Нийгмийн даатгалын багц хуулийн шинэчилсэн найруулгын ажлын хэсэг хуралдлаа
2021.09.28

Нийгмийн даатгалын багц хуулийн шинэчилсэн найруулгын ажлын хэсэг хуралдлаа

Нийгмийн даатгалын багц хуульд шинэчилсэн найруулга хийгдэх тухай өнгөрөгч 2008 оноос хойш яригдсан ч Хөдөлмөрийн тухай хуулийн шинэчилсэн найруулга хийгдсэний дараа тус хуулийн шинэчлэлийг хийхээр хойшлуулаад байсан. Харин өнгөрсөн долоо дугаар сарын 2-нд УИХ-ын ээлжит хуралдаанаар Хөдөлмөрийн тухай хуулийн шинэчилсэн найруулга батлагдсан.

Нийгмийн даатгалын багц хуульд шинэчилсэн найруулга хийх ажлын хэсэг байгуулагдаж өнгөрөгч зургаа дугаар сараас өнөөг хүртэл тасралтгүй ажиллаж байгаа билээ. Энэ хүрээнд Нийгмийн даатгалын багц хуулийн шинэчилсэн найруулгын ажлын хэсгийн ээлжит хэлэлцүүлэг боллоо.

Хэлэлцүүлэгт тус хуулийн Ажлын хэсгийн ахлагч, МҮЭ-ийн холбооны дэд ерөнхийлөгч С.Эрдэнэбат, МҮЭ-ийн холбооны ЕНБД Г.Адъяа, МЭМА-ны ҮЭХ-ны дарга. Х.Ариунаа, МТХГТА-ны ҮЭХ-ны дарга Б.Рагчаа, Нийслэлийн ҮЭХ-ны дарга С.Жаргалсайхан, МБШУ-ны ҮЭХ-ны дарга З.Цогтгэрэл, МҮЭ-ийн холбооны Хөдөлмөрийн хяналт, хуулийн бодлогын газрын дарга Ц.Отгонтунгалаг, хуулийн мэргэжилтэн М.Саранцацрал, ХНХЯ-ны Төрийн нарийн бичгийн дарга Г.Өнөрбилэг, Бодлого төлөвлөлтийн газрын дарга А.Хишигбаяр, НД-ын бодлогын хэрэгжилтийг зохицуулах газрын дарга Б.Батжаргал, мэргэжилтэн Б.Ундраа, ХНХЯ-ны БТГ-ын ахлах шинжээч С.Орхон, НДЕГ-ын Бодлогын хэрэгжилт судалгааны газрын дарга Ц.Ганцэцэг, Хуулийн төсөл боловсруулах ажлын хэсгийн гишүүн Ц.Дашдондог, Г.Ганчимэг нар оролцлоо.

Энэ үеэр Нийгмийн даатгалын ерөнхий хуулийн тухай, Нийгмийн даатгалын сангаас олгох Үйлдвэрлэлийн осол мэргэжлээс шалтгаалах өвчний тэтгэвэр, тэтгэмжийн төлбөрийн тухай, тэтгэврийн тухай, хувийн нэмэлт тэтгэврийн тухай хуулиудын нэмэлт өөрчлөлтийн тухай тус бүр хэлэлцлээ.

Энэ үеэр НД-ын Багц хуулийн ажлын хэсгийн ахлагч С.Эрдэнэбат Нийгмийн даатгалын ерөнхий хуульд МҮЭ-ийн холбооноос баримталж буй зарчмын зөрүүтэй хэд хэдэн саналыг танилцууллаа.

“Тэтгэврийн нөөц сан байгуулах хөрөнгө төвлөрүүлэх, хуваарилах, хяналт тавих, харилцааг зохицуулсан журмыг НДҮЗ-ийн саналыг үндэслэж Засгийн газар батлах, Даатгуулагч нас барвал түүний тэтгэврийн нөөц санд хуримтлагдсан орлогын 70 хувиас доошгүй хэсгийг нь хууль ёсны өв залгамжлагчид нь өвлүүлэх, өвлүүлэхтэй холбогдсон харилцааг зохицуулсан журмыг НДҮЗ-ийн саналыг харгалзан Засгийн газраас батлах, ажилтанд олгож байгаа түлээ нүүрс, хоол, унааны мөнгөнөөс НДШ татаж авахгүй байх, шаардлагатай тохиолдолд Төсвийн тухай хуульд заасан хугацаанд нийгмийн даатгалын сангийн төсвийн гүйцэтгэл, санхүүгийн тайланг хувийн аудитын байгууллагад хүргүүлж, аудит хийсэн тайланг тогтоосон хугацаанд НДҮЗ-д хүргүүлэх, Нийгмийн даатгалын сангийн мөнгөн хөрөнгийг зарцуулах тухай шийдвэрийг УИХ-аас гаргахдаа Нийгмийн даатгалын Үндэсний зөвлөлийн саналыг үндэслэн гаргах, Нийгмийн даатгалын Үндэсний зөвлөлд даатгуулагчдыг төлөөлж үндэсний хэмжээний үйлдвэрчний эвлэлийн байгууллагаас гурав хүртэлх төлөөлөл оруулах үүнтэй холбоотой сонгон шалгаруулалтыг ҮЭ-ийн байгууллагынх нь үндэсний хэмжээнд явуулж байгаа чадавхыг харж нээлттэй хэлэлцүүлэг явуулж тав хүртэлх жилийн хугацаатайгаар сонгодог болох, Үндэсний зөвлөлийн дэд даргыг талууд зөвшилцөж ажилтны болон Ажил олгогчийн төлөөллийг гурван жилийн хугацаагаар НДҮЗ-д томилох, НДҮЗ-д орон тооны нэг ажилтан тогтмол ажиллуулах, НДҮЗ нь дэргэдээ мэргэжлийн хороо тогтмол ажиллуулах” зэрэг тус хуульд оруулах нэмэлт өөрчлөлтийн талаарх саналаа танилцуулаа.

Хариуд нь ХНХЯ-ны Төрийн нарийн бичгийн дарга Г.Өнөрбилэг Нийгмийн даатгалын Үндэсний зөвлөлтэй холбоотой заалтуудыг байж болох санал гэж үзсэн ч бусад саналыг дэмжихгүй байгаагаа илэрхийлж байв.

Мөн энэ үеэр Нийгмийн даатгалын сангаас олгох Үйлдвэрлэлийн осол мэргэжлээс шалтгаалах өвчний тэтгэвэр, тэтгэмжийн төлбөрийн тухай, тэтгэврийн тухай, хувийн нэмэлт тэтгэврийн тухай хуулиудын нэмэлт өөрчлөлтийн тухай тус тус хэлэлцэв. Уулзалтын төгсгөлд хэлэлцүүлгээс гарсан талуудын саналыг нэгтгэж Засгийн газарт хүргүүлж холбогдох шат дараатай арга хэмжээг авч ажиллахаар боллоо.