Обамагийн үед африк гаралтай америкчууд муухан амьдарч байна
2011.01.20

Обамагийн үед африк гаралтай америкчууд муухан амьдарч байна

Америк улс Мартин Лютер Кингийн өдрийг тэмдэглэлээ. Гэтэл энэ улсын африк гаралтай хүмүүс улам ядуурсаар л байна. Энэ талаар зарим баримтыг дурдья.

“Black agenda report”-ийн Глен Форд “АНУ-ын хар арьстай хүн ам сүүлийн 30 жилтэй харьцуулахад өнөөдөр илүү хүнд нөхцөлд амьдарч байна. Африк гаралтай америкчуудын дунд албан ёсны мэдээгээр ажилгүйдлийн түвшин өнгөрсөн жилийн турш 16 %-тай байсан” гэж ярьж байна. Харин лам, хүний эрхийн төлөө тэмцэгч Джесси Джексон “Ажилгүйдлийн хэмжээ маш өндөр байна. Ялангуяа африк гаралтай америкчууд ажилгүйдэлд бусдаас илүү өртсөн. Үүний зэрэгцээ шоронд хоригдож, ял эдэлж байгаа хүмүүсийн дунд чухам хар арьстнууд маш их байна” гэж мэдэгдлээ.


Хэрэв дээрх үзүүлэлтүүд үндэстний өөр ямар нэг цөөнхөд хамаарч байсан бол АНУ-д онц байдал зарлах байсан гэж олон хүн ярьдаг. Тэгэхээр Америкийн негрүүдийг аврах цаг болсон юм биш үү. Ялангуяа хар Ерөнхийлөгчийн үед энэ асуудал улам хурцаар тавигдаж эхэллээ.
АНУ-ын Нью-Йоркийн Гарлем хороолол бол Барак Обамаг сонгуульд ялахад хамгийн их баярлаж, ялалтыг нь маш идэвхтэй тэмдэглэж байсан газруудын нэг. Гэтэл түүнийг Ерөнхийлөгч болсноос хойш 2 жилийн дараа гэхэд одоо энд сайхан амьдралын тухай мөрөөдөл бутран алга болсныг анзаарахгүй байхын аргагүй.


Ажилгүйдлийн аймшигт дүр зураг улам ил гарсаар байна. Энэ нь олон харуудын ядуурал гуйранчлалын шалтгаан болжээ. Судалгаанаас үзэхэд нэг жилийн өмнө АНУ-д зургаан хар арьстан тутмын 1 нь ажилгүй байсан аж. Одоо ч байдал дээрдсэн юм алга. Негрүүдийн ихэнх нь “Ажилд орохоор очих үед арьсны үзэл гаргадаг” хэмээн ярьжээ. Дэлхийн хамгийн ардчилсан орон гэж өөрийгөө тунхагладаг улсад одоо ч арьсны үзэл бөх оршсоор байгаа гэж үү. “Олон зуун судалгаанаас үзэхэд ял эдлээгүй цагаан арьстан ба дээд боловсролтой, хар эр хоёр зэрэг ажилд орох өргөдөл өгөхөд цагаан хүнийг урьж, ажилд авах ярилцлагад уригдах магадлал өндөр байдаг” гэж Глен Форд нотолж байна.


Чухам ийм учраас Ерөнхийлөгч Обама энэ чиглэлд тусгайлсан бодлого явуулах хэрэгтэй гэж шинжээчид үзэж байна. Гэвч тэр яагаад үүнийг хийхгүй байгаа юм бол? Пастор Джеймс Дэвид Мэннинг “Ерөнхийлөгч Обама африк гаралтай америкчуудыг өөрийг нь дэмжиж, өөрт нь харъяалагддаг, ямар ч нөхцөлд саналаа өгөх хүмүүс гэж лавтайяа үздэг бололтой. Хэрэв Обама улстөрийн “нөөцөө” зарцуулах бол лав л АНУ-ын хар арьст хүн амын төлөө биш” хэмээн онцоллоо.


Харин эдийн засагч Майкл Хадсон бүр хатуу хэлжээ. Тэрээр “Ерөнхийлөгч Обама маш олон африк гаралтай америкчуудыг гэр оронгүй болгочихлоо. Өөрөөр хэлбэл арьсны үзэлт “Ку-Клукс-Клан” бүлэглэлийнхнээс ч олон хүнийг орон сууцгүй болгочихсон” гэж мэдэгдэв.
АНУ-ын Ерөнхийлөгч Обама сүүлийн үед Уолл-Стритээс өгсүүлээд төгсдөггүй дайн гээд асар олон салбарт мөнгө, хүч чадлаа зарцуулж байгаа. Энэ бүхэн их цаг эзэлж байгаа бөгөөд чухамдаа түүний Ерөнхийлөгчийн суудалд суусан эхний 2 жилийн улстөр байлаа. Гэтэл цаг хугацаа өнгөрсөөр, өдөр, сар, жилүүд ээлжилсээр. Африк гаралтай америкчууд тус улсын ядуу 40 сая хүний адил хаягдсан хэвээр л байна. Мартин Лютер Кингийн зөвлөх асан Клэренс Джонс “Хэрэв ажлын байруудыг шинээр үүсгэн, хүртээмжтэй болгохгүй бол Ерөнхийлөгч Обама африк гаралтай америкчуудын дэмжлэгийг алдах магадлалтай. Тэр бүү хэл нийт хүн амын дунд ерөнхийдөө хүмүүс түүнд итгэл алдарч байна” гэж сэрэмжлүүллээ.


Орхигдсон, гологдсон, мартагдсан, урам хугарсан негрүүд Обамаг ч мөн мартаж магадгүй юм шүү.

 

 

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.