Өнөөдөр 10 цаг Засгийн газар ээлжит бус хуралдаан хийхээр боллоо. Ээлжит бус хуралдаанаар Оюутолгойн хөрөнгө оруулалтын гэрээний асуудлыг хэлэлцэх ажээ.

Хаврын чуулган хаахыг өмнө УИХ-аас баталсан тогтоолоор ЗГ-ыг хөрөнгө оруулагчтай гэрээ байгуулах “тушаал” өгсөн ч, ажлын хэсгийнхнээс гэрээ байгуулах үйл явцын талаар “ажил хүнд байна, амаргүй байна,“ гэсэн нэг л хариултыг өгөөд байгаа билээ. Үнэхээр ч хөрөнгө оруулагчдад хатуудсан гэх энэ тогтоолыг бариад гэрээ байгуулна гэдэг хүнд гэдгийг тогтоолын төсөл батлагдах үед бүгд мэдэж байсан юм.

Үүнтэй холбогдуулан Ерөнхий сайд өнгөрсөн долоо хоногт УИХ-ын Тамгын Газарт УИХ-ын ээлжит бус чуулган хуралдуулах санал хүргүүлсэн ч, Д.Дэмбэрэл дарга хариу өгөхгүй “гэдийсээр” байгаа.

Харин өнөөдрийн ЗГ-ын ээлжит бус хуралдаанаар гэрээ байгуулах ажлын явцтай танилцаад, энэ асуудлыг эцэслэн шийдвэрлэх бололтой.