Хэлэлцэж буй асуудалтай холбогдуулан УИХ-ын гишүүд асуулт асууж, санал хэллээ.

УИХ-ын гишүүн Б.Баттөмөр:

Чөлөөт бүс байгуулах тухай асуудал бол шинэ зүйл биш. Өнөөдрийн байдлаар дэлхийд 5400 чөлөөт бүс байна. Эдгээрээс хамгийн үр бүтээлтэй ажиллаж байгаа нь манай хөрш орны чөлөөт бүсүүд юм. Тэнд хамгийн том үндэстэн дамнасан корпорациуд  очиж үйлдвэрлэл явуулж байна. Тэгэхээр бид чөлөөт бүсийн туршлагыг холоос хайгаад хэрэггүй. Урд хөрш бол гаднаас өндөр технологи, мэргэжилтнүүдийг нутагтаа авч ирээд, өөрсдийн ажилчиддаа туршлагыг нь сургаад, тэд нь дэлхийн түвшний бүтээгдэхүүн үйлдвэрлэх замаар хөгжиж, өнөөдөр дэлхийн хоёр дахь том эдийн засгийг бий болгосон байна. Тиймээс бид урд хөршийнхөө туршлагаас суралцах шаардлагатай.

Аливаа улсын хөгжилд чөлөөт бүс онцгой ач холбогдолтой. Бид үүнийг зөв байгуулж, зөв хийх шаардлага тулгараад байна. Цагааннуурын чөлөөт бүс, Замын-Үүдийн чөлөөт бүс, Алтанбулагийн чөлөөт бүсүүд хөгжихгүй байгаа шалтгаан нь юунд байна вэ?

Хоёрдугаарт Хөшигийн хөндийд эдийн засгийн чөлөөт бүс байгуулахад ямар эрсдэл байгаа вэ?

Түүний асуултад Эдийн засгийн хөгжлийн дэд сайд С.Наранцогт хариуллаа.