Сур харвааны Сүбээдэй үйлдвэрийг үүсгэн байгуулагч, спортын мастер Н.Даваадорж агсны нэрэмжит Урианхай сурын уламжлалт харвааны нээлтийн арга хэмжээнд УИХ-ын гишүүн С.Зулпхар оролцож, нутгийн тамирчдад амжилт хүсэн, дэмжиж ажиллахаа илэрхийллээ.

Энэ жил Алтанцөгц сумын түүхт 100 жилийн ой тохиолдож байгаа учир энэхүү тэмцээн өргөн цар хүрээтэй, ёслол төгөлдөр зохион байгуулагдаж байна. Урианхай сур харваа бол Евразийн тал нутгаар аж төрж ирсэн нүүдэлчин ард түмнүүдийн дунд өргөн дэлгэрсэн, түүхэн, соёлын, цэргийн ач холбогдолтой уламжлалт харвааны урлаг юм. Эртний нүүдэлчид нум, сумыг зөвхөн ан агнуурт бус, цэрэг дайны гол зэвсэг болгон ашиглаж, тухайн соёлын нэгэн чухал бүрэлдэхүүн болгон хөгжүүлж иржээ. Урианхай сур харвааны урлагийг түгээн дэлгэрүүлж, аймгийнхаа нэр хүндийг өндөрт өргөж яваа улсын мэргэн, нийт харваачдадаа спортын их амжилтыг хүсэн ерөөе.