ОЙН ТҮЙМЭРТЭЙ ТЭМЦЭХ ЧАДАВХЫГ САЙЖРУУЛАХАД НҮБ ХӨГЖЛИЙН ХӨТӨЛБӨРТЭЙ ХАМТРАН АЖИЛЛАНА

БНХАУ-ын олон Улсын хөгжлийн хамтын ажиллагааны байгууллагын “Даян дэлхийн хөгжил, өмнөд өмнөдийн хамтын ажиллагааны сан”-ийн буцалтгүй тусламжийн санхүүжилтээр НҮБ Хөгжлийн Хөтөлбөр, ЗГХА Ойн газартай хамтран “Монгол улсын ногоон сэргэлтийн бодлогын хүрээнд ойн түймэртэй тэмцэх чадавхыг сайжруулах” төслийг хэрэгжүүлэх баримт бичигт БОАЖ-ын Сайд Б.Бат-Эрдэнэ, НҮБ Хөгжлийн Хөтөлбөрийн (UNDP) Монгол дахь суурин төлөөлөгч Матилда Димовска нар гарын үсэг зурлаа.

ТҮМЭН ТЭМЭЭНИЙ БАЯРЫГ ГАДНА, ДОТООДЫН 8475 ЖУУЛЧИН ЗОРИН ОЧЖЭЭ
Тэнэгэр говийн бахархал болсон тэмээн сүргээ дэлхийд таниулах, алдаршуулах зорилготой зохион байгуулдаг тэмээчид, уяачид, говь нутгийн зон олны бахархалт баяр болсон "ТҮМЭН ТЭМЭЭНИЙ БАЯР"-ыг дотоодын жуулчдаас гадна гадны жуулчид, сурвалжлагчид олноор зорин иржээ. Олон улсад Тэмээний баярыг Тогтвортой аялал жуулчлалын жишиг загвар гэж үзэн дэлхийн хэмжээний томоохон агентлагууд сурвалжилдаг болсон нь аялал жуулчлалын хөгжилд төдийгүй эх орноо дэлхийд таниулахад хувь нэмрээ оруулж байна.

АЙМАГ, НИЙСЛЭЛИЙН ЗАСАГ ДАРГА НАРТАЙ ХАМТРАН АЖИЛЛАХ ГЭРЭЭ БАЙГУУЛЛАА
Энэхүү гэрээгээр Монгол Улсын Засгийн газар мөрийн хөтөлбөрт тусгасан хөгжлийн хөтөлбөр, төлөвлөгөөнүүд, тэр дундаа ногоон хөгжлийн сэргэлт, аялал жуулчлал, нөхөн сэргээлт, байгалийн нөөц ашигласны төлбөрийн тухай хуулийн хэрэгжилтийг хангах үйл ажиллагааг яамны зүгээс баталгаажуулж буй юм.

ХОЙД БҮСИЙН ХӨГЖЛИЙГ ОРХОН, БУЛГАН, ХӨВСГӨЛ АЙМАГТ ТУЛГУУРЛАН ХИЙНЭ
Монгол Улс 2001 онд бүсчилсэн хөгжлийн бодлого боловсруулахдаа 4 бүсэд хувааж байсан бол энэ удаад говь, хангай, зүүн, баруун, төв, хойд гэж 6 бүсэд хуваажээ. Ингээд “Хойд бүсийн хөгжил”-ийг Орхон, Булган Хөвсгөл аймагт тулгуурлан хөгжүүлэх ба эрдэмтэд, нутгийн иргэдийн санал, судлаачдын гаргасан дүгнэлтэд тулгуурлан боловсруулалт хийгдсэн ба танилцуулгыг БОАЖ-ын Сайд Б.Бат-Эрдэнэ хийлээ.
Хойд бүсийн Тэргүүлэх чиглэл:
- Орхон аймаг - Хүнд аж үйлдвэрийн цогцолбор
- Ухаалаг хөдөө аж ахуй - Булган
- Хөвсгөл аймаг - Аялал жуулчлалын бүс
- Орхон аймаг - Хөдөө аж ахуйн нөөцөд түшиглэсэн хөнгөн үйлдвэр хөгжүүлэх Тэргүүлэх чиглэл барьж ажиллана.

