Байгаль орчин, хүнс, хөдөө аж ахуйн байнгын хорооны /2025.04.08/-ны өдрийн хуралдаанаар Улсын Их Хурлын 2024 оны 63 дугаар тогтоолын хэрэгжилтийн талаарх Хүнс, хөдөө аж ахуй, хөнгөн үйлдвэрийн сайдын мэдээллийг сонслоо.

Уг тогтоол нь “Цагаан алт” хөдөлгөөнийг хэрэгжүүлэх тухай юм. Төслийг хэрэгжүүлэхэд 1,5 их наяд төгрөгийн арилжааны 10 банкны эх үүсвэрээр хөнгөлөлтэй зээл ологох бөгөөд энэ хүрээнд эргэлтийн хөрөнгийн хөнгөлөлттэй зээлд хамрагдахаар ноолуурын салбараас 71, ноосны салбараас 148, арьс ширний салбараас 96, нийт 315 аж ахуйн нэгж хүсэлтээ ирүүлээд байгааг салбарын сайд мэдээлсэн.

Үүнтэй холбогдуулан гишүүд асуулт асуулаа.

УИХ-ын гишүүн Б.Уянга:

Засгийн газраас хариуцан төлөх хүү 10 хувь байдаг. Зээлд хамрагдах аж ахуй нэгжүүдийг банкууд хэрхэн сонгож байгаа вэ? Өмнө нь зээл авч байгаагүй компаниудаа хэрхэн дэмжиж байгаа вэ? Яамнаас оролцоо бий юу? эсвэл банк аж ахуйн нэгж хоорондын харилцаа гээд орхиж байна уу? Зээл авахын тулд нэлээдгүй шаардлагыг хангуулдаг гэсэн шүүмжлэл их. Зээл Улаанбаатар, Дархан-Уул, Орхон аймгуудад олгогдож байна гэжээ. Бусад нь яах вэ? Тэдгээр аймгуудад үйлдвэрлэл хөгжих боломж байна уу? Танай яамнаас энэ бодлого нийт улсыг хамрах хүрээнд хэрхэн авч хэрэгжүүлж байна вэ?

Түүний асуултад Хүнс, хөдөө аж ахуй, хөнгөн үйлдвэрийн сайд Ж.Энхбаяр хариуллаа.