Манукол академийн ерөнхийлөгч, доктор З.Бат-Отгон “Мөнх тэнгэр ба шинжлэх ухаан ” номоо бичиж, уншигч олондоо хүргээд байгаа билээ. Ингээд түүнтэй номынх нь талаар ярилцлаа.

-Сайн байна уу, та? Таныг шинэ, сонирхолтой ном гаргасан гэж сонслоо. Баяр хүргэе. Ямар ном гаргав аа? Энэ номыг бичих санаа хэзээнээс төрж эхэлсэн бэ?

Баярлалаа. Би саяхан “Мөнх тэнгэр ба шинжлэх ухаан” гэдэг ном гаргалаа. Миний үндсэн мэргэжил бол физик - математик. Би оюутан байх үеэсээ амьдралыг, хөгжил дэвшлийг болон орчлон хорвоог арай өөр нүдээр харж эхэлсэн. Гэтэл манай дэлхийд сайн сайхан зүйлсээсээ муу муухай зүйлс илүү олон байв. Жишээ нь, маш олон дайн самуун болж, хүмүүсийн цус нулимс урсаж, хагацал өнчрөл, зовлон зүдгүүр, өлсгөлөн гуйланчлал, ядуурал, хар тамхи, мансуурал, донтол, биеэ үнэлэлт, харгислал, дарангуйлал, хүчирхийлэл гэх мэт амьдралд байж боломгүй - тэвчишгүй муу муухай зүйлс энгийн үзэгдэл болсон, түүнд хүмүүсийн бодол, сэтгэл хэтэрхий дассан учир ямар ч эмзэглэл, харуусал төрөхгүйгээр маш буруу амьдарч байгааг ажигласан. Тэгээд миний сэтгэл маш их шаналсан, маш их гутарсан.

Тэр үеэс би “Хүн төрөлхтөн яавал энэ их муу муухай зүйлсээс салах бол?” гэж их боддог болсон. Бас “Хүн төрөлхтний зөв, сайн сайхан оршин амьдрах арга нь юу вэ, гарц нь юу вэ?” гэж эрж хайж эхэлсэн.

-Тэгээд та олсон уу?

Олсон. Би гарцыг хайхдаа хамгийн эхлээдбайгальд хамгийн төгс шийдэл, гарц гаргалгаа байдгийг санаад байгалиас хайсан. Энэ нь эцсийн эцэст орчлонгийн оршихуйн түгээмэл хууль гэж нэрлэгддэг орчлонгийн оршихуйн үндсэн хуулийг таньж мэдэх ажил болж хувирсан. Орчлонгийн оршихуйн үндсэн хуулийг би өөрийн эзэмшсэн физик, математикаас олоогүй. Тиймээс хими, биологи, газар зүй, анагаах ухаан, хүн судлал, сэтгэл судлал гэх мэт шинжлэх ухааны тулгуур 20 гаруй салбар луу орж судалгаа хийсэн. Бас л олоогүй. Шинжлэх ухааны хамгийн сүүлчийн салбар болох синергетик нь шинэхэн учраас тийм өндөр түвшний шийдэлд хараахан хүрээгүй байна. Дараа нь философи руу орсон. Өрнө, дорнын гүн ухааныг бүхэлд нь уншиж судалсан. Бас олоогүй. Дараа нь будда, христос, ислам хэмээх гурван том шашны сургаал номлолоос олоогүй. Мөн эзотерикийг уншиж судалсан боловч бас олоогүй. Ингээд миний эрэл мухардсан.  

Ингээд би 2000–аад оны эхээс монгол судлал руу орж судалгаа хийж эхэлсэн. Учир нь, нүүдэлчин монголчууд байгалийг илүү танин мэдсэн байдаг төдийгүй тэдний амьдрал нь байгальтай хүйн холбоотой байдаг. Ингэж монгол судлал руу орж, эртний Монголын гүн ухааныг судалсанаар би орчлонгийн оршихуйн түгээмэл онол, үндсэн хуулийг олсон. Удаан хайсан эрлээ олсон. Түүнийгээ “Мөнх тэнгэр ба шинжлэх ухаан” ном болгон бичиж уншич та бүхэнтэй хуваалцаж байна.   

-Мөнх тэнгэрийг шинжлэх ухаантай хослуулж бичсэн гэсэн үг үү?

Товчхондоо, тэгж ойлгож болно. Мөнх тэнгэр гэдэг зүйлийг шинжлэх ухааны онол, хууль, мэдлэгээр тайлбарлаж, баталж бичсэн.  Монголчууд бид Мөнх тэнгэр гэж ярьдаг ч яг юуг нь сайн мэддэггүй.

