Газрын харилцаатай холбоотой төрийн 72 төрлийн үйлчилгээ цахимд шилжээд байна. Үүний 30 нь мэргэжлийн байгууллага буюу геодезийн тусгай зөвшөөрөл олгох үйл явц байгаа бол 42 нь иргэдэд чиглэсэн үйлчилгээг цахимд шилжүүлжээ.

Тухайлбал иргэн, хуулийн этгээд газар эзэмших эрхээ бусдад шилжүүлэх, эзэмшиж буй газраа өмчлөх, барьцаанд бүртгүүлэх, чөлөөлөх, зориулалт өөрчлөх, талбайн хэмжээ өөрчлөх, хэсэгчлэн шилжүүлэх зэрэг нийт 21 хүсэлтийг Газрын цахим систем болон гар утасны аппликэйшинг ашиглан цахимаар илгээх боломжтой болсон төдийгүй газрын төлбөр төлөх, газрын гэрээ, гэрчилгээ, кадастрын зургийг иргэд гэрээсээ хэвлэн авч байна.

Өмнө нь цахимд шилжихээс өмнө 30-60 хоног шаардагддаг байсан бол одоо эдгээр бичиг баримтыг QR кодоор баталгаажуулан цахимаар хандаж, үнэгүй татаж авахад минут хүрэхгүй хугацаа зарцуулж байна. Өнөөгийн байдлаар тус үйлчилгээг 28 мянга 980 удаа үзүүлж, 600 сая гаруй төгрөгийг хэмнээд байна.