БОНХАЖ-ын сайд Д.Оюунхорол өчигдөр Монголд эх орноо төлөөлөн суугаа гурван орны Элчин сайдтай уулзлаа.

БОНХАЖ-ын сайд Д.Оюунхорол ажлаа аваад тус салбартай холбоотой ажилладаг, төсөл хөтөлбөр хэрэгжүүлдэг улс орнууд, олон улсын байгууллагынхантай бараг өдөр алгасахгүй уулзаж байна. Уулзалт бүхэн уламжлалт хамтын ажиллагаагаа бэхжүүлэх, цаашид ямар нэгэн шинэ хамтын ажиллагааны сэжүүр үүсгэх, дахин дахин ярилцах тохиролцоотой үлдэж байгааг хэлэх хэрэгтэй.

Ардчиллын жилүүдэд Монголд гаднын дэмжлэгээр асар олон төсөл, хөтөлбөрүүд хэрэгжсэн, өнөөдөр ч хэрэгжиж байгаа. Мэдээж бүгд үр дүнтэй хэрэгжсэн гэх тайлан тавьдаг. Гэхдээ Монгол Улсын нийгэм, эдийн засгийн хөгжилд дэвшил авчирч, ард иргэдийн амьдрал ахуйг сайжруулах зорилгоор төсөл хөтөлбөр хэрэгжүүлдэг ч тэр бүр яг амьдралд “наалдаж” үлддэггүйг нийтээрээ мэднэ.

Харин БОНХАЖ-ын сайд Д.Оюунхорол гадныхантай уулзах бүртээ нэг л зүйлийг ойлгуулах гэж, ажил хэрэг болгох гэж хичээж байгааг анзаарав.

Тэр нь гаднын улс орнууд, олон улсын байгууллагуудын Монголыг гээд сэтгэл гаргаж өгсөн төсөл, мөнгийг үр ашигтай зарцуулах юмсан, өгөөж нь иргэдийн амьдралд дэм болж, ахуй нөхцөлийг нь сайжруулсан байгаасай гэсэн хүсэл.

Ингээд өчигдөр уулзсан гурван Элчин сайдтай юу ярьсныг сийрүүлье.

Япон Улсаас Монголд суугаа Элчин сайд Такэнори Шимизүтэй хийсэн уулзалт:

БОНХАЖ-ын сайд Д.Оюунхорол, Элчин сайд Такэнори Шимизү нарын уулзалтаар хамтын ажиллагааны өргөн хүрээтэй асуудлаар санал солилцсон.

Тус улсын Засгийн газрын дэмжлэгтэй хэд хэдэн төслийг БОНХАЖЯ хамтран хэрэгжүүлдэг юм байна. Мэдээж уламжлалт хамтын ажиллагаа үргэлжилнэ. Дээр нь аялал жуулчлалын салбарын шинэ хамтын ажиллагааны шанг татахаар ерөнхий ойлголцолд хүрсэн юм.

Ноён Элчин сайдын хэлснээр Япон улс аялал жуулчлалын салбарт арвин баялаг туршлагатай, гаднаас жуулчид хүлээн авдаг ч, гадагшаа аялдаг ч орон аж. Тус улс жилд гаднаас 13 сая жуулчин хүлээн авдаг бол өнгөрсөн жил тус улсын иргэдийн аялал жуулчлалаар Сингапурт гэхэд л 600 сая ам.долларын орлого олжээ.

Үүнээс өмнө Японы аялал жуулчлалын холбоо-ЖАТА байгууллагын дэргэдМонголын салбар зөвлөл байгуулагдаад байгаа юм байна. Ийм салбар зөвлөлтэй болсноор тус улсын иргэдийг Монгол руу аялуулах асуудлыг өргөжүүлэх бодлого боловсруулж, хамтарсан сурталчилгаа хийх боломжтой болжээ. Ирэх гуравдугаар сард Монгол Улс Берлинд болох “ITB Berlin-2015” олон улсын үзэсгэлэнд түнш орноор оролцоно. Тус үзэсгэлэнд түншээр оролцсон улсад ирэх жуулчдын тоо эрс нэмэгддэг. Дээр нь Японы хөрөнгө оруулалтаар баригдаж буй Хөшигийн хөндийн шинэ нисэх онгоцны буудал 2017 онд ашиглалтад орохоор Монголд ирэх жуулчдын тоо эрс нэмэгдэнэ. Гагцхүү бэлтгэл ажлыг сайн хангах хэрэгтэй гэдэг дээр БОНХАЖ-ын сайд Д.Оюунхорол, Японы Элчин сайд Такэнори Шимизү нар санал нэгдсэн билээ.

