдуулан Үндсэн хуулийн цэцийн гишүүн, Хүний эрхийн Үндэсний Комиссын дарга, гишүүн, Шүүхийн ерөнхий зөвлөлийн гишүүнийг томилох, чөлөөлөх асуудлыг тус тус хэлэлцэн баталсан.

Батлагдсан УИХ-ын тогтоолууд:

Үндсэн хуулийн цэцийн гишүүнийг томилох тухай УИХ-ын 2010 оны 58 дугаар тогтоол;Үндсэн хуулийн цэцийн гишүүнээс чөлөөлөх тухай Улсын Их Хурлын 2010 оны 63 дугаар тогтоол;Хүний эрхийн Үндэсний Комиссын дарга, гишүүнээс чөлөөлөх тухай Улсын Их Хурлын 2010 оны 59 дүгээр тогтоол;Хүний эрхийн Үндэсний Комиссын гишүүнийг томилох тухай Улсын Их Хурлын 2010 оны 60 дугаар тогтоол;Хүний эрхийн Үндэсний Комиссын даргыг томилох тухай Улсын Их Хурлын 2010 оны 62 дугаар тогтоол,Шүүхийн ерөнхий зөвлөлийн гишүүнээс чөлөөлөх, гишүүнээр томилох тухай Улсын Их Хурлын 2010 оны 64 дүгээр тогтоол.

3.Ерөнхийлөгчийн хоригийн тухайУлсын Их Хурлын 2010 оны 61 дүгээр тогтоол.

“Төрийн өндөр албан тушаалтан болон түүнтэй адилтгах албан тушаалтны албан тушаалын цалингийн хэмжээг шинэчлэн тогтоох тухай” УИХ-ын 2010 оны 10 дугаар сарын 21-ний өдрийн 50 дугаар тогтоолын хавсралтын 1 дэх заалтын “ТӨ-1”-д хамаарах хэсэгт Монгол Улсын Ерөнхийлөгчөөс тавьсан хоригийг холбогдох Байнгын хороо /2010.11.02/ болон Хууль зүйн байнгын хороо /2010.11.10/, чуулганы нэгдсэн хуралдаанаар /2011.10.11/ тус тус хэлэлцэж, хоригийг хүлээж авах нь зүйтэй гэж үзсэн.

4. Үндсэн хуулийн цэцийн 2010 оны 07, 08 дугаар дүгнэлтийн тухайУлсын Их Хурлын 2010 оны 70 , 71 дүгээр тогтоол.

УИХ-ын сонгуулийн тухай хуулийн 50.7 дахь хэсэгт “...эцэслэн...” гэж заасан нь Үндсэн хуулийн холбогдох хэсэг, заалтыг зөрчсөн талаарх ҮХЦ-ийн 2010 оны 07 дугаар дүгнэлтийг ХЗБХ, ТББХороо, УИХ-ын чуулганы нэгдсэн хуралдаанаар тус тус хэлэлцэж дүгнэлтийг хүлээн зөвшөөрөх боломжгүй гэж үзэж УИХ-ын тогтоолыг баталсан.

Хуульч сонгон шалгаруулах тухай хуулийн 18.1.2 дахь заалтын “хүндэтгэн үзэх шалтгаангүйгээр энэ хуулийн 17.2-т заасан сургалтад хамрагдаагүй, авбал зохих багц цагийг хангаагүй;” гэсэн нь Үндсэн хуулийн Тавин нэгдүгээр зүйлийн 3, 4 дэх хэсгийг зөрчсөн байна гэсэн Үндсэн хуулийн цэцийн 2010 оны 08 дугаар дүгнэлтийг хэлэлцэж дүгнэлтийг хүлээн зөвшөөрөх боломжгүй гэж үзэн УИХ-ын тогтоолыг баталсан.

5. Хуулийн төсөл буцаах тухай УИХ-ын тогтоолууд.

Засгийн газраас 2010 оны 12 дугаар сарын 29-ний өдөр УИХ-д өргөн мэдүүлсэн Хууль, УИХ-ын бусад шийдвэрийн төсөл боловсруулах, өргөн мэдүүлэх журмын тухай хуульд нэмэлт, өөрчлөлт оруулах тухай, Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслүүд;

Нотариатын тухай хууль /шинэчилсэн найруулга/-ийг дагалдан өргөн мэдүүлэгдсэн Газрын тухай хуульд өөрчлөлт оруулах тухай, Иргэний хуульд өөрчлөлт оруулах тухай, Векселийн тухай хуульд өөрчлөлт оруулах тухай, Валютын зохицуулалтын тухай хуулийн зарим заалтыг хүчингүй болсонд тооцох тухай, Улс төрийн хилс хэрэгт хэлмэгдэгчдийг цагаатгах, тэдэнд нөхөн олговор олгох тухай хуульд өөрчлөлт оруулах тухай, Барааны тэмдэг, газар зүйн заалтын тухай хуульд өөрчлөлт оруулах тухай хуулийн төслүүд.

