Ерөнхий сайд С.Баяр УИХ-ын Тамгын газарт УИХ-ын ээлжит бус чуулган хуралдуулах санал хүргүүлсэн байна. Ерөнхий сайд яг ямар шалтгаанаар чуулган хуралдуулан болсон нь албан ёсоор тодорхойгүй байгаа ч, хаврын чуулган хаахаас өмнө УИХ-ын баталсан Оюутолгойн хөрөнгө оруулагчидтай гэрээ байгуулах эрхийг ЗГ-т өгсөн тогтоолтой холбоотой нь тодорхой юм. Хөрөнгө оруулагчдад ихээхэн хатуудсан хэмээх энэ тогтоолыг "барин" ЗГ хөрөнгө оруулагчидтай өнгөрсөн долоо хоногоос эхлэн хэлэлцээрийн ширээнд суусан ч ажил урагш муутай байна.

УИХ-ын дарга Д.Дэмбэрэл өөрийн сонгогдсон тойрог Ховдод ажиллаад өчигдөр ирсэн бөгөөд өнөөдөр Ерөнхий сайдын саналтай танилцах бололтой. Ээлжит бус чуулганыг энэ сарын 10-нд хийж болзошгүй, УИХ-ын ТГ үүнд аль хэдийнээ бэлтгэж эхэлсэн гэсэн “шуум” ч байна. УИХ-ын гишүүдийн хувьд нилээдгүй нь гадаад явж, зарим хэсэг нь хөдөө орон нутагт тойрогтоо ажиллаж байгаа юм.

Харин УИХ-ын даргыг Ерөнхий сайдын саналтай танилцаж байх үед, Ерөнхий сайд Хөвсгөл далайд хэд хоног амархаар өнөө маргаашгүй мордох гэж байгаа ажээ.