Ерөнхийлөгчийн сонгуулийн санал хураалтын дүн хамгийн эхлээд хэсгийн хороодод гардаг.

Энэ нь санал өгсөн 24-нөөс 25-ндаа гарсан. Үүний дараа анхан шатны тэр дүнг салбар, хэсгийн хороод шилжүүлдэг. Энэ ажиллагаа хуулийнхаа хугацаанд явагджээ. Харин Баян-Өлгий аймгийн зарим сумын баг, Дорнод аймгийн Халх гол сумын мэдээ ирээгүй гэдгээр СЕХ дүнгээ нэгтгэх нь байтугай мэдээлж ч амжаагүй явдал гарсан. Энэ нь “Ганц сум, хэдэн багийн дүн өдийд гараагүй байна гэдэг юу л бол” гэсэн эмзэглэл, хардлагыг хэн хүнгүй төрүүлээд авсан. Салбарын буюу хуучнаар нутаг дэвсгэрийн хороодоос дээшээгээ дүн мэдээгээ хамгийн түрүүнд гаргаж өгсөн нь нийслэлийн Сүхбаатар дүүргийн салбар хороо болоод байна . Тус дүүргийн хэсгийн хороод дүнгээ хурдан шуурхай гаргаж өгснийг салбар хороо нь мөн түргэн нэгтгэж хотын дүүргүүдээс хамгийн түрүү Нийслэлийн сонгуулийн хороонд өргөн барьжээ. Тус хорооныхон санал хураалт явагдсан 24-ний өдөртөө багтаан хамгийн түрүү хурлаа хийж тогтоолоо гаргасан байна.