Ц.Сэдванчиг гишүүн 2008 оны төсвийн гүйцэтгэл, Засгийн газрын санхүүгийн нэгдсэн тайланг сонссонтой холбогдуулан асуулт асуух гэсэн боловч түүний микрофон нь ажилласангүй.


Хавь ойрынхоо эзгүй 2, 3 нь ч гишүүдийн ширээг хэсэж картаа хийгээд барсангүй. Энэ үед Д.Дэмбэрэл дарга “чангахан ярь, чангахан” гэж нилээд хэд “тушаасан” ч нэмэр болсонгүй. Гишүүд наагуур нь шоолон инээлдэж суулаа. Сүүлдээ Ц.Сэдванчиг гишүүн микрофонгүйгээр ярьж эхэллээ. Нилээд ярьж суусны дараа Тамгын газрын ажилтан өөр карт авчирч өгсөн ч микрофонд өөрчлөлт гарсангүй. Гишүүнийг бараг хэлэх юмаа ярьж дуусаж байтал гэнэт микрофон ажиллаж, гишүүн өөрөөсөө айхавтар цочиж, танхимд гишүүд инээлдэв. Ц.Сэдванчиг гишүүн “би бараг хашгирч ярьж байсан байна ш дээ” гэж Д.Дэмбэрэл дарга луу зэмлэнгүй харлаа.