www.vip76.mn вэб сайтаас 76-аас асууя нэртэй булан ажиллуулаад багагүй хугацааг өнгөрөөгөөд байгаа билээ. Бид маш олон хүмүүсийн асуултын хариултыг УИХ-ын гишүүдээс авч та бүхэнд уламжлан хүргэж байна. Энэ удаад УИХ-ын гишүүн, Хууль зүйн байнгын хороон дарга Б.Бат-Эрдэнэ сонгогчдын асуултанд хариултаа ирүүлжээ.

-       Танд юуны өмнө энэ өдрийн мэндийг хүргэе! Би Хэнтий аймгийн Бор-Өндөр хотын иргэн байна аа. Миний асуух асуулт бол аймгуудын төсөвт тусгадаг төсвийг нээлттэй байлгаж мөн Бор-Өндөр хотынхоо хөгжлийн төлөө явъя.Яагаад вэ гэвэл энд статусын асуудал ярих гэж байна. Бор-Өндөрийг Дархан сумын 5-р баг байлгахаа болимоор байна. Дарханыг нэгтгээд Бор-Өндөр сум болговол хөгжилд их нэмэртэй юм биш үү. Өөр ярих хэлэх зүйл байна. Даанч энэ бүхнийг унших зав байгаа болов уу. Анхаарал тавьсанд явдалд баярлалаа.

-       УИХ-аас төсвийг баталдаг. төсвийн талаарх асуудлууд нээлттэй. Хэрвээ та энэ талаар мэдээлэл авахыг хүсвэл www.legalinfo.mn гэсэн хаягруу ороод тухайн жилийн төсвийн хуулийг харах боломжтой. Миний хувьд Бор-Өндөр хотын хөгжилд анхаарч ажиллаж байгаа. Тухайлбал Залуучуудын 40 айлын орон сууц, 250 суудалтай сургуулийн өргөтгөл, 100 хүүхдийн дотуур байр, мөн түүнчлэн сургууль, цэцэрлэгийн засварын ажлыг дуусгасан. Бор-Өндөр хотын статусын талаар УИХ, Засгийн газар, Ерөнхийлөгчийн түвшинд ярьсан. Энэ асуудлыг шийдэхийн тулд Үндсэн хуульд өөрчлөлт оруулах шаардлагатай учраас гацаанд ороод байгаа.

-       Аймаг болон сумдын залуучуудынхаа оюуны боловсролд анхаарал хандуулахгүй бол манай аймаг гэмт хэргийн тоогоор улсдаа дандаа дээгүүр байранд явж байна.Энэ тал дээр анхаарал хандуулаасай гэж 3-н гишүүнээсээ хүсье. Аймгийн Оюутан залуучуудын холбоо гэж байна уу? ажилладаг юмуу.Аймгийн Site-г шинэчилж ажилд оруулмаар байна. Тэндээс аймагтаа юу болж байгаа талаар мэдээллийг цаг алдалгүй авч баймаар байна.Миний хувьд залуу хүн аймагтаа юу болж байгаа талаар надад ямар ч мэдээлэл алга.Аймгийнхаа чадварлаг залуусын хүчийг авч ажиллавал ямар вэ? / Хотод болон аймаг хөдөө сумдад байгаа залуус /

-       Ер нь миний хувьд залуучуудын боловсролын тал дээр анхаарч ажилладаг гэдгээ хэлмээр байна. Манай нам ч энэ тал дээр ихээхэн ажлуудыг хийж байгааг та бүхэн мэдэх байх. Аймгийн оюутны холбоо гэж ажиллаж байгаа. Орхонбаяр гэж залуу тэргүүнээр нь ажилладаг.Аймгийн вэб сайтыг Хэнтий аймаг дахь хариуцсан ажилтан нь л мэдэх байх. Уг нь ажилладаг шүү дээ. Таны залуучуудын хүчийг авч ажиллуулах санал их зөв зүйтэй санал байна. Дэмжих болно.

-       Зууны мэдээ сонины 2010.09.20-ны дугаарт "Чингис хааны түүхийг хадгалсан Бурхан халдунд хятадууд халдлаа" гарчигтай нийтлэлийг уншаад маш их харамсал төрлөө. Энэ нутгаас сонгогдсон эрхэм төрийн түшээ та өвөг дээдсийнхээ онгон шүтээнийг хамгаалах талаар, энэ нутаг дэвсгэрт олгогдсон хайгуулын лицензийг цуцлуулах талаар ямар ажил хийж байна вэ? Ашигт малтмалаа олборлож эдийн засгийн эргэлтэнд оруулах нь зүйн хэрэг боловч эртний түүх соёлоо, байгаль дэлхийгээ хамгаалах нь түүнээс чухал юм.

-       “Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хуулийг 2009 оны 7 сард батлуулсан. Ингэснээр зөвхөн Хэнтий аймаг гэлтгүй Монгол улсын хэмжээнд тус хуулийн хүрээнд олон газрын лицензийг цуцлаж байгал орчныг сүйтгэж байгаа асуудлууд цэгцэрч байгаа. Одоогоор 250 орчим лицензийг цуцлах талаар яригдаж байна.

-       Байгаль хамгаална гэдэг асуудал хуулийн хүрээнд байгаа гэж та боддог уу? Та тойргийнхоо сумдын төсөвт байгаль хамгаалах болон байгаль хамгаалагч, байгаль орчны ажилтнуудын ажиллах нөхцөл хангах талаар 1 төгрөг зоогдсон байна уу үгүй юу? Одоо ирэх оны төсөв мөн л ийм байх нь тодорхой. Төрийн албан хаагчид шүү дээ. Байгаль орчны ажилтнууд. Ажлаа хиймээр байдаг.Төрийн албаны тухай хууль, Байгаль орчныг хамгаалах тухай хууль болон холбогдох хуулиуд зөрчигдөөд байх шиг. Энэ талаар та нэг бодож үзвэл, анхаарал тавибал.......

-       Зөв зүйтэй асуудал байна. Миний хувьд байгаль орчны чиглэлийн бүхий л асуудалд анхаарал хандуулж ажилладаг.

-       Төсвөө хаашаа зарцуулж байгаа вэ? Энэ талаар иргэддээ нээлттэй мэдээлэл өгч болох уу?

-       Төсөв төсвийн тухай хуулийн дагуу яваа. Зарцуулалт, хөрөнгө оруулалт гээд бүх зүйл нь нээлттэй байгаа. Энэ тал дээр эргээд тайлангаа гаргадаг шүү дээ.

-       Миний асуудлыг холбогдох хүмүүст дамжуулж өгөөч. Эх орны хишиг яагаад орж ирэхгүй байгаа бол. Бичиг баримтын зөрчилтэй байгаа бололтой. Ямар зөрчил гэдгийг нь мэдэхгүй байна. Үүнийг нээлттэй болгооч.

-       Энэ асуудлаар та тухайн харъяалагдах орон нутгийн захиргаанд болон иргэний бүртгэл мэдээллийн албанд хандах нь илүү оновчтой байх. Тэгээд ч дээрх асуудлаар хэвлэл мэдээллийн хэрэгслээр хангалттай сурталчилгаа тайлбар гарч байгаа.