Өмнөговийн Хүүхдийн эрхийн хууль зүйн хороо болон Хилийн цэргийн ангид хяналт шалгалт хийв
2022.11.08

Өмнөговийн Хүүхдийн эрхийн хууль зүйн хороо болон Хилийн цэргийн ангид хяналт шалгалт хийв

ХЭҮК-ын гишүүн Х.Мөнхзулаар ахлуулсан ажлын хэсэг Өмнөговь аймагт ажиллаж байна. Энэ хүрээнд тус аймгийн Засаг дарга Р.Сэддоржтой албан уулзалт зохион байгуулж, Комиссын зүгээс тус аймагт хийх хяналт, шалгалтын удирдамжийг танилцуулж, аймаг орон нутаг дахь хүний эрхийн нөхцөл байдлын талаарх мэдээлэл солилцлоо.

Өмнөговь аймгийн хүүхдийн эрхийн хууль зүйн хорооны үйл ажиллагаанд хяналт шалгалт хийлээ

ХЭҮК-ын бүрэлдэхүүн Өмнөговь аймагт ажиллах ажлын төлөвлөгөөнд аймгийн Хүүхдийн эрхийн хууль зүйн хорооны үйл ажиллагаанд хяналт шалгалт хийлээ.

Тус хяналт, шалгалт нь гэмт хэрэг, зөрчил үйлдсэн гэж сэжиглэгдэж, мөдөн шалгагдаж байгаа, гэмт хэргийн гэрч, хохирогч болсон, ял шийтгүүлсэн, албадлагын арга хэмжээ авагдсан, зөрчил үйлдэж шийтгэгдсэн хүүхдэд үзүүлж буй үйл ажиллагаанд хяналт шалгалт хийж, хүүхдийн эрхийн зөрчил дутагдлыг илрүүлэх, таслан зогсоох зорилготой юм.

Энэ хүрээнд хяналт шалгалтын дүнг үндэслэн хүний эрхийн зөрчлөөс урьдчилан сэргийлэх зорилгоор Комиссын гишүүний Зөвлөмжийг, хүний эрхийн зөрчлийг арилгуулах, таслан зогсоох зорилгоор Комиссын гишүүний Шаардлагыг холбогдох эрх бүхий албан тушаалтанд хүргүүлнэ.

Хилийн цэргийн 0131 дүгээр ангид хяналт, шалгалт зохион байгууллаа

Монгол Улсын Үндсэн хууль, Монгол Улсын цэргийн нийтлэг дүрмүүд болон бусад хууль тогтоомж, олон улсын гэрээгээрээ баталгаажуулсан хугацаат цэргийн алба хаагчдын халдашгүй байх, эрүү шүүлтээс ангид байх эрхийн хэрэгжилтийг шалгаж, хүнийн эрхийг сахин хамгаалах, Монгол Улсын Хүний эрхийн Үндэсний Комисс, Хил хамгаалах ерөнхий газрын хамтран байгуулсан “УИХ-ын 2022 оны 49 дүгээр тогтоолыг хэрэгжүүлэх хүрээнд цэргийн алба хаагчдын хэрэгжүүлэх төлөвлөгөө”-ний 3 дахь заалтыг хэрэгжүүлэх зорилгоор ХЭҮК-ын гишүүн Х.Мөнхзулаар ахлуулсан ажлын хэсэг тус аймаг дахь Хилийн цэргийн 0131 дүгээр ангид хяналт, шалгалт зохион байгууллаа.

Шалгалтын бүрэлдэхүүн цэргийн байрны нөхцөл байдалтай танилцаж, ангийн удирдлага, холбогдох албан тушаалтнаас амаар болон бичгээр тайлбар авч, хугацаат цэргийн албан хаагчидтай ганцаарчилсан болон бүлгийн ярилцлага хийж, холбогдох баримт бичиг гаргуулан авч дүн шинжилгээ хийж зэрэг аргачлалаар хяналт шалгалтын ажиллагааг явуулав.

Хяналт шалгалтын дүнг үндэслэн хүний эрхийн зөрчлөөс урьдчилан сэргийлэх зорилгоор Комиссын гишүүний Зөвлөмжийг, хүний эрхийн зөрчлийг арилгуулах, таслан зогсоох зорилгоор Комиссын гишүүний Шаардлагыг холбогдох эрх бүхий албан тушаалтанд хүргүүлнэ.