УИХ дахь Байгаль орчин, хүнс хөдөө аж ахуйн байнгын хорооны ээлжит хуралдаан боллоо.

Уг хуралдаанаар Газрын тухай /Шинэчилсэн найруулга/ хуулийн төсөл, Газрын төлбөрийн тухай /Шинэчилсэн найруулга/ хуулийн төсөл, Газрын кадастрын тухай /Шинэчилсэн найруулга/ хуулийн төсөл, Газрыг албадан чөлөөлөх тухай, Геодези, зураг зүйн тухай хуульд нэмэлт, өөрчлөлт оруулах тухай, Байгалийн нөөц ашигласны төлбөрийн тухай хуульд өөрчлөлт оруулах тухай, Хувь хүний орлогын албан татварын тухай хуульд өөрчлөлт оруулах тухай, Тусгай хамгаалалттай газар нутгийн тухай хуульд нэмэлт оруулах тухай, Ойн тухай хуульд нэмэлт, өөрчлөлт оруулах тухай, Усны тухай нэмэлт, өөрчлөлт оруулах тухай, Авто замын тухай хуульд нэмэлт оруулах тухай, Харилцаа холбооны тухай хуульд нэмэлт, өөрчлөлт оруулах тухай, Иргэний нисэхийн тухай хуульд нэмэлт, өөрчлөлт оруулах тухай, Эрчим хүчний тухай хуульд нэмэлт, өөрчлөлт оруулах тухай, Ашигт малтмалын тухай хуульд нэмэлт оруулах тухай, Төмөр замын тээврийн тухай хуульд нэмэлт, өөрчлөлт оруулах тухай, Монгол Улсын иргэнд газар өмчлүүлэх тухай хуульд нэмэлт оруулах тухай, Үл хөдлөх эд хөрөнгийн албан татварын тухай хуульд өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуулийн зарим зүйл, заалтыг хүчингүй болсонд тооцох тухай, Улсын тэмдэгтийн хураамжийн тухай хуулийн зарим зүйл, заалтыг хүчингүй болсонд тооцох тухай, Гадаадын хөрөнгө оруулалтын хуулийн зарим зүйл, заалтыг хүчингүй болсонд тооцох тухай хуулийн төслүүдийн хэлэлцэх эсэхийг гишүүд хэлэлцэж, санал бодол, байр сууриа илэрхийлсний дараа хэлэлцэх нь зүйтэй хэмээн үзэж, дэмжлээ.

Тодруулга: Энэ багц хуулиудыг Засгийн газрын 2013 оны 1 дүгээр сарын 5-ны өдрийн хуралдаанаар хэлэлцэн, УИХ-д өргөн мэдүүлсэн юм. Засгийн газрын 2012-2016 оны үйл ажиллагааны хөтөлбөрт "иргэдэд газар өмчлүүлэх асуудлыг бүрэн шийдвэрлэж, өмчилсөн газраа санхүүгийн эргэлтэд оруулах бодит боломж бүрдүүлэх, нийтийн эзэмшлийн газрыг гэрчилгээжүүлэх” зорилт тавьсан байгаа.

Газар өмчлөл 19,1 хувьтай байна

Уг зорилтын хүрээнд газрын харилцааны шинэтгэл хийхээр төлөвлөж, эдийн засаг, нийгмийн өнөөгийн шинэ түвшинд нийцэх байдлаар холбогдох зохицуулалтуудыг багц хуульд тусгаж өгсөн юм байна.

Байнгын хорооны хуралдаанаар мөн Засгийн газрын тусгай сан болох “Цэвэр агаарын сан” болон “Байгаль хамгаалах сан”-гийн үйл ажиллагааны талаарх мэдээллийг гишүүд сонсч, санал бодлоо илэрхийлсэн юм.

Мэдээллийг Байгаль орчин, ногоон хөгжлийн сайд С.Оюун хийж, сангуудын хөрөнгийн зарцуулалт, цаашид авах хэмжээний тухай байнгын хорооны гишүүдэд дэлгэрэнгүй танилцуулсан.

Энэ үеэр УИХ-ын гишүүн Б.Бат-Эрдэнэ, Л.Энх-Амгалан, Я.Содбаатар, С.Дэмбэрэл нар санал бодлоо хэлж, тодорхой асуултуудыг яамны сайд болон холбогдох ажилтнуудад тавьж байлаа. Тухайлбал, УИХ-ын гишүүн Л.Энх-Амгалан сангуудад хуримтлагдсан хөрөнгийн зарцуулалтыг сонирхож асуусны зэрэгцээ Хөвсгөл нуурт живсэн тээврийн хэрэгслүүдийн тухай тодруулсан юм.

Харин УИХ-ын гишүүн Я.Содбаатар, ахуйн хэрэглээний зуухны талаар болон яндангийн шүүлтүүрийн тухайд тодруулга хийж, агаарын бохирдлыг бууруулах асуудлаар хийсэн ажлынх нь талаар сангуудад мониторинг хийх нь зүйтэйг хэлсэн. Учир нь утаа байгаад л байдаг, гэтэл утааг багасгана гээд мөнгө урсаад л байгааг тэрээр сануулж хэлсэн. Түүнчлэн нийслэлд зүүн дөрвөн замын дээхнэ талд биохаягдал устгаж байгаа нь хэр зэрэг зүй зохистой болохыг эрхэм гишүүн асуусан юм. Эрүүл мэндийн болоод байгаль орчны байгууллагууд хамтран ахуйн хэрэглээний, бусад хэрэглээний түлшний бодлогын асуудлыг чанарын өөр түвшинд гаргаж ирэх нь чухал гэдгийг тэрээр онцолсон.

УИХ-ын гишүүн С.Дэмбэрэл, Монгол Улсын экологийн бүс нутгийн эмзэг байдлын талаарх газрын зураг байгаа юу? хэмээн асуухад байнгын хорооны хуралдаанд хүрэлцэн ирсэн яамны холбогдох ажилтнууд тоймтой хариулт өгч амжаагүй бөгөөд БОХХАА-н байнгын хорооны дарга Г.Баярсайхан энэ үеэр, “эрхэм гишүүн “экологийн карт”-ын талаар асуулаа, харин яамны нөхөд уг асуудалд дорвитой хариу өгсөнгүйгээр барахгүй мэдээлэл муутай байгаа нь харагдлаа. Асуултад та нөхөд “уналаа” гэсэн юм.

Байнгын хорооны даргын хэлснээр бол, экологийн картыг Монгол Улс арваад жилийн өмнөөс хийж эхэлсэн аж. Гэхдээ хөрөнгө мөнгөний асуудал дээр гацдаг ч ийм зүйлд гаднын байгууллага, хүмүүсийг түшихээс илүүтэй монгол эрдэмтдийнхээ, монгол хүний хүчийг авах нь зүйтэйг Г.Баярсайхан дарга анхааруулсан. Тэрээр монгол хүнээс илүү эх орноо мэдэх хүн үгүй гэдгийг ч энэ үеэр онцолж байсан юм.

Г.Баярсайхан: Монгол хүнээс илүү эх орноо мэдэх хүн үгүй