УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан /2013-11-06/ үдээс хойш эхэлж хуралдааны эхэнд Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн хоёр дахь хэлэлцүүлгийг хийлээ.

Хэлэлцүүлгийн явцад гишүүдийн асуултад холбогдох салбарын сайд нар хариулт өглөө. УИХ-ын гишүүн Я.Содбаатар асуултдаа, “Цалин, тэтгэврийг нэмэх асуудлыг 2014 оны төсөвт тоймтой тусгаж өгөхгүй бол Засгийн газрын үйл ажиллагааны мөрийн хөтөлбөрт сөрөг болчих гээд байгаа юм. Цалин, тэтгэврийг нэмэхгүй суугаад байх нь ард иргэдийн худалдан авах чадвар, ялангуяа нийгмийн зорилтот бүлгийн тэтгэвэр, тэтгэмж авч байгаа хүмүүст хүндээр тусч байна. Иймд цалин тэтгэврийг 30 хүртэл хувиар нэмэгдүүлэх саналыг УИХ дахь МАН-ын бүлэг хуралдаанаараа хэлэлцээд ажлын хэсэгт хүргүүлсэн.

ИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан /2013-11-06/

Цалин тэтгэврийг нэмэгдүүлэхэд зориулж 200 тэрбум төгрөг төсөвт тусгасан нь цалин, тэтгэврийг яг хэдэн хувь нэмэгдүүлнэ гэж тооцож байгаа юм бэ. Бидний тооцож байгаагаар 7-8 хувьтэй тэнцэх юм шиг байгаа юм. Энэ нь Засгийн газрын мөрийн хөтөлбөрт тусгасан цалин тэтгэврийг инфляцийн түвшинтэй уялдуулна гэж байгаатай нийцэж байна уу. Хэрвээ цалин, тэтгэврийг оны эхнээс 30 хувиар нэмбэл 750 тэрбум 900 сая төгрөгийн нэмэгдэл шаардлагатай байгаа. Үе шаттай нэмэгдүүлнэ гэвэл үүнээс бага мөнгө гарна. Тйимээс энэ асуудалд тодорхой хариулт авья" гэсэн юм.

Хүн амын хөгжил, нийгмийн хамгааллын сайд С.Эрдэнэ “Цалин,тэтгэвэр нэмэгдээгүй байхад сургаар нь үнэ тариф өсөөд явчихдаг. Ингэснээр үр дүн гардаггүй. Харин тодорхой наймаа арилжаа эрхэлж байгаа аж ахуйн нэгжүүдэд ашигтай, иргэдэд хохиролтой байдал үүсдэг байсан. Харин одоо цалин тэтгэврийн нэмэгдлийг урьдчилан зарлахгүйгээр тухайн салбарын онцлог байдлыг харгалзан ялгавартайгаар нэмэгдүүлэх зохицуулалт хуулийн төсөлд оруулсны дагуу ажиллаж байна. Засгийн газрын хуралдаанаар ярилцаад 2014 оны нэгдүгээр сарын нэгнээс эхлээд цалин, тэтгэвэрт нийтдээ 200 тэрбум төгрөг зарцуулахаар төсөвт суулгаж өгсөн. Харин задаргааг нарийвчлан хэлэх боломжгүй байна” гэлээ

Хэлэлцүүлгийн шатанд гишүүдээс гаргасан зарчмын зөрүүтэй саналын томьёоллоор нэгбүрчлэн санал хураалт явуулав. Ингээд дэмжигдсэн саналуудыг нэгтгэн томьёолж Байнгын хорооны санал, дүгнэлтийг Төсвийн байнгын хороонд хүргүүлэхээр тогтлоо. Санал хураалтын явцад УИХ дахь МАН-ын бүлгээс гаргасан ирэх онд цалин, тэтгэврийг 30 хувиар нэмэгдүүлэх саналыг гишүүдийн олонх дэмжсэн юм.

Үүний дараа Дээд боловсролын санхүүжилт, суралцагчдын нийгмийн баталгааны тухай хуульд өөрчлөлт оруулах тухай хуулийн төслийн /Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийг дагалдан өргөн мэдүүлсэн/ анхны хэлэлцүүлгийг хийж, санал, дүгнэлтээ Төсвийн байнгын хороонд хүргүүлэхээр боллоо.

ИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан /2013-11-06/

Гишүүдийн зүгээс суралцахын тулд нийгмийн баталгаа хэрэгтэй. Иймд хүн болгонд адил тэгш хүрэх үүднээс үндэсний тэтгэлэг гэдэг утгаар нь хэрэгжүүлээд явах нь зүйтэй. Харин улс оронд хэрэгцээтэй тодорхой мэргэжилд урамшуулал олгодог жишиг бусад оронд байдаг гэдгийг хэлж байлаа. Ингээд гишүүдээс гаргасан зарчмын зөрүүтэй саналаар санал хураалт явуулахад улсын олимпиадад тэргүүн байр эзэлж гадаад улсад сурч байгаа оюутанд үндэсний тэтгэлэг олгох заалт дэмжигдсэнгүй.

Мөн хуралдаанаар Соёлын өвийг хамгаалах тухай /шинэчилсэн найруулга/ хуулийн болон холбогдох бусад хуулийн төслүүдийг хэлэлцүүлэгт бэлтгэх ажлын хэсгийг Байнгын хорооны тогтоолоор байгуулж, Ажлын хэсгийн ахлагчаар УИХ-ын гишүүн Д.Арвиныг томиллоо.

Хуралдааны дөрөв дэх асуудал НДҮЗ-ийн 2012 оны үйл ажиллагааны тайланг хэлэлцлээ. Тайланг Хүн амын хөгжил, нийгмийн хамгааллын сайд С.Эрдэнэ танилцуулав. Хэлэлцүүлгийн шатанд хууль, тогтоомжийн хэрэгжилтийг сайжруулах, алдаа дутагдлыг засах, хугацаанд нь ажлын тайлангаа гаргаж өгөх чиглэлийг Байнгын хорооны тэмдэглэлээр үүрэг болголоо

Дөрвөн асуудал хэлэлцэн шийдвэрлэлээ