Тиймээс ард иргэдэд үр өгөөжөө хамгийн хүртээмжтэй, бодитоор өгдөг аялал жуулчлалын салбарт хамтран ажиллах асуудлыг дахин нухацтай ярилцаж, шинэ шанг татахаар харилцан ойлголцлоо.

БНХАУ-аас Монгол Улсад суугаа Элчин сайд Ван Шяолунтай хийсэн уулзалт:

БНХАУ-ын дарга Си Зиньпиний Монгол Улсад хийсэн төрийн айлчлалын үеэр хоёр улсын Засгийн газар хооронд “Нүүрснээс байгалийн хий үйлдвэрлэх, экспортлох” төслийг хамтран хэрэгжүүлэх, дэмжлэг үзүүлэх тухай хэлэлцээрт гарын үсэг зурсан.Уг төслийг хэрэгжүүлэхээр хоёр тал цаашид нягт хамтран ажиллах шаардлагатай байгааг ярилцсан юм. Уг төсөл хэрэгжсэнээр жилд 16 тэрбум куб метр хий үйлдвэрлэх хүчин чадалтай үйлдвэр баригдах бөгөөд гарах бүтээгдэхүүний 10 орчим хувиар нь нийслэлийн хэрэгцээг хангаж, утааг бууруулахад үлэмж хувь нэмрээ оруулах ажээ.

Уг уулзалтын үеэр БОНХАЖ-ийн сайд Д.Оюунхорол нэг зүйлийг аминчлан хүссэн нь БНХАУ—ын талтай хамтран гэр хороооллын хөрсний бохирдлыг бууруулах, арилгах асуудлыг шийдвэрлэх асуудлыг тавьсан.

Нийслэлийн хүн амын дийлэнх нь гэр хороололд амьдарч байгаа ба 00-ийн асуудлаа шийдвэрлээгүйгээс хөрс бохирдож, улмаар элдэв халдварт өвчин гарах гол нөхцөл болж байна. Тиймээс иргэдийн ахуй нөхцөлийг сайжруулах энэ асуудлаар хамтран ажиллахыг хүссэн юм. Элчин сайд уг асуудлыг БНХАУ-аас Монголд үзүүлж буй буцалтгүй тусламжийн хүрээнд шийдвэрлэх боломжтойг хэлж, тохиролцоонд хүрсэн юм.

БОНХАЖ-ын сайд Д.Оюунхорол хүсэлтийг нь хүлээн авсанд Элчин сайдад талархал илэрхийлж, урд хөршид хийх айлчлалынхаа хүрээнд ажил хэрэг болгохыг эрмэлзэж байгаагаа хэллээ.

ИБУИНВУ-аас Монгол Улсад суугаа Онц бөгөөд Бүрэн эрхт Элчин сайд Кристофер Стюарттай хийсэн уулзалт:

Их Британид төвтэй “Экологийн хамгаалал, хөгжилд хандивлагч сан” БОНХАЖЯ-тай хамтран ажиллаж эхэлжээ. Уг байгууллага тогтвортой хөгжил буюу байгаль хамгааллын асуудлыг бодлогын цөмдөө тавиад эрүүл мэнд, боловсрол, санхүү зэрэг бусад асуудлыг уялдуулан хөгжлийн бодлогыг цогцоор нь харж судлан, хөгжлийн загварыг санал болгодог ажээ.

Монголд хэрэгжих уг төслийн баг бэлтгэл ажлаа хангаад, одоо үндсэн бүрэлдэхүүнээр ажиллахад бэлэн болжээ. Тиймээс төслийн баг бүрэлдэхүүнд БОНХАЖ-ын сайдын оролцоо чухал байгааг Элчин сайд хэлсэн юм.

БОНХАЖ-ын сайд Д.Оюунхоролын хувьд, аливаа төсөл, хөтөлбөр хэрэгжвэл аль болох иргэдийн амьжиргаанд нэмэр болсон, амьдрах нөхцөлийг сайжруулахад чиглэх ёстой гэсэн байр сууриа дахин давтаж, байгаль орчныг хамгаалах чиглэлээр ажиллаж буй иргэний нийгмийн байгууллагуудыг төлөвшүүлэхэд хамтран ажиллах сонирхолтойгоо илэрхийлсэн юм.

БОНХАЖ-ын сайд Д.Оюунхорол элчин сайдуудтай уулзахдаа юу ярив