Гурван жилийн өмнөөс л Алтайн болон Хангайн чонын тоо толгой хэт өсч хүн малруу дайрах эрсдэл эрс нэмэгдсэн тул чөлөөтэй агнадаг болох зохицуулалтыг хийх ёстой талаар УИХ-ын гишүүн, Батлан хамгаалахын сайд С.Бямбацогт холбогдох яаманд удаа дараа хандаж ирсэн.

Байгалийн нөөц ашигласны төлбөрийн тухай хуулийн 22.1.3-т мал сүргийг хамгаалах болон тодорхой нутаг дэвсгэрт тоо толгойг нь сийрэгжүүлэх зорилгоор чоно агнахад ан амьтны нөөц ашигласны төлбөрөөс чөлөөлөх зохицуулалттай байдаг. Гэсэн хэдий ч малчид чоно агнахын тулд заавал сургалтад суух, сумын Засаг даргаасаа урьдчилан зөвшөөрөл авах, 240 хүртэлх мянган төгрөгийн хураамж төлөх зэрэг олон шат дамжлага дамжин чоно агнах зөвшөөрөл авах зохицуулалттай байгаа нь бодит амьдрал дээр олон хүндрэл үүсгэсээр байгаа.

БОУАӨЖ сайд С.Одонтуяа зүүн болон говийн бүсээс бусад аймгуудад саарал чонын тоо толгойг сийрэгжүүлэх чиглэлийг өгсөн байна. Хожуу гаргаж байгаа шийдвэр хэдий ч малчдын маань олон жил хүлээсэн зохицуулалт хийгдэж байгаад талархаж байна.

Малчид маань эрдэнэт мал сүрэгээ хамгаалсаныхаа төлөө хариуцлага хүлээж, шийтгэл амсах ёсгүй. Цаашид энэ асуудлыг илүү тодорхой болгож хуульчлах асуудалд онцгой анхаарч ажиллах болно.

БАРУУН БҮСЭД СААРАЛ ЧОНО АГНАХАД ХУУЛЬ ЗӨРЧИЖ, ТОРГУУЛЬ ТӨЛӨХГҮЙ БОЛЛОО