УИХ-ын гишүүн Су.Батболд, С.Бямбацогт, Д,Лүндээжанцан нар сэтгүүлчдэд мэдээлэл хийлээ. Тэд уламжлалт цагаан сарын баяр болохтой холбогдуулж аж ахуйн нэгжүүдийг үйлдвэрлэсэн бараа, бүтээгдэхүүнийхээ үнийг буулгаж, хэрэглэгчиддээ хямдрал зарлахыг уриаллаа.

Баяр болоход дэлхийн бусад орнууд бараа, бүтээгдэхүүнийхээ үнийг бодитоор буулгаж хямдрал зарладаг бол манайд энэ нь эсрэгээрээ баяраар далимдуулж үнээ өсгөдөг.

Энэ байдал цагаан сар дөхөж байгаа өдрүүдэд улам эрчимжиж байна. Тиймээс УИХ дахь МАН-ын бүлгээс дээрх уриалгыг гаргаж байна гэдгээ тэд онцлов.

Мөн тэд Засгийн газраас гол нэрийн бараа бүтээгдэхүүний үнийг тогтворжуулах зорилгоор тодорхой хөтөлбөр хэрэгжүүлж аж ахуйн нэгжүүдэд хөнгөлөлттэй нөхцөлөөр урт хугацааны 780 тэрбум төгрөгийг зээлээр олгосон боловч үр дүн харагдахгүй байгаа талаар шүүмжиллээ. Тэд “Махны үнийг тогтворжуулах хүрээнд 87 тэрбум төгрөгийн зээлийг аж ахуйн нэгжид олгосон ч хүнсний зах дээр худалдаалж байгаа махны үнэ үхэр нэг кг нь 8300, хонь 7600 төгрөгийн үнэтэй байгаа.

Нөөцийн махны үнэ 5700-5200 төгрөгийн үнэтэйгээр хэрэглэгчдийн гарт хүрч байгаа нь Засгийн газар үнийн өсөлтөөс иргэдээ хамгаалж чадахгүй байгааг харуулж буйн нотолгоо.

Өмнөх Засгийн газар иргэн бүртээ сар тутамд 21 мянган төгрөг олгож, цалин, тэтгэврийг 2.5-3 дахин нэмэгдүүлэхэд Ардчилсан намынхан “Бараа бүтээгдэхүүний үнийг өсгөлгөө” гэдэг байсан. Гэтэл өнөөдөр хүн бүрт бэлнээр мөнгө тараагаагүй, цалин, тэтгэвэр нэмээгүй байхад бараа бүтээгдэхүүний үнэ өсч буй нь яах аргагүй Засгийн газраас хэрэгжүүлж байгаа бодлого хөтөлбөр иргэдэд хүрэхгүй байгааг харуулсан хэрэг болж байна. Тийм учраас Засгийн газар хэрэгжүүлж байгаа арга хэмжээндээ үнэлэлт дүгнэлт өгч ард түмнийхээ амьдралын гүнд орж ажиллах цаг болсон” гэж онцоллоо.

Тухайлбал, “Гурилын үнийг тогтворжуулах хөтөлбөрийн хүрээнд 61 тэрбум төгрөгийн зээлийг аж ахуйн нэгжид хөнгөлөлттэй нөхцөлөөр олгосон. Нэгдүгээр зэргийн гурилыг 1 кг-ыг нь 550 төгрөгөөс дотогш барина гэсэн ч “Алтан тариа” компанийн дээд зэргийн гурил 1 кг нь 1000 төгрөгт хүрсэн. Энэ бол үнийн өсөлт бодитой явж байгаагийн жишээ. Ер нь бол Засгийн газар үнийг тогтворжуулах хөтөлбөрийн хүрээнд зөвхөн гэрээ байгуулсан аж ахуйн нэгжийн хүрээнд л асуудлыг шийднэ. Гэрээ байгуулаагүй аж ахуйн нэгж үнээ яаж ч өсгөсөн бид хязгаарлах бололцоо байхгүй гэж өөрсдөөсөө холдуулах нь буруу. Үүнд ч анхаарлаа хандуулах ёстой” гэсэн байр суурийг УИХ-ын гишүүн С.Бямбацогт хэллээ.

Бараа, бүтээгдэхүүний үнийг буулгахыг уриалав