МОНГОЛ УЛСЫН ТОГТООСОН ГИННЕС ДЭЭД АМЖИЛТЫГ АЛБАН ЁСООР БАТАЛГААЖУУЛЖ ОЛОН УЛСАД МЭДЭЭЛЛЭЭ
“МАЗААЛАЙ” олон Улсын мөсний баярын нээлтийн арга хэмжээний онцлох үйл явдал нь Монгол Улс Гиннесийн дээд амжилтыг тогтоох байв. Өөрөөр хэлбэл 12 метр өргөнтэй, 18 метр урттай мөсөн гулгуураар 1 цагийн дотор 408 хүн гулгаснаар Гиннесийн дээд амжилтыг тогтоож, Монгол орны өвлийн аялал жуулчлал дэлхийн газрын зурагт тэмдэглэгдлээ.

ОРОН НУТГИЙН ТАЙЛАН ГАЛБА-ӨӨШ-ДОЛООДЫН ГОВИЙН САВ ГАЗРЫН ЗАХИРГАА

Ус ашиглагч иргэн аж ахуйн нэгжийн 2023 оны ашигласан усны гэрээний хэрэгжилтийг дүгнэлээ. Мөн энэ үеэр ус ашиглагч аж ахуйн нэгжүүдтэй 2024 онд ус, усан орчныг хамгаалах, нөхөн сэргээх талаар хамтран ажиллах санал солилцов.

УВС АЙМГИЙН БАЙГАЛЬ ОРЧИН АЯЛАЛ ЖУУЛЧЛАЛЫН ГАЗАР ӨЛГИЙ СУМЫН ТУРУУТАН АМЬТДАД БИОТЕХНИКИЙН АРГА ХЭМЖЭЭГ АВЧ АЖИЛЛАЛАА
Энэ удаагийн биотехникийн арга хэмжээг 1-р сарын 17,19-ны өдрүүдэд Өлгий сумын нутаг дэвсгэрт / Баруун ууланд 2 цэгт, Чаргатын Хар гэсэн чиглэлд 3 цэгт, Цогтын цахирт 1 цэгт/ нийт 7 цэгт 60 боодол өвс, 100кг давс, 20 уут хужир тавьж байршууллаа. Хүйтний улиралд туруутан амьтдад тарга хүч авах нөхцөлийг бүрдүүлэх, амьтдын тоо толгойг нэмэгдүүлэх, идэш тэжээлийн хомсдолыг нөхөх давхар ач холбогдолтой юм.

ТАРВАГАТАЙН НУРУУНЫ БЦГ-ЫН ХАМГААЛАЛТЫН ЗАХИРГАА
Хамгаалалтын захиргааны албан хаагчид Орчны бүсийн Хойд Тэрхийн Алаг Ямаат, Хонгио зэрэг газарт янгир ямаа, аргаль хонины амьдрах орчин хүндэрч, идэш тэжээл муудсан тул 20 боодол өвс, 150 кг хужир тавилаа. Мөн биотехникийн арга хэмжээ хэрэгжүүлсэн газарт 4 ширхэг хөдөлгөөн мэдрэгч автомат камерыг судалгааны зориулалтаар байршуулж, дроноор бичлэг хийж, САМРТ программд ажиглалтын мэдээлэл орууллаа.

БУЙР НУУР-МЭНЭНГИЙН ТАЛЫН САВ ГАЗРЫН ЗАХИРГАА
Жил бүрийн 2 сарын 2-ны өдрийг Ус, намгархаг газрыг хамгаалах өдөр болгон дэлхийн хэмжээнд тэмдэглэн өнгөрүүлдэг. Энэ жилийн Ус, намгархаг газрыг хамгаалах өдрийн хүрээнд Дорнод аймгийн Чойбалсан хотын ерөнхий боловсролын Хан-Уул цогцолбор сургуулийн 5 дугаар ангийн нийт 112 суралцагчдад Рамсарын конвенц, Ус, намгархаг газар, Усаа хайрлан хэмнэх, Хог хаягдлын байгаль дахь хор нөлөөний талаар мэдээлэл өгч сургалт зохион байгууллаа.

БАЯН-ӨЛГИЙ АЙМГИЙН БАЙГАЛЬ ОРЧИН АЯЛАЛ ЖУУЛЧЛАЛЫН ГАЗАР
Баян-Өлгий аймгийн Дэлүүн сумын Засаг даргын тамгын газар амьтны нөөц ашигласны төлбөрийн орлогоос Байгаль хамгаалагч болон "Хыдыр" нөхөрлөлийн гишүүдийн хамтран Ахуунт агнуурын бүс нутагт өвөлжиж буй Аргаль хонь, Янгир ,Ямаа,Халиун Бугад зориулан 200 кг давс, 10 боодол өвсийг зөөвөрлөн байршуулан биотехникийн арга хэмжээг авч ажиллаа.

