Өнгөрсөн хугацаанд Нийгмийн даатгалын сан /НДС/ тогтмол алдагдалтай, сангийн хөрөнгө эрсдэлд орсон гэх зэрэг асуудал яригдаж байсан ч төдийлөн шийдэлд хүрч чадаагүй. Ирэх онд л гэхэд тус сан 2.1 их наяд төгрөгийн бодит алдагдалд хүрэхээр байгааг салбарын сайд онцолж байсан.

Өнөөдөр НДШ төлж байгаа залуучууд ирээдүйд тэтгэвэртэй байх эсэх тухай асуудлыг орхигдуулж хэрхэвч болохгүй. Энэ хүрээнд Л.Энх-Амгалан сайд ажлаа авсан даруйдаа салбарынхаа өмнө тулгамдаж байгаа асуудлууд руу шуурхайлан орж, нийгмийн хамгааллын салбарт доголдоод байгаа олон асуудлыг шат дараатайгаар шийдвэрлэхээр шамдан ажиллаж буй.

Тодруулбал, тэрбээр Гэр бүл, хөдөлмөр, нийгмийн хамгааллын сайдын ажлаа хүлээн авч, Нийгмийн даатгалын үндэсний хорооны дарга болсон. Ингэхдээ:

Нэгт, мэргэжлийн хороог байгуулсан бөгөөд хөрөнгө оруулалтын менежментийн чиглэлийн есөн зөвлөх ажиллаж буй. Эдгээр мэргэжилтнүүд нийгмийн даатгалын сангийн хөрөнгийг ямар хэлбэрээр байршуулбал үр өгөөжтэй, эрсдэлгүй байх вэ гэдэг шийдлийг Нийгмийн даатгалын үндэсний хороодод зөвлөдөг. Үүн дээр тулгуурлаж шийдвэрээ гаргадаг байна.
Хоёрт, Олон нийтийн хяналтын зөвлөлийг байгуулсан. Нийгмийн даатгалын сангийн хөрөнгө өнөөдөр аль банканд ямар хүүтэй хадгалагдаж байгаа нь нээлттэй байдаггүй байсан. Тэгвэл өнөөдөр нийгмийн даатгалын ерөнхий газрын вэб сайт руу ороход энэ бүх мэдээлэл ил тод болжээ.
Гуравт, нийгмийн даатгалын санг алдагдалд оруулсан буруутай этгээдийг тогтоолгохоор прокурорт гомдол гаргасан байдаг.

Гэр бүл, хөдөлмөр, нийгмийн хамгааллын сайд Л.Энх-Амгалан,

"НДС-ийн хөрөнгө бол төрийн мөнгө биш. Даатгуулагчдын мөнгө учраас тэдний эрх ашгийг тэргүүн зэрэгт тавих ёстой. Тиймээс бид яг хэдэн онд Нийгмийн даатгалын Үндэсний зөвлөлийн бүрэлдэхүүний ямар шийдвэрүүд гарч байсныг эргэж хараад, шийдвэр гаргахдаа тухайн үед хэрэгжиж байсан холбогдох хууль журмуудыг мөрдөж чадаж байсан уу, үгүй юу гэдгийг ил тод нээлттэй болгох ёстой. Энэ утгаараа анх удаа прокурорт хүсэлт гаргаж байна" хэмээн мэдээлж байсан.

Капитал банк ХХК-аас 104.2 тэрбум, Чингис хаан банк ХХК-аас 103.57 тэрбум төгрөг нийт 207.77 тэрбум төгрөгийн өр төлбөрийг гаргуулан нийгмийн даатгалын санд төвлөрүүлэх ШҮҮХИЙН ШИЙДВЭР гарсан.

Өнөөдрийн байдлаар нийт өрийн 22.7 хувь буюу 47.22 тэрбум төгрөгийг мөнгө болон хөрөнгөөр барагдуулАВ.

Цаашдаа хууль, хяналтын байгууллага болон нийгмийн даатгалын үндэсний зөвлөлийн дэргэдэх Мэргэжлийн хороо, Олон нийтийн хяналтын зөвлөлийн арга зүйн болон хууль, эрхзүйн зөвлөгөөнд үндэслэн, авлага барагдуулах ажлыг эрчимжүүлэн ажиллах тухайгаа Л.Энх-Амгалан сайд онцлов. Мөн нийгмийн даатгалын сангийн чөлөөт үлдэгдлийг АРИЛЖААНЫ БАНКУУДАД байршуулж, мөнгөн хадгаламжийг хүүг тооцох асуудлыг хэлэлцлээ.

Үйлдвэрлэлийн осол, мэргэжлээс шалтгаалах өвчний даатгал нь хамгийн их шимтгэл авдаг ч эргээд даатгуулагчийнхаа ЭРХ АШГИЙГ ХАМГААЛДАГГҮЙ. Тиймээс цаашдаа ХӨДӨЛМӨРИЙН ЭРҮҮЛ МЭНДИЙГ чухалчилж, урьдчилан сэргийлэх, нөхөн сэргээх үйлчилгээг сайжруулж, даатгалын тогтолцоог сайжруулна. Мөн хөдөлмөрийн осол гардаггүй газарт шимтгэлийн хөнгөлөлт үзүүлдэг болно.

УИХ-ын хаврын чуулганд Хөдөлмөрийн эрүүл мэнд, аюулгүй байдлын тухай хуулийн төслийг өргөн барихаар төлөвлөн ажиллаж байна.

Л.Энх-Амгалан: Чингис хаан банк болон Капитал банкнаас 47.22 тэрбум төгрөгийг барагдуулж, НДС-нд төвлөрүүллээ