Өнгөрсөн онд манай улсын нутаг дэвсгэрийн 70 гаруй хувь нь гантай, зуншлага муу байсан бөгөөд одоогоор нийт нутгийн 90 гаруй хувь нь цасан бүрхүүлтэй байна.
Өвөлжилт хүндэрч 19 аймгийн 198 сум зудтай, үүнээс 94 сум гамшгийн байдалд хүрээд байгаа талаар Шадар сайд, Онцгой комиссын дарга М.Энхболд мэдээлэв.

Өнгөрсөн оны 9 дүгээр сараас энэ оны 1 дүгээр сарын эхний 10 хоног хүртэл хугацаанд улсын хэмжээнд 453 мянга гаруй толгой мал хорогдоод байгаагийн 89,2 хувь нь Баян-Өлгий, Увс, Ховд, Завхан, Говь-Алтай, Өвөрхангай, Дундговь, Төв, Өмнөговь, Хөвсгөл аймагт ноогдож байгаа юм.

Засгийн газар, Улсын Онцгой комисс дэс дараатай арга хэмжээг тухай бүр нь авч байгаа ч цаг агаарын аюулт үзэгдлийн давтамж нэмэгдэн, өвөлжилт нэн хүндрээд байна.
Иймээс зөвхөн төр, засаг гэлтгүй бүх нийтээрээ малчдад туслахыг Улсын Онцгой комисс уриалж ард иргэд, төрийн болон төрийн бус байгууллага, аж ахуйн нэгж, гадаадын улс орнууд, олон улсын байгууллагад хандсан юм. Нийслэл Улаанбаатар хотноо үйл ажиллагаа явуулдаг 21 аймгийн Нутгийн зөвлөл ч хандивын энэ аянд идэвхтэй оролцохоо мэдэгдлээ.

Цаашид цасанд боогдсон, төвөөс алслагдсан малчдын байдалтай нисдэг тэргээр явж танилцан цагийн байдалд үнэлгээ өгөх, аймгуудаас ирж байгаа мэдээллийг үнэн зөв гаргах, зарим сумыг эмнэлгийн автомашинтай болгох, хил залгаа ОХУ, БНХАУ-аас өвс авах талаар хэлэлцэх, зарим хилийн боомтыг ажиллуулах, туулах чадвар сайтай техник хэрэгслийг сумдад байршуулах, тариаланчдад байгаа 48 мянган тонн улаан буудайг малын тэжээл хэлбэрээр олгох зэрэг саналыг Нутгийн зөвлөлийн дарга нар гаргав.
Улсын Онцгой комисс дээрх саналуудыг хэлэлцэн цаашид авч хэрэгжүүлэх арга хэмжээндээ тусгана гэж Монгол Улсын Шадар сайд М.Энхболд хэлэв.

Тодруулга :

Улсын хэмжээнд 14000 тонн өвс, 16000 тонн тэжээл нөөцөлсөн бөгөөд Засгийн газрын 367 дугаар тогтоолоор 4000 тонн өвс, 6000 тонн тэжээлийг борлуулаад байна. Мөн 7 аймагт 2000 тонн тэжээл хүргэхэд 900 сая төгрөг зарцуулжээ.
Өвөлжилт хүндэрч байгаатай холбогдуулан Засгийн газрын ээлжит бус хуралдаан 2010 оны 01 дүгээр сарын 11-ний өдөр болж зохих шийдвэр гаргасан.
Энэ дагуу өвөлжилт хүндэрсэн Баян-Өлгий, Завхан, Увс, Ховд, Хөвсгөл, Говь-Алтай, Баянхонгор, Архангай, Өвөрхангай, Дундговь, Өмнөговь, Төв аймаг дахь улсын нөөцийн цэг, салбаруудад байгаа өвс, тэжээлийг 50 хувь хямдруулан худалдах болсон.
Хямдруулан худалдах 4000 тонн өвс, 5000 тонн тэжээлийн үнийн зөрүү, орон нутгийн чанартай автозамыг цэвэрлэх, сум, багт өвс, тэжээл хүргэх тээврийн зардал болон нийгмийн халамж, үйлчилгээ үзүүлж байгаа автомашины зардалд зориулж 1.088.370.000 /нэг тэрбум наян найман сая гурван зуун далан мянган/ төгрөгийг Засгийн газрын нөөц сангаас гаргахаар тогтоод байна.
Хөвсгөл аймгийн Галт, Увс аймгийн Давст суманд түргэн тусламжийн машин тус бүр нэгийг Улсын нөөцөөс өгч, Улсын нөөцөд 4000 тонн тэжээл нэмж нөхөн бүрдүүлэхээр болсон юм.
Мөн цахилгаан станцуудад 21 хоногоос доошгүй хэмжээний нүүрсний нөөц бүрдүүлэх, дулааны шугам, сүлжээний алдагдлыг зогсоох арга хэмжээ авах, эрчим хүчний салбарт энэ онд улсын төсвөөс олгох татаасыг батлагдсан хугацаанд нь багтаан санхүүжүүлэхийг даалгаад байна гэж Засгийн газрын Хэвлэл, мэдээллийн албанаас мэдээллээ.