-Мөнх тэнгэр гэж яг юу юм бэ? Олон монголчууд танаас энэ асуултыг асуугаасай гэж бодож байгаа байх.

Тэнгэрийн сургаалд болон монгол суу ухаанд “Мөнх тэнгэр бол орчлонгийн бүх гэрлийн эрчим хүчний дээд нэгдэл” гэж сургадаг. Эндээс Мөнх тэнгэр бол гэрэл, гэрлийн энергийн нэгдэл болох нь маш тодорхой харагдана. Өөрөөр хэлбэл, Мөнх тэнгэр гэдэг бол цахилгаан соронзон физик, гэрлийн буюу оптикийн физик, атомын физик, цөмийн физик, квант физик гэсэн үг. Цаашилбал, синергетикийн онол, хууль, мэдлэг. Тэгэхээр Мөнх тэнгэр бол сүсэг бишрэл, шашин шүтлэг огтхон ч биш. Гагцхүү шинжлэх ухааны дээд онол, дээд мэдлэг, монголчуудын орчлонг бүхлээр нь бүрэн танин мэдсэн дээд шинжлэх ухаан юм. Чухамхүү үүнийг л уг номонд дэлгэн өгүүлсэн.

-Мөнх тэнгэр, монгол суу ухаан хоёр яаж холбогдох уу. Монгол суу ухааныг хэдэн онд бичлээ?

2010 онд бичээд Монгол суу ухааны 100 цуврал лекц хийгээд ард түмэнд хүргэсэн. Үндсэндээ гурван жилийн дараа Мөнх тэнгэр ба шинжлэх ухааныг бичсэн. Монгол суу ухаан бол улс гэрийн оршдог хууль. Харин Мөнх тэнгэрийн ухаан бол орчлон гэдэг гэр улсын оршдог онол хууль. Өөрөөр хэлбэл байгалийн хууль маш төгс гарц гаргалгаа шийдэлтэй. Нэг талаас, судалгаа маань монгол суу ухаан гэсэн шатнаас мөнх тэнгэрийн ухаан гэсэн дараагийн дээд шатанд ахисан гэсэн үг. Нөгөө талаас, мөнх тэнгэрийн ухаанаас монгол суу ухаан соёолж, ургаж гарсан гэсэн үг. Нэг ёсондоо, монгол суу ухааныг төрүүлсэн эцэг ухаан нь мөнх тэнгэрийн ухаан.

Тэгэхээр таны судалгаа ахиж дээшлээд, улам хүрээгээ тэлээд, гүнзгийрч байна гэсэн үг үү?

Тиймээ. Миний судалгаа дараагийн түвшиндөө шилжсэн. Хэрвээ орчлон хорвоог нэг гэр гэж үзвэл түүний тооно нь Мөнх тэнгэр. Орчлонгийн орой бол Мөнх тэнгэр. Тиймээс өвөг дээдэс маань “Оройн дээд Мөнх тэнгэр бий, орчлонг чиглүүлэгч мөнхийн хүч бий” гэж итгэлтэй хэлдэг байж. Энэ нь Мөнх тэнгэр бол орчлонгийн төр – орчлонгийн глобаль удирдлага гэсэн утгыг илэрхийлнэ.

Мөн орчлон хорвоог нэг гэр гэж үзвэл тэр гэр доторх бүх амьдрал гагцхүү Мөнх тэнгэрийн хуулиар буюу Мөнх тэнгэрийн зарлигаар явагддаг юм байна. Монголчууд тэр хуулийг танин мэдээд, түүгээр улсаа бадраан хүчирхэгжүүлж Их Монгол улсыг байгуулжээ. Бидний өвөг дээдэс ингэж орчлон гэрийг бүхэлд нь бүрэн танин мэдэж, тэр мэдлэгээ дэлхий гэр, улс гэр, өрх гэртээ хэрэглэснээр тэнгэрлэг, агуу оршиж ирсэн байна. Мөнх тэнгэрийн ухааныг улс гэрт хэрэглэсэн нь монгол суу ухаан.

Тэгэхээр Мөнх тэнгэрийн ухаан бол орчлон гэрийн оршихуйн ухаан, харин монгол суу ухаан бол улс гэрийн оршихуйн ухаан. Мөнх тэнгэрийн ухаан ч, монгол суу ухаан ч хоёулаа байгалийн ухаан төдийгүй тэнгэрийн ухаан. Чухамхүү ингэж орчлонгийн буюу тэнгэрийн оршихуйн онол, хуулиудыг баримталж оршин амьдарсан монголчуудыг тэнгэрлэг монгол гэж нэрлэдэг байжээ.   