Байнгын хорооны хуралдаанаар хэлэлцсэн бусад асуудал

1. Улсын дээд шүүхийн шүүгчид нэр дэвшигчийн танилцуулгыг Улсын Их Хуралд танилцуулах.

Улсын дээд шүүхийн шүүгчид нэр дэвшигч Цэвэгмидийн Зоригтын талаарх  Шүүхийн ерөнхий зөвлөлийн танилцуулгыг тус Байнгын хороо сонсож, Улсын Их Хурлын дарга нэр дэвшигчтэй танилцсан тухай албан бичгийг Ерөнхийлөгчид хүргүүлсэн.

2. Улсын ерөнхий прокурорын орлогчийг томилох тухай санал /Монгол Улсын Ерөнхийлөгч Улсын Их Хуралтай зөвшилцөх/.

Цэндсүрэнгийн Бямбацогтыг Улсын ерөнхий прокурорын орлогчоор томилох тухай Монгол Улсын Ерөнхийлөгчийн саналыг Хууль зүйн байнгын хороо   хуралдаанаараа хэлэлцэж санал нэгтэйгээр дэмжиж, чуулганы нэгдсэн хуралдаанд танилцуулсан. Нэгдсэн хуралдаанаар Ерөнхийлөгчийн санал, Хууль зүйн байнгын хорооны санал, дүгнэлтийг хэлэлцэж, санал хураалтын дүнг Улсын Их Хурлын дарга Ерөнхийлөгчид бичгээр мэдэгдсэн.

3. Ялтан шилжүүлэх тухай Монгол Улс болон БНХАУ хоорондын гэрээ.

/зөвшилцөх/.

Тус Байнгын хороо болон Аюулгүй байдал, гадаад бодлогын байнгын хороо дээрх асуудлыг хэлэлцэж, гэрээний төслийг зөвшилцөх асуудлыг дэмжин гэрээнд гарын үсэг зурахыг Засгийн газарт зөвшөөрсөн санал, дүгнэлт гаргасан.

Энэхүү гэрээг байгуулснаар хоёр улсын нутаг дэвсгэрт ял эдэлж байгаа өөрсдийн харьяат иргэдийг эх оронд нь шилжүүлэн авчирж гэр бүлийн гишүүд, хамаатан садантай нь эргэлтээр ойрхон уулзуулах, ялын төрөл, хугацааг бууруулах аливаа эрх бүхий байгууллагын шийдвэрт хамруулах, эх орондоо нийгэмших боломж /хэл, соёл, мэдээлэл хүлээн авах, хүрээлэн буй орчин гэх мэт/-ийг олгох зэрэг ач холбогдолтой.

4. Иргэний болон улс төрийн эрхийн тухай олон улсын Пактын цаазаар авах ялыг халахад чиглэсэн Нэмэлт 2 дугаар Протоколд нэгдэн орох тухай асуудал /зөвшилцөх/.

Дээрх асуудлыг тус Байнгын хороо 2010 оны 10 дугаар сарын 19, 26-ны өдөр тус тус хэлэлцэж, энэхүү нэмэлт Протоколд нэгдэн орох тохиолдолд холбогдох хуульд нэмэлт, өөрчлөлт оруулах санал, шийдвэрийн төслийг Улсын Их Хуралд өргөн мэдүүлэх боломжтой, уг асуудал нь Монгол Улсад хүчин төгөлдөр мөрдөгдөж буй хууль тогтоомжтой зөрчилдөхгүй гэсэн санал, дүгнэлтийг гаргасан.

