Эдийн засгийн байнгын хорооны хуралдаан /2013,11,06/ болж, хуралдаанаар Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн хоёр дахь хэлэлцүүлэг, мөн Төсвийн албаны эрх зүйн байдлын тухай хуулийн төсөл, Төсвийн тухай хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлэг, “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн анхны хэлэлцүүлгийг хийж, санал, дүгнэлтээ Төсвийн байнгын хороонд хүргүүлэх байв.

Хуралдаанаар хэлэлцэх асуудлуудаар санал хураах үеэр гишүүн Ц.Нямдорж, ирэх оны төсвийн тухай хуулийн төслийг хэлэлцэж, шийдвэрлэх нь нэн тулгамдсан ажил учир Их Хурал, байнгын хороод энэ асуудал уруу анхаарал, хүчээ төвлөрүүлэн ажиллах нь зүйтэй, тиймээс Их Хуралд зөвхөн дэмжлэг үзүүлж ажиллах үүрэгтэй, цөөн хэдэн хүнтэй судалгаа шинжилгээний ийм нэг жижиг байгууллага болох Төсвийн албаны эрх зүйн байдлын тухай хуулийн төслийн хэлэлцүүлгийг хойшлуулах хэрэгтэй, би ийм горимын саналтай байна гэсэн юм. Энэ горимын санал дэмжигдсэнээр Төсвийн албаны эрх зүйн байдлын тухай хуулийн төслийн хэлэлцүүлгийг хойшлуулахаар болов.

Эдийн засгийн байнгын хорооны хуралдаан /2013,11,06/

Харин гишүүн А.Тлейхан Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн хоёр дахь хэлэлцүүлгийг бүлгүүдийн ажлын хэсэг болон байнгын хороодын ажлын хэсгийн санал дүгнэлт хараахан эцэслэн гараагүй байна, тиймээс дундаас нь энэ байнгын хороогоор өнөөдөр хэлэлцэх нь учир дутагдалтай, хэлэлцүүлгийг хойшлуулах нь зүйтэй хэмээн горимын санал гаргасан боловч дэмжигдсэнгүй, байнгын хорооны дарга хэлэлцүүлгийг эхлүүлж, ажлын хэсгийг танилцууллаа.

ЭЗБХ-ны ажлын хэсгийн гишүүн Д.Ганбат 2014 оны төсвийн тухай хуулийн төсөлд тусгагдаагүй 10 төсөл, арга хэмжээний 66.7 тэрбум төгрөгийг төсөлд нэмж тусгуулахтай холбогдуулан ажлын хэсгээс гаргасан зарчмын зөрүүтэй саналын томъёоллуудыг уншиж танилцуулав.

Мөн ЭЗБХ-ны даргын нэр дээр Зам тээврийн яамнаас ирүүлсэн 2013 оны төсвийн тодотголоор хасагдсан зарим төсөл, арга хэмжээний төсвийг 2014 оны төсөвт тусгуулах тухай албан бичгийг байнгын хорооны хэлэлцүүлгийн энэ шатанд авч хэлэлцэх эсэх талаар гишүүд санал зөрөлдөөнтэй байлаа.

Тухайлбал, гишүүн Ц.Нямдорж Засгийн газар 2013 оны төсвийн тодотголын тогтоолын хэрэгжилтийг хэрхэн хангах талаар саналаа ирүүлээгүй байхад нэг яам дангаараа ингэж санал ирүүлж болохгүй гэсэн бол Сангийн сайд Ч.Улаан Зам тээврийн яам албан бичгээ танилцуулга болгон хүргүүлэх зорилгоор ирүүлсэн гэж үзээд байнгын хорооны хуралдаанаар авч хэлэлцэхгүй байж болох дэгийг баримтлан хэлэлцэх асуудлаа үргэлжлүүлээд явахад саадгүй гэж байв. Гишүүн Д.Ганбат байнгын хорооны хуралдааныг үр дүнтэй болгох үүднээс энэ асуудлаар Төсвийн байнгын хороотой хамтарсан хуралдаан хийх санал гаргалаа. Ийнхүү маргасны эцэст ирэх оны төсвийн хоёр дахь хэлэлцүүлгийг хойшлуулах шийдвэрийг байнгын хорооны дарга гаргасан.

Эдийн засгийн байнгын хорооны хуралдаан /2013,11,06/

Гэвч байнгын хорооны хуралдааныг үдээс хойш дахин зарлан хуралдуулж, Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн хоёр дахь хэлэлцүүлгийг хийлээ. Гишүүд байнгын хорооны ажлын хэсгээс боловсруулан хуралдаанд оруулж ирсэн зарчмын зөрүүтэй саналууд нэг бүрээр асуулт асууж, санаачлагч болон ажлын хэсгийн тайлбар хариултыг сонсон хэлэлцсэний дараа санал хурааж дууслаа.

Ингээд ирэх оны төсвийн хоёр дахь хэлэлцүүлгийг дуусган ЭЗБХ-ны санал дүгнэлтийг Төсвийн байнгын хороонд хүргүүлэхээр УИХ-ын гишүүн, ажлын хэсгийн ахлагч Г.Батхүүг томилов.

ЭЗБХ-ны өнөөдрийн хуралдаанаар “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн анхны хэлэлцүүлэг хийгдлээ. Ажлын хэсгийн ахлагч гишүүн С.Одонтуяа зарчмын зөрүүтэй саналуудын томъёоллыг танилцуулж, гишүүд асуулт асууж, хариулт авч, томъёолол тус бүрээр санал хурааж эхэлсэн боловч хуралдаанд оролцож байгаа гишүүд олон асуудлаар санал нэгдэх боломжгүй байгаагаа илэрхийлж байв.

Гишүүн Д.Батцогт мөн энэ шалтгаанаар МАХН-МҮАН-ын эвслийн бүлгээс завсарлага авах горимын санал гаргахад ажлын хэсгийн ахлагч С.Одонтуяа олонх гишүүдээс гарч байгаа саналууд болон эвслийн бүлгийн горимын саналыг харгалзан “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн анхны хэлэлцүүлгийг долоо хоногоор хойшлуулахаар горимын санал гаргаж байна гэсэн юм. Ажлын хэсгийн ахлагчийн гаргасан энэхүү горимын санал байнгын хорооны хуралдаанд оролцсон гишүүдийн олонхиор дэмжигдсэнээр хуралдаан өндөрлөв