-Орчлонгийн орших хуулийн талаар өгүүлсэн номоо та өөр ямар хэл дээр гаргах вэ. Дэлхийн бусад хүмүүст хүргэх үү?

Хүргэнэ. Одоо Япон, Англи, Орос хэл дээр орчуулж байгаа. Оросууд бол маш шинжлэх ухаанч ард түмэн. Барууны суурь иргэншлийнхэн энэ орчлон ертөнцөд зөв амьдрах хуульгүй явж ирсэн учраас өнөөдөр яаж амьдрахаа мэдэхгүй байгаа юм. Газрын нэг үндэснээс өвс ургамал ургадагийг бид мэднэ. Тэгвэл Мөнх тэнгэр гэдэг тэнгэрийн нэг үндсээс орчлонгийн бүх үзэгдэл юмс соёолон дэлгэрч, салаалж мөчирлөж, цэцэглэн дэлгэрдэг юм байна. Тиймээс Мөнх тэнгэр бол орчлонгийн бүх зүйлсийг өөрөөсөө үүсгэсэн, эргээд орчлонгийн бүх зүйлийг өөртөө хураан нэгтгэдэг.

Чухамхүү энэ бол супер нэгдэл. Шинжлэх ухааны сүүлчийн тулгуур онол нь супер нэгдлийн онол гэдгийг хүн бүхэн мэднэ. Тэрхүү супер нэгдэл нь монголчуудын танин мэдсэнээр Мөнх тэнгэр байжээ. Өвөг дээдсийн маань орчлонг бүхлээр нь танин мэдсэн энэ мэдлэг өнөөгийн монголчууд төдийгүй дэлхийн танин мэдэхүйд ялангуяа, шинжлэх ухааны танин мэдэхүйд нэн чухал. Тиймээс уг номыг англи, орос, япон хэл рүү хөрвүүлж, хэвлэж, түгээхээр ажиллаж байна.

-Энэ номоороо дамжуулан хүн төрөлхтөнд юуг ойлгуулахыг хүсч байна вэ?

Монголчууд өнөөдөр мөнх тэнгэр гэдгээ мэдэхгүй байна. Орчлон хорвоог гэрэл удирддаг болохоос ерөнхийлөгч гэх хүн удирдахгүй, буддагийн сүнс удирдахгүй. Гэрлийн энерги нь удирддаг юм. Сансар огторгуйд байгаа бүх зүйлс гэрэлтэж оршдог. Зугаа цэнгэлийн газар дандаа харанхуй байдаг. Хүн өөрөө гэрэлтэй газар амгалан тайван, харанхуй газар айдас түгшүүртэй байдаг. Хүн гэрэл рүү тэмүүлж, харанхуйгаас зугатах ёстой. Ингэж мөнх тэнгэр бидэнд гэрэлд амьдрах ёстой, гэрлээ нэмж амьдрах ёстой гэдгийг хэлж байгаа ч хүн төрөлхтөн мунхаг тэнэг болоод байна.

Бидний бүтээсэн соёл, байгуулсан улс орон маань нэг л болохгүй байна.

Харанхуй талдаа явсаар харанхуй хүмүүсийг бий болгожээ.

Тэгэхээр гэгээрэл хэрэгтэй. Тархиныхаа гэрлийг, зүрхнийхээ гэрлийг нэмэх, амьдралынхаа гэрлийг нэмцгээе.

-Хүн гэрлээ хэрхэн нэмэх ёстой юм бэ?

Өнөөдөр монгол улсад 700 төрлийн хууль байгаа ч хүмүүсийн амьдралыг сайхан болгохгүй байна. Мөнх тэнгэрийн хууль бол бүх зүйлийг гэрэлтгүүлнэ. Хүн гэрлээ нэмэхийн тулд тархиа ухаанаар, зүрхээ хайраар, сүнсээ зөв, үнэн, шударга ариунаар цэнэглэхээр амьдрал нь гэрэлтэнэ. Сайн сайхан зүйл бол гэрэл. Энэ номоороо дамжуулж хүн төрөлхтөн зөв сайхан амьдрах онол хуулийг хүргэж байгаа юм.

-Бидэнтэй ярилцсан танд баярлалаа. Эрдмийнх нь ажилд улам өндөр амжилт хүсье!  

Баярлалаа. Та бүхэнд ч бас ажлын амжилт хүсье!