-Эхний ээлжинд Оросын тал 256 сая ам.долларын хөрөнгө оруулалт хийхээ мэдэгдэв-

Зам, тээвэр, барилга, хот байгуулалтын яамнаас "Монгол Улсын төмөр замын дэд бүтцийн хөгжлийн стратеги" сэдэвт олон улсын хурал зохион байгууллаа. Манай улсын хөгжлийн түшиг тулгуур уул уурхайн салбар байх нь тодорхой болсон. Орд газрыг эдийн засгийн эргэлтэд оруулахын тулд төмөр замын сүлжээг өргөтгөх асуудал чухлаар тавигдаж байна. Энэ чиглэлээр яамнаас төмөр замын хөгжлийн бодлогын баримт бичгийг боловсруулж байгаа. Манай улс төмөр замаа хөрш орны төмөр замын сүлжээтэй холбон, түүгээр бусад оронд уул уурхайн бүтээгдэхүүн нийлүүлэх нь ихээхэн үр дүн авчрах юм. Мөн транзит тээврийг хөгжүүлэх, далайн боомт руу бүтээгдэхүүнээ хүргэх зэрэг чухал асуудлуудыг ч орхигдуулахгүй байх шаардлагатай аж. Энэ бүхнийг шийдвэрлэхэд санхүүжилт хэрэгтэй.

Иймд уг салбарт хөрөнгө оруулах сонирхолтой улс орон, байгууллагуудтай хамтран ажиллах нь олон улсын хурлыг зохион явуулах болсон гол зорилго байлаа. Төмөр замын дэд бүтцийг барих чиглэлээр үйл ажиллагаа явуулах Монгол-Оросын хамтарсан "Дэд бүтцийн хөгжил" компанийг байгуулсан. Гэхдээ манай улсын төмөр замын салбарт ямар ч улс хөрөнгө оруулалт хийж, хамтран ажиллах боломжтой гэдгийг салбар хариуцсан сайд нээлтийн үеэр онцолсон.

Хуралд хөрш орнуудын төмөр замын салбарын томоохон төлөөлөгчид хүрэлцэн ирсэн байв. Тухайлбал, "Оросын төмөр зам" нээлттэй хувьцаат нийгэмлэг (НХН)-ийн ерөнхийлөгч В.И.Якунин, БНХАУ-ын Төмөр замын яамны тэргүүн зөвлөх Ван Линшу зэрэг хүмүүс хүрэлцэн ирж, төмөр замын дэд бүтцийг хөгжүүлэхэд хамтран ажиллах ямар боломж байгаа талаар санал солилцсон.

Төмөр замын дэд бүтцийн хөгжлийг уул уурхайн салбартай холбон авч явахаас өөр аргагүй. Цаашид ашигт малтмалын ордод хүрэх дөт төмөр замын сүлжээг байгуулах нь чухал аж. Мөн орд газрыг эрдэс баялаг боловсруулах үйлдвэртэй холбосон төмөр зам тавих хэрэгтэй байна. Үүнээс гадна төмөр замын дэд бүтцийг үр өгөөжтэй байлгах, ОХУ, Япон зэрэг улс руу бүтээгдэхүүнээ тээвэрлэх шууд төмөр замтай болох шаардлагатай аж. Нэг үгээр хэлбэл, манай улс Евро Азийг холбосон төмөр замтай болсноор ихээхэн хэмжээний ашиг олохоос гадна уул уурхайн бүтээгдэхүүнээ тээвэрлэж худалдаалах боломжтой болох юм.

Энэ бүхнийг хийхэд хөрөнгө оруулалт чухлаар тавигдаж байна. Эхний ээлжинд Тавантолгой руу төмөр зам тавих талаар яригдаж байгаа. Энэ талаар сайд Х.Баттулга "Тавантолгойгоос төв магистрал руу 400 км гаруй төмөр зам тавина. Хөрөнгө оруулалтыг гаднаас татахаас өөр аргагүй. Манай улсын уул уурхайн салбар руу орж байгаа хөрөнгө оруулагчидтай тохирно гэсэн бодолтой байгаа" гэсэн юм. Тэгвэл тус өдөр "Оросын төмөр зам" НХН-ийн ерөнхийлөгч В.И.Якунин болон Зам, тээвэр, барилга, хот байгуулалтын сайд Х.Баттулга нар Зүүнбаянгаас Даланзадгад / Тавантолгой/ руу тавих төмөр замын төслийн хэрэгжилтийг эхлүүлэх тухай санамж бичигт гарын үсэг зурсан. Үүний хүрээнд В.И.Якунин 256 сая ам.долларын хөрөнгө оруулалтыг эхний ээлжинд хийхээ мэдэгдэв. Гэхдээ энэ нь төмөр зам барих бэлтгэл ажлыг хангахад л зарцуулагдах хэмжээний хөрөнгө аж. Нэг км төмөр зам барихад 300 мянга орчим ам.доллар зарцуулагдах юм байна.

Талууд "Дэд бүтцийн хөгжил" компаниас боловсруулсан Монгол Улс дахь төмөр замын шинэ дэд бүтцийг бүтээн байгуулах болон Монгол-Оросын "Улаанбаатар төмөр зам" хувь нийлүүлсэн нийгэмлэгийн хөгжлийн төслийн үзэл баримтлалыг дэмжихээр тохиролцсон. Уг баримт бичигт Тавантолгой руу төмөр зам тавих асуудлыг ихээхэн дэмжжээ.

"Улаанбаатар төмөр зам" ХНН, "Оросын төмөр зам" НХН болон "Трансмашхолдин" хоорондын Харилцан хамтын ажиллагааны протоколыг өнгөрсөн наймдугаар сарын сүүлчээр байгуулсан. Үүний дагуу "Улаан-баатар төмөр зам"-д ирэх онд багтаан шинээр зүтгүүр өгөх, засвар үйлчилгээний төвийг байгуулахаар болжээ. Мөн боловсон хүчнээр хангахад Оросын зүгээс туслахаа илэрхийлсэн юм. Түүнчлэн, салбар хариуцсан яамнаас ачаа тээврийн үнэ тарифыг эдийн засгийн үндэслэлтэйгээр тодорхойлохоор болсон байна. Үүнээс гадна "Улаанбаатар төмөр зам"-ын объектуудыг улсын байгууллагуудад шилжүүлэн өгөхийн зэрэгцээ өмч хөрөнгө, өр зээлтэй холбоотой асуудлыг олон улсын хууль дүрмийн дагуу шийдвэрлэхээр тогтсон аж.