УИХ-ын гишүүн, УИХ дахь МАХН-ын бүлгийн дарга Д.Лүндээжанцан, УИХ дахь АН-ын бүлгийн дарга Ч.Сайханбилэг, манай оронд айлчилж байгаа АНУ-ын Конгрессын Төлөөлөгчдийн танхимын гишүүн ноён Дэвид Прайс, ноён Верн Буканан нар өнөөдөр сэтгүүлчдэд мэдээлэл хийлээ.

УИХ-ын дэд дарга Г.Батхүү тэргүүтэй төлөөлөгчид өнгөрсөн гуравдугаар сард, УИХ-ын гишүүн, Гадаад хэргийн сайд Су.Батболд нарын төлөөлөгчид саяхан АНУ-д айлчилж, тус улсын Конгрессын танхимын гишүүдтэй уулзсаныг мэдээллийн эхэнд УИХ-ын гишүүн Ч.Сайханбилэг дурдав. Энэ уулзалтын үргэлжлэл болгон АНУ-ын Конгрессын Ардчиллыг дэмжих комиссын шугамаар манай улсад айлчлал хийж буй АНУ-ын Конгрессын гишүүдийн ажил хэрэгч уулзалтууд үр дүнтэй болно гэдэгт найдаж байгаагаа тэрбээр илэрхийллээ.

АНУ-ын Конгрессын төлөөлөгчдийн танхимын гишүүн Дэвид Прайс “Бид өнөөдөр УИХ-ын дарга Д. Дэмбэрэл, УИХ-ын олон гишүүнтэй уулзаж санал солилцлоо. Уулзалтын үеэр Афганистанд явуулж байгаа ажиллагааг Монгол Улс дэмжин оролцож байгаад талархлаа илэрхийлсэн. Түүнчлэн ил тод худалдааны харилцааг бэхжүүлэх талаар ярилцлаа. УИХ-ыг ардчиллын илүү чухал хэрэгсэл болгох талаар харилцан хамтын ажиллагаагаа өргөжүүлэх хүрээнд уулзалтын яриа хэлэлцээний багагүй цагийг зарцууллаа.

Хууль тогтоох байгууллагыг чухал шийдвэрийг гаргах, сайн хууль батлахад гишүүдийг нь найдвартай, үнэн зөв мэдээллээр хангах алба үнэхээр чухал үүрэгтэй байдаг. Тиймээс УИХ-ын Тамгын газар 40 гаруй хүний бүрэлдэхүүнтэй судалгааны албатай болсонд баяр хүргэмээр байна” гээд шинэхэн судалгааны албанд чадлын хэрээр тусалж, тус албаны ажилтнуудыг цаашид сургалтад хамруулахад бэлэн байгаагаа онцлов.

Мөн ноён Дэвид Прайс УИХ-ын гишүүний ёс зүйн дүрэм гэх мэт чухал хуулийг баталсныг сайшаагаад Монголд айлчлан хоёр талын хамтын ажиллагааг нэг алхмаар урагшлуулахаар ажиллаж байгаадаа баяртай байгаагаа илэрхийлж байлаа.

Айлчлалын бүрэлдэхүүнд Конгрессын зургаан гишүүнээс гадна Конгрессын ажлын хэсгийн гишүүд багтсан. 100 гаруй жилийн ажлын туршлагатай ажлын хэсгийн гишүүд УИХ-ын ажлын хэсгийн гишүүдтэй уулзан туршлагаасаа хуваалцан, санал солилцсон нь ихээхэн үр дүнтэй болсон нь дамжиггүй гэж тэрбээр хэлэв. Цаашдаа хоёр орны худалдааны харилцааг өргөжүүлэх, ардчиллыг байнга хөхиүлэн дэмжиж ирсэн хамтын ажиллагаа өргөжинө гэдэгт эргэлзэхгүй байгаагаа илэрхийллээ гэж УИХ-ын Хэвлэл мэдээлэл, сурталчилгааны хэлтсээс мэдээллээ.