УИХ-ын чуулганы /2025.05.15/-ны өдөр “Монгол Улсын хөгжлийн 2026 оны төлөвлөгөө батлах тухай” Улсын Их Хурлын тогтоолын төслийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ. 

УИХ-ын гишүүн Г.Уянгахишиг:

2024 оны Хөгжлийн хөтөлбөрийн тайланг хэлсэн. Энэ дээр үнэлгээний зарчмууд хоорондоо зөрүүтэй байна. Дүрэм, журмууд нь хоорондоо зөрүүтэй байна. Мөн түүнчлэн хэмжигдэхүүнүүд нь тодорхойгүй байна. Үүнээс үүдээд гүйцэтгэлийн үнэлгээ багасчихлаа гэдэг асуудал яригдсан. Мөн гадаад зээлээр болон гадаадын төсөл, хөтөлбөрөөр эсвэл төр, хувийн хэвшлийн түншлэлийн хүрээнд санхүүжилтийг шийднэ гэсэн төслүүдийн гүйцэтгэл маш бага байсан. Яг энэ асуудал 2027 онд дахиад давтагдаад яригдах нь гэж санаа зовж байна. Үүнийг цаашдаа хэрхэх вэ?

Мөн түүнчлэн дэлгэрэнгүй танилцуулга дээр жишээлбэл тоон хэмжигдэхүүний хувьд бол 2024 оноор эцэслээд авахыг ойлгож байна. Гэхдээ хууль зүйн хүрээнд засаглал, хүний эрхийн нөхцөл байдал гэдэг 1.4 дээр УИХ дараах хуулийн төслийг ЗГ-аас өгсөн өргөн мэдүүлээд байна гэдэг дотор Казиногийн хууль, Бооцоот морин уралдааны тухай хууль, Төлбөрийн чадваргүйдлийн тухай хууль гэх мэт өмнөх парламентын өргөн баригдаад, батлагдаж чадаагүй буцчихсан хуулийн төслүүдийг өнөөдөр өргөн мэдүүлээд явж байгаа юм шиг биччихсэн байна. Бичиг цаасаа боловсруулахдаа хуулаад тавьдаг байдлаар явмааргүй байна!