УИХ-ын Байгаль орчин, хүнс, хөдөө аж ахуйн байнгын хорооны өнөөдрийн /2023.06.20/ хуралдаанаар Монгол Улсын олон талт олон улсын гэрээ, гэрээний хорооны зөвлөмжийн хэрэгжилтийн тайланг сонслоо.

Уг асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Г.Ганболд:

Бид олон улсын конвециудад нэгдэж орж байна. Нэгдэж орохын өмнө хэлэлцээр хийх хүрээндээ улсын хүлээх үүргийг сайн тооцож байж нэгдэж орох хэрэгтэй. Сэтгэлийн хөөрлөөр орчихоод дараа нь хүлээсэн үүргээ биелүүлж чадахгүй байдалд орох явдал зөндөө гарах юм байна.

2030 онд сэргээгдэх эрчим хүчний хэрэглээг 30%-д хүргэнэ гээд ярих шиг боллоо. Энэ хэзээ ч бүтэхгүй шүү дээ. Эрчим хүчний сайд үүний эрс эсрэг байгаа. Сэргээгдэх эрчим хүчний хувьд үнэ тариф өндөр байна. Төвийн эрчим хүчний нэгдсэн системд оруулахад бусад эрчим хүчний системээс 2-3 дахин өндөр үнээр нийлүүлж оршин тогтнож байна.

Засгийн газрын бодлого нь эрс өөр. Гэтэл Улсын их Хурал нь олон улсын конвенцод нэгдээд орчихсон. Ийм эрс зөрүүтэй юманд орохын хэрэг байгаа юм уу? Үүн дээр анхаарахгүй бол эрчим хүчний асуудал ноцтой хэмжээнд байна. Нэгэнт олон улсын гэрээ, конвенцод нэгдээд орчихсон бол Эрчим хүчний сайд, Засгийн газартаа 2030 он гэхэд сэргээгдэх эрчим хүчний хэрэглээг 30%-д хүргэнэ гэж үүрэг хүлээсэн гэдгээ ойлгуулж, үүнийгээ биелүүлэхийн тулд Их Хурал бодлого гаргах хэрэгтэй.

Засгийн газар үүргээ биелүүлэхийн тулд барьж байгаа бодлогоо өөрчлөх хэрэгтэй гэдэг дээр шахалт үзүүлэхгүй бол болохгүй юм биш үү? Товчхон тайлан байна, дэлгэрэнгүй биш. Ямар үүрэг хүлээсэн юм, одоо хэрэгжүүлж буй зүйл юу байна гэдгийг л хэлэх ёстой. Хэрэгжүүлэхэд болохгүй байгаа зүйлийг та нар ярих ёстой.