Баянгол дүүргийн ИТХ-ийн дарга "Газар зохион байгуулалтын алба"-ны хамт олныг хүлээн авч уулзлаа
2023.01.24

Баянгол дүүргийн ИТХ-ийн дарга "Газар зохион байгуулалтын алба"-ны хамт олныг хүлээн авч уулзлаа

Баянгол дүүргийн Иргэдийн Төлөөлөгчдийн Хурлын дарга Б.Сэмжидмаа уламжлал ёсоор шинэ 7 хоногийн эхний өдөр Д.Энхтөр даргатай дүүргийн Газар зохион байгуулалтын албаны хамт олныг хүлээн авч уулзлаа.

Газар зохион байгуулалтын алба 13 хүний бүрэлдэхүүнтэйгээр ажиллаж, “Газрын тухай хууль” болон холбогдох бусад хууль тогтоомжийн хүрээнд төрийн үйлчилгээг иргэдэд хүргэх, хуулийн хэрэгжилтийг хангаж ажилладаг. Түүнчлэн Монгол Улсын Засгийн газар, Нийслэл, дүүргийн ИТХ, Засаг даргын мөрийн хөтөлбөрт тусгагдсан зорилго, зорилтыг хэрэгжүүлдэг.

Тус алба нь Монгол Улсын цахим шилжилтийн үйл явцтай холбогдуулж газрын албаныхны ажил үйлчилгээнд техник, тоног төхөөрөмжийн хүртээмж дутагдалтай хэдий ч ард иргэдийн https://egazar.gov.mn/ системээс үйлчилгээ авах нөхцөл боломжийг нэмэгдүүлэх, хороод тус бүрт киоск машиныг байршуулж, ухаалаг утаснаас цахим үйлчилгээ авч сурах дадал хэвшлийг иргэдэд суулгахад анхаарч ажиллаж байгаагаа танилцуулав.

ИТХ-ын дарга Б.Сэмжидмаа "Ажлын ачаалал их, амьжиргааны өртөгтэй харьцуулахад цалин хангамж өндөр биш ч албан үүргээ нэр төртэй биелүүлж, иргэдэд төрийн үйлчилгээг тэгш хүртээмжтэй хүргэх нөр их ажлаас ухарч няцалгүй хөдөлмөрлөж буй та бүхэнд ажлын өндөр амжилт хүсэн ерөөе" гээд хойшид хуулийн хүрээнд боломжит хэлбэрээр дэмжин ажиллахаа илэрхийлсэн юм.