ИДЭР ГОЛЫН САВ ГАЗРЫН ЗАХИРГАА
Сав газарт хамрагдах Завхан аймгийн Идэр сумын-5, Тэлмэн сумын -11, нийт 16 иргэн, аж ахуйн нэгжид хаягдал усны дүгнэлт гарган ажиллав. Хаягдал усны нийт хэмжээ 4313 метр куб ба төлбөр ногдуулсан дүн 229346 төгрөг байна.

ДУНДГОВЬ АЙМГИЙН БАЙГАЛЬ ОРЧИН, АЯЛАЛ ЖУУЛЧЛАЛЫН ГАЗАР БҮГД НАЙРАМДАХ КИРГИЗ УЛСЫН ТӨЛӨӨЛӨЛ ДУНДГОВЬ АЙМАГТ АЖИЛЛАЛАА
Монгол Улсын Ерөнхийлөгч У.Хүрэлсүхийн санаачилсан “Тэрбум мод” Үндэсний хөдөлгөөн, Бүгд Найрамдах Киргиз Улсын Ерөнхийлөгчийн “Ногоон өв” санаачилгатай уялдуулах ажлын хүрээнд цэцэрлэгт хүрээлэн, жимсний мод үржүүлэг байгуулах газар сонгох, цэцэрлэгт хүрээлэнгийн арчилгаа, хамгаалалт, тарих зүйлийн сонголт, хөрсний шинжилгээ авах, уур амьсгалын олон жилийн дата мэдээлэлд боловсруулалт хийх ажлуудыг хийж гүйцэтгэлээ.

ОРХОНЫ ХӨНДИЙН БАЙГАЛИЙН ЦОГЦОЛБОРТ ГАЗРЫН ХАМГААЛАЛТЫН ЗАХИРГАА ЗЭРЛЭГ АМЬТДАД БИОТЕХНИКИЙН АРГА ХЭМЖЭЭ АВАВ
Хархорин сумын ЗДТГазар, УАЗ клуб-тэй хамтран Жалбаа баг Их эрээн ууланд нутагшиж байгаа ховор амьтдад биотехникийн арга хэмжээ авч 3 цэгт 400 кг хужир, 50 боодол өвс тавив.

АЛТАЙН ӨВӨР ГОВИЙН САВ ГАЗРЫН ЗАХИРГААНЫ ОНЦЛОХ АЖЛЫН ТАЙЛАН
Өмнөговь аймгийн ихэнх нутгаар хуурай гандуу байсан бөгөөд ГГБЦГ-т өвөлжилт хүндэрч зэрлэг амьтад өвс тэжээлийн хомсдолд орж, хорогдох эрсдэл ажиглагдаж байгаа тул уулын туруутан ан амьтдад зориулан 01 дүгээр сарын 30-ны өдөр Зүүнсайханы уул орчимд 60 боодол өвс тавьж, биотехникийн арга хэмжээ авав.

ХӨВСГӨЛ НУУР-ЭГИЙН ГОЛЫН САВ ГАЗРЫН ЗАХИРГАА
Сав газрын хэмжээнд хамаарах сумдын газар олголтын autocad болон shp газрын мэдээллийг цуглууллаа. Уг мэдээллийн дагуу сав газарт хамаарах Алаг-Эрдэнэ, Ханх сумдын усны сан бүхий газрын онцгой болон энгийн хамгаалалтын бүсэд давхцалтай иргэн, аж ахуйн нэгж байгууллагын судалгаа гаргаж, зураглалыг хийв.

ОТГОНТЭНГЭРИЙН УТХГ-ЫН ХАМГААЛАЛТЫН ЗАХИРГААНЫ
ОТГОНТЭНГЭРИЙН УТХГ-Т 140 БООДОЛ НОГООН ТЭЖЭЭЛ, 400 КГ ХУЖИР ТАВЬЖ БИОТЕХНИКИЙН АРГА ХЭМЖЭЭ АВЧ ХЭРЭГЖҮҮЛЛЭЭ
Отгонтэнгэрийн ДЦГ-ын Алдархаан сумын Их Богдын голд 3 байршилд 100 боодол ногоон тэжээл, 200 кг хужир, Отгонтэнгэрийн УТХГ-ын Алдархаан сумын Улаанхаалга хэсгийн Урт Нүүр, Бургаст, Баянхайрхан зэрэг газруудад 40 боодол ногоон тэжээл, 200 кг хужир тавилаа. Энэ хугацаанд 3 байршилд 14 буга, 5 байршилд 47 бүл согоо тэмдэглэгдлээ. Биотехникийн арга хэмжээний үр дүнг тооцох зорилгоор 1 цэгт автомат камер байршууллаа.

