УИХ-ын чуулганы өнөөдрийн /2025.06.19/-ий хуралдааны үеэр УИХ-ын дарга Д.Амарбаясгалан УИХ-ын гишүүний Санамж бичигт заасан заалттай холбоотой дараах мэдээллийг өгч, мэдэгдэл хийлээ.

Нэг санамж уншиж танилцуулъя. Манай УИХ-ын гишүүд шинэ гишүүний сургалтад хамрагдаад тус бүр санамж бичиг авсан байгаа. Гишүүн болгонд энэ санамж бичиг өрөөнд нь, хавтсанд нь, цүнхэнд нь, ширээн дээр нь байж байх ёстой болов уу гэж бодож байна. Мэдээж санал санаачилгууд гаргаад түүнийгээ олон нийтэд хүргэхээр явж байгааг цаашид дэмжинэ. Санамж бичгээр УИХ-ын чуулганы нэгдсэн хуралдаан болон байнгын, дэд, түр хорооны хуралдаанд оролцогч дараах санамжийг баримтална аа гэж байгаа юм.

Нэгдүгээрт, хуралдааны танхимд Үндэсний болон албаны хувцастай нэвтэрч өөрт хамааралтай хэлэлцэх асуудлыг танилцуулсны дараа хуралдаан зохион байгуулах асуудал хариуцсан албан хаагчийн заасан дугаар бүхий суудалд суух гэдэг ийм Санамж бичиг байгаа гэдгийг та бүхэндээ хэлье.

Гишүүд маань өнөөдөр Дулаан Улаанбаатар гэдэг. Улаанбаатар хотын агаарын бохирдолтой холбоотой асуудлаар бичихдээ футболк өмсөж байгаа юм байна. Тэгэхээр чуулганы танхимд энэ футболкийг өмсөхийг хориглож байна. Санамж бичиг байгаа. Бид төрөө хүндлэх ёстой, түмэн олноо хүндлэх ёстой, олон нийт рүү чиглэсэн мэдээллийг ХМХ-ээр дамжуулж хийж байх учиртай гэдгийг та бүхэндээ хэлье.

Би дахиад нэг зүйлийг сануулж хэлье. Төр нь төвшин түмэн олон амгалан байх болтугай гэдэг зүйлийг бид дандаа бодож, ажиллаж амьдрах ёстой. Үгээ хэлэх, үзэл бодлоо илэрхийлэх бодлого, зарчим санал гаргах зүйлийг огт шүүмжлэхгүй ээ. Тэр нь та бүхний хуулиар олгогдсон эрхийн асуудал харин төр нь төвшин амгалан байхын төлөөх үйл хэрэгт УИХ-ын гишүүн, дарга, сайд болгон идэвхтэй, санаачилгатай хүндэтгэлтэй хандаж байх ёстой гэдгийг бас хариуцлагатай хэлье ээ.

Д.Амарбаясгалан: УИХ-ын чуулганы танхимд футболк өмсөхийг хориглож байна!