5. Байнгын хорооны даргыг сонгох тухай асуудал. /хуульд заасан хугацаандаа хэлэлцэн шийдвэрлэсэн/

Дөрөв. Байнгын хорооноос хяналт шалгалтын чиглэлээр дараахь ажлын хэсгүүд байгуулагдан ажилласан байна. Үүнд:

1. ХЗБХ-ны 2010 оны 19 дүгээр тогтоолоор байгуулагдсан УИХ-аас 2007 оны 8 дугаар сарын 16-ны өдөр соёрхон баталсан Монгол Улсын Засгийн газар, Бүгд найрамдах Солонгос Улсын Экспорт-Импорт банкны хооронд байгуулсан "Холбоо, хяналт, мэдээллийн нэгдсэн сүлжээ", "Улаанбаатар хотын замын хөдөлгөөнийг хянах систем" төслүүдийн зээлийн гэрээний болон Дархан-Уул аймгийн Дархан сумын замын хөдөлгөөний ачааллыг бууруулах, зөрчлийг арилгахаар хэрэгжүүлж буй хяналтын камер суурилуулах төслийн хэрэгжилттэй танилцах, санал, дүгнэлт гаргах үүрэг бүхий ажлын хэсэг Цагдаагийн ерөнхий газрын дэргэдэх Мэдээлэл, шуурхай удирдлагын төв, Замын хөдөлгөөний удирдлагын төв, Дархан-Уул аймгийн Засаг даргын Тамгын газар, Цагдаагийн газарт очиж төрийн үйлчилгээний хяналтын нэгдсэн системийн үйл ажиллагаатай тус тус танилцлаа.

2.Хууль зүйн байнгын хорооны 2010 оны 23 дугаар тогтоолоор байгуулагдсан Шүүхийн шийдвэр гүйцэтгэх ерөнхий газар болон түүний харьяа зарим байгууллагуудад холбогдох хуулийн хэрэгжилтийн явц, тэдгээр байгууллагын үйл ажиллагаа хуулийн хүрээнд хэрхэн явагдаж байгаатай танилцах үүрэг бүхий ажлын хэсэг Шүүхийн шийдвэр гүйцэтгэх ерөнхий газар, Нийслэлийн шийдвэр гүйцэтгэх алба, Банк, хадгаламж зээлийн хоршоодын төлбөр барагдуулах ажлын алба, Хадгаламж зээлийн хоршоодын төлбөрт хураагдсан, худалдан борлогдоогүй хөдлөх хөрөнгө хадгалж буй объектууд,  Цагдан хорих төв, хорих ангиудын үйл ажиллагаатай тус тус танилцсан.

3.ХЗБХ-ны дарга эрхлэх асуудлын хүрээнд НҮБ-ын зөвлөх шинжээч Фоедро Троер, Арвенде Самбэ нартай "НҮБ-ын Авлигын эсрэг Конвенци"-ийн хэрэгжилт, дүн шинжилгээ, цаашид хэрэгжүүлэх арга хэмжээний талаар, Монголын ажил олгогч эздийн нэгдсэн холбооны удирдлага болон олон улсын байгууллагын төлөөлөгчидтэй, Олон улсын нотариатчдын холбооны гадаад харилцааны зөвлөх Марелиз Эбрард болон Монголын Нотариатчдын танхимын ерөнхийлөгч Ч.Отгонбаяр нарыг Төрийн ордонд хүлээн авч санал бодлоо солилцлоо.

4.ХЗБХ-ны Ажлын алба 2010.10.15-ны өдөр Шүүхийн шийдвэр гүйцэтгэх ерөнхий газрын харьяа хорих 403 дугаар ангийн албан хаагч нарт холбогдох хууль тогтоомжийн талаар мэдээлэл хийсэн.

5.Хүний эрхийн дэд хороо 1 удаа, 75.0 хувийн ирцтэй хуралдаж нийт 5 асуудлыг хэлэлцсэн бөгөөд Монгол Улсын Хүний эрхийн Үндэсний Комиссын тухай хуулийн шинэчилсэн найруулгын төслийг боловсруулах үүрэг бүхий ажлын хэсгийг байгуулан ажиллаж байна.

Хүний эрхийн дэд хороонд иргэд, байгууллагаас ирүүлсэн нийт 3 албан бичиг, 2 өргөдөл, хүсэлт, саналыг судлан үзэж холбогдох хууль тогтоомжийн дагуу 4 албан бичгийг илгээсэн. Тус Дэд хорооны хуралдаанаар 2 тогтоолын төслийг хэлэлцэж баталсан.

6.ХЗБХ-нд иргэд, байгууллагаас ирүүлсэн нийт 95 хуудас бүхий 67 албан бичиг, 45 хуудас бүхий 16 өргөдөл, хүсэлт, саналыг холбогдох журмын дагуу хянаж, 110 хуудас бүхий 41 албан бичгийг илгээсэн байна