СЭЛЭНГЭ АЙМАГ БАЙГАЛЬ ОРЧИН, АЯЛАЛ ЖУУЛЧЛАЛЫН ГАЗАР
Экологийн цагдаагийн газрын Нарс арга хэмжээний хүрээнд Сэлэнгэ аймаг дахь Цагдаагийн газартай хамтран Ерөө сум, Бугант тосгонд үйл ажиллагаа явуулдаг ойн санг гэрээгээр эзэмшигч аж ахуйн нэгж байгууллагын 2023 оны мод бэлтгэлийн доод агуулахын бүртгэл тооллого хийв. Сум дундын ойн ангийн олгосон эрхийн бичиг, гарал үүслийн эрхийн бичгийн зарцуулалтыг шалгаж ажиллав.

АРХАНГАЙ АЙМГИЙН БАЙГАЛЬ ОРЧИН, АЯЛАЛ ЖУУЛЧЛАЛЫН ГАЗАР
Өвөлжилт хүндэрсэнтэй холбогдуулан зэрлэг амьтдын идэш тэжээлийн хангамжийг сайжруулах, тогтвор суурьшилтай байдлыг хангах зорилгоор Хашаат, Хангай, Чулуут сумдын ЗДТГ-тай хамтран уулын туруутан амьтдад биотехникийн арга хэмжээ авав.

МЯНГАН УГАЛЗАТЫН БЦГ-ЫН ХАМГААЛАЛТЫН ЗАХИРГАА
“ДЭЛХИЙН УС, НАМГАРХАГ ӨДРИЙГ ХАМГААЛАХ ӨДӨР’ сэдвийн хүрээнд цогцолборт газрын орчны бүсийн ерөнхий боловсролын сургуулийн эко клубийн багш нар сурагчдад сургалт мэдээлэл хүргэж ажиллалаа.

ДАРХАН-УУЛ АЙМГИЙН БАЙГАЛЬ ОРЧИН, АЯЛАЛ ЖУУЛЧЛАЛЫН ГАЗАР
“Дархан Хоггүй Ирээдүй”, “Монголын Тогтвортой Хөгжлийн Гүүр” ТББ-аас Европын Холбооны SWITCH- Аsia хөтөлбөрийн санхүүжилтээр хэрэгжүүлж буй “Монгол Улс дахь хуванцар хог хаягдлын дахин боловсруулалтын тогтвортой байдлыг хангах” төслийн хүрээнд “Хог хаягдлын сургагч багш бэлтгэх” сургалтыг хамтран зохион байгууллаа.

ХӨХ СЭРХИЙН НУРУУНЫ УТХГ-ЫН ХАМГААЛАЛТЫН ЗАХИРГАА
Хөх Сэрхийн нурууны УТХГ-ын хамгаалалтын захиргаа Чигэртэйн голын ай савын БЦГ-ын Тугал нуур, Чигэртэй, Цахлай, Төгрөг нуур хэсгүүдэд, загасны зөрчлөөс урьдчилан сэргийлэх зорилгоор хяналт шалгалтын ажлыг тогтмол зохион байгуулж байна. Мөн иргэдэд ТХГ-ийн дэглэмийн талаар мэдээлэл хүргэж сургалт сурталчилгааны ажлыг зохион байгууллаа.

УВС АЙМГИЙН БАЙГАЛЬ ОРЧИН АЯЛАЛ ЖУУЛЧЛАЛЫН ГАЗАР
ХЯРГАС СУМЫН ТУРУУТАН АМЬТДАД БИОТЕХНИКИЙН АРГА ХЭМЖЭЭГ АВЧ АЖИЛЛАЛАА
Хяргас сумын байгаль орчны тасгаас Амьтны тухай хуулийн хэрэгжилтийг хангах, ховор амьтдын тархац нутгийг хамгаалах, тоо толгойг нэмэгдүүлэх зорилгоор зэрлэг амьтдад идэш тэжээл, давс тавих ажлыг зохион байгууллаа. Энэ удаагийн биотехникийн арга хэмжээнд 3 багийн 12 цэгт 60 уут хужир, 700 кг давс, 40 боодол өвс тавьж байршуулав.

УЛААН ТАЙГЫН УТХГ-ЫН ХАМГААЛАЛТЫН ЗАХИРГАА
Дархадын хотгор Улаан тайгын УТХГ-уудыг зорин ирж буй аялагчдад хамгаалалтын захиргааны дэргэдэх СОЁНЫ ЭКО БҮС НУТАГ-ийн мэдээллийн төвийг танилцуулж, аялахад тохиромжтой газрын маршрут, аюулгүй аялах зөвлөмж, ТХГН-ийн дүрэм журмын талаар мэдээллээр хангаж, нэвтрэх нэг удаагийн тасалбарыг тасалж ажиллаж байна. Аялагчдын ихэнх нь Хорьдол сарьдгийн ДЦГ-ын Ар босготын хавцал, Тэнгис-Шишгэдийн БЦГ-ын зүүн тайгын аяллыг ихээхэн сонирхож ирж байна. Өнгөрсөн нэг дүгээр сарын хугацаанд 50 гаруй машин, 200 орчим аялагч мэдээллийн төвөөр үйлчлүүлж, Ар босготын хавцалд аяллаа.

ХАР-УС НУУРЫН БЦГ
Хар-Ус нуурын БЦГ-т ан амьтдад зориулж биотехникийн арга хэмжээ авч автомат камер байршуулж ажиллалаа. Нийт 38 боодол өвсийг 7 цэгт тарааж, 4 ширхэг автомат камер байршуулав.

ТУУЛ ГОЛЫН САВ ГАЗРЫН ЗАХИРГАА
АВТОМАШИН УГААЛГЫН ГАЗРУУДЫН УС АШИГЛАЛТЫН БАЙДАЛД ХЯНАЛТ ТАВИН АЖИЛЛАЖ БАЙНА.
Усны газрын даргын 2024 оны 1-р сарын 29-ны өдрийн баталсан удирдамжийн дагуу Улаанбаатар хотод автомашин угаалгын чиглэлээр үйл ажиллагаа явуулж байгаа иргэн, аж ахуйн нэгж, байгууллагын ус ашиглалтын байдалд хяналт, шалгалт хийлээ. Шалгалтаар 93 автомашин угаалгын газрын ус ашиглалтын байдалд хяналт тавихад саарал усны буюу бага оврын цэвэршүүлэх төхөөрөмж суурилуулан саарал усаа 100% эргүүлэн ашигладаг автомашин угаалгын газар – 1, 70%-ийг эргүүлэн ашиглаж байгаа – 5, 30%-ийг эргүүлэн ашиглаж байгаа – 13, саарал ус цэвэршүүлэн ашиглах бага оврын төхөөрөмж суурилуулсан ч ашиглахгүй байгаа – 9 автомашин угаалгын газар байна. Иймд 46 аж ахуй нэгж, байгууллагад хаягдал усны дүгнэлт гаргуулах тухай
хугацаатай албан бичиг өгсөн.

“ХАРАА-ЕРӨӨ ГОЛЫН САВ ГАЗРЫН ЗАХИРГАА”
Усны сан бүхий газар үүсмэл нуурт загас байгаа эсэхийг 60-80 см доош өрөмдөж
камераар харахад уг нуурт оконо, алган 2 төрлийн загастай болохыг тогтоов.

ХЯРГАС НУУР- ЗАВХАН ГОЛЫН САВ ГАЗРЫН ЗАХИРГАА
Холбогдох хууль тогтоомжийн хэрэгжилтийг хангуулах, Усны тухай хуулийн 17.1.10-т заасан бүрэн эрхийнхээ хүрээнд Завхан аймгийн Завханмандал сумын нутагт орших ашиглалтын тусгай зөвшөөрөл эзэмшигч “Шувуун хар уул” ХХК, Дөрвөлжин сумын нутагт орших ашиглалтын тусгай зөвшөөрөл эзэмшигч “Баян-Айраг эксплорейшн ХХК-уудад 2024 оны 1 дүгээр сарын 16-17-ны өдрүүдэд ус ашиглалтын байдалд хяналт шалгалт ажлыг зохион